【獨媒報導】旺角場今日舉行高級組銀牌決賽，東方在加時不敵傑志，這亦是球隊連續兩屆在決賽落敗。雖然輸波，但東方就憑着表現，贏得現場球迷的掌聲。東方球員余在言當選今場最有價值球員，他表示為球隊表現感到驕傲：「我哋咁樣對一隊成日贏嘅波，傑志係11隻鬼，場場都要贏嘅，咩盃賽都要晒。我哋今場波表現到，其實係可以贏到佢哋。仲有聯賽、足總盃，我哋宜家focus 嗰啲吧。」
在比賽後，東方一眾職球員在球場草地圍圈，主教練盧比度先勉勵球員，並指示球員答謝球迷。守門員葉鴻輝則顯得唏噓，臉上亦難掩失望之情，有東方球隊職員更不禁落淚，要由球員鐘樂安拍肩安慰。
本身是港隊代表成員的余在言（Jesse）他成為今場最有價值球員，現場記者亦有投票選出該個獎項。Jesse在賽後表示「唔知道有呢個獎」、「都無諗過」：「幫唔到球隊贏波，攞到獎都無咩特別。」
余在言一度眼泛淚光 遭反勝「特別痛」
在完場後，22歲的余在言一度眼泛淚光，有記者問他是否控制不了情緒。Jesse 亦真情流露說：「輸波囉！始終我哋⋯⋯我覺得自己呢場deserve to win。嗯，呢個就係足球⋯⋯唔係話踢得好嗰隊就一定會贏。」
在今場比賽中，東方憑十二碼先拔頭籌，最終在踢少兩人的情況下遭傑志反勝。余在言認為，東方不論表現、部署、攻勢，乃至入球機會，都較傑志優勝，「始終都係差最後一下」，加上球隊有兩名球員被逐：「好唔開心囉，幫唔到東方。我知道好多（隊友）上年因為輸咗比傑志，呢個盃賽，對呢個決賽，對呢場波好大感受，好想幫東方、球員、職員同管理層贏番呢個盃。」
在去屆足總盃決賽，Jesse 代表標準流浪上陣，同樣不敵傑志，今屆高級組銀牌決賽再次輸給傑志。余在言提到，東方今場領先一球，卻遭傑志追和再反勝，「呢個感覺係⋯⋯咁樣輸法特別痛，但呢個就係足球，都恭喜傑志，佢哋都反cup 到。」
梁冠聰感足球的殘酷 信終有一日能用成績報答球迷
東方隊長梁冠聰今場射入一球十二碼，替球隊領先，傑志最終在臨完場前追和，在加時更反勝2：1。對於連續兩屆銀牌決賽不敵傑志，「大佬」在賽後表示：「嗯⋯⋯人生你唔知會有幾多個決賽，同埋呢個係足球其中一個殘酷，你踢得好有陣時未必有。」
梁冠聰感謝球迷支持：「咁多支持者支持我哋，其實呢個感覺，係永遠都唔會買得到。好想用冠軍答謝佢哋，對我哋球會一直以嚟嘅支持，今次唔得，希望下次得。」他相信，東方終有一日能用成績報答球迷。
嘆球隊未能把握入球機會 梁冠聰：有時人生就咁
有記者問東方「差啲咩」，「大佬」想了想後苦笑說「差入球」：「論場面，論表現，論經驗，其實我哋一年比一年好，比上年更加好，質素就係質素，入球就係入球，我哋好多機會把握唔到，呢個就係我哋嘅分別。」
連續兩屆落敗，連續兩屆的對手都是傑志，只是比賽地點由香港大球場改為旺角大球場，感覺是否份外難受？梁冠聰則表示，不會以難受來形容：「我哋做咗我哋應該做嘅本分，我覺得有時人生就咁，你做咗你應該做嘢，奈何唔係企喺你嗰邊，你只可以要啲時間接受。」他再三重申，十分希望用冠軍答謝東方球迷：「佢哋係無與倫比，我哋仲差緊佢哋嘅。」
記者：麥馬高、周頌謙