【獨媒報導】斧山道運動場周日上演港超聯煞科戰，這亦是成軍三年的香港U23的告別戰，最終2：4不敵大埔。香港U23主教練司徒文俊對球隊散班感可惜，亦對來季或新成立的U22聯賽成效存疑，質疑屆時本地球隊聘請U22球員作全職訓練的數目不多，或只會加入更多U18球員參與相關比賽，比賽強度亦不及港超聯：「我哋隊波宜家full time training，日日都會練波，有時連埋做gym，可能唔止一日一課。」
香港U23自2021/22年球季成立，源於當時兩支球隊退出港超聯，現任足總主席霍啟山是球隊主要贊助人，其出資八位數字確保球隊運作維持至少三年。香港U23顧名思義，以23歲以下的全華班年輕球員為重心，另可派遣5名超齡球員正選上場。在三個球季之中，首個球季便因新冠疫情腰斬，香港U23今季曾在港超聯擊敗晉峰，終於取得成軍三年以來首場勝利，上一輪再贏均業北區。
香港U23昨日在社交網站發文，正式宣布退出港超聯，重申球隊旨在增加年輕球員參與高水平比賽的機會，鼓勵年輕人追夢，稱首兩個球季已輸出不少球員到友會延續其夢想，形容已完成階段性任務，為本地足球圈提供養份。
霍啟山半場到更衣室為球隊打氣 惟未能影合照
在今場賽事，香港U23上半場獲得一記十二碼，隊長梁煒烽與劉家喬一度爭射十二碼，最後由前者操刀。梁煒烽在37分鐘射入十二碼，一度替球隊先開紀錄，但大埔下半場連入四球反勝，最終1：4見負，最終今季港超聯以20場2勝3和15負作結。
足總主席兼香港U23主要贊助人霍啟山在半場到達球場，與一眾董事等進入更衣室為球隊打氣。他們原欲在下半場開始前與球員合照，但球證已鳴笛開波，最後只能作罷。
稱成功踢出有味道足球 司徒文俊：我哋唔係踢走晒啲波
香港U23主教練司徒文俊早前曾表示，香港U23能夠給予年輕球員上場時間，是重要的舞台。他今場在賽前接受《獨媒》訪問，對散班感到可惜，兩年來看到球隊進步，而數據亦反映球員向前直線傳送增加，較少部分球隊更多：「你舊陣時問我，上季季初會講有味道嘅足球，呢啲就係有味道嘅足球，我哋唔係踢走晒啲波。」
《獨媒》追問是否即已達到目標，司徒則稱：「你話係咪可以再好啲？一定係。」他表示，如有更好的超齡甚或外援球員帶領，年輕球員進步會更明顯。
兩度嘆可惜 司徒文俊：係咪可以行多一步呢？
談到散班，司徒文俊兩度嘆可惜：「我始終都係local 土生土長，so far我行到嚟呢度⋯⋯踢咗十幾年職業足球，代表咗香港40幾次加埋futsal，我嘅前輩成就咗我，我喺度想develop啲嘢，對香港local 有啲感情。我見到咁嘅情況，係咪可以行多一步呢？」
司徒文俊表示，在獲悉散班消息後「心情一定唔好」，並透露：「月頭嘅時候都已經滲吓滲吓，或者叫做自己sense 到、估到啲，知道個可能性多與少，有定心理準。」在香港U23散班後，部分年輕球員來季或無班落，司徒重申有球員在公布散班消息前，已被其他球隊挖角，「係好事嚟嘅」：「有11隊波，位置空間係大啲。」然而，他憂慮如有其他球隊退出港超聯，球員生存空間便會減少。
對於足總來季擬成立U22聯賽，司徒文俊表示不清楚細節，但質疑成效不及現時的香港U23，更反問：「同以往預備組有無分別？以往預備組係咪真係製造到年輕球員出嚟？比賽強度夠唔夠？」
雲天樂稱心情複雜：仍然好想繼續踢職業
此外，球隊守門員雲天樂早前曾在社交網站發文，慨嘆球隊競爭力不足。他賽前向《獨媒》稱對球隊散班感到心情複雜，「該講嘅已經講晒」，指球隊競爭力或不足，但認為由1分到9分已是很大進步：「大家都努力咗兩、三年，都想喺U23散班之前可以留返個美好嘅回憶俾大家。」另外，他希望，球迷能見到球員整季的努力：「唔知外界點睇我哋呢隊波，我哋圍內好希望踢好波俾大家，實力真係有差距，但唔代表我哋會認輸、放棄。」
談到來季去向，雲天樂表示想繼續踢下去，但目前仍「未有著落」：「好多球隊都未開始組班，可能自己實力未到啦，係咪先？所以未真係好確切去邊度，但仍然好想繼續踢職業。」
對於有傳其他港超聯球隊去向未明，來季球隊數目或會減少，雲天樂則慨嘆：「呢個就係香港足球嘅現況，一年一年咁計，無人簽四、五年，好似英超咁簽咁長。」如果無班落會否返回英國？雲天樂則稱：「嗯，可能有機會⋯⋯我自己都唔知，好老實。當然唔想打定輸數，無隊搵我就返英國，我好想留待有無機會，更多球隊reach，或者搵到邊隊波踢。」
鄧筵霑稱見證球隊進步 指對年輕球員成長有一定幫助
已效力香港U23三季的鄧筵霑，已是球隊大師兄。他自言見證了球隊的進步，因為三年來球隊人腳越見年輕：「其實更加難打，但我哋越踢越發揮到球隊build up 嘅戰術，今年好似見到少少成果，好多場都咬住好近好近，對住佢哋都唔會好輸蝕。」
鄧筵霑最後認為，球隊對年輕球員成長有一定幫助：「可惜係一定會有，但呢啲唔係我哋控制到嘅嘢。」然而，來季會否繼續踢職業足球，鄧筵霑就表示「未知」。
另外，鄭進泓今場停賽，他身穿印有達洛治的曼聯球衣坐在看台上。
記者：麥馬高