【獨媒報導】2019年7.21元朗事件中，前立法會議員林卓廷與6男被控暴動罪，今（13日）踏入第28天審訊，林卓廷接受控方盤問。高級檢控官程慧明向林指出，「你從來冇試圖同白衣人商討或者和談，睇下有冇機會平息件事？」，例如說「大家冷靜啲」。林解釋：「如果佢哋唔郁手，我絕對可以傾。但係佢哋好短時間已經開始打人，點埋去傾？」控方又問：「你冇考慮試下同何君堯聯絡，平息件事？」林不同意，指：「佢係咪真係可以同班人講得掂？唔知㗎。」控方亦質疑：「你根本無意平息，相反希望挑撥雙方人士敵意，破壞社會安寧，置市民安危不顧？」林激動表示：「嘩！呢個係指鹿為馬，絕不能同意。」控方又指：「你自恃立法會議員，自以為白衣人唔夠膽襲擊你，所以放肆挑釁白衣人？」林冷笑稱：「完全唔同意。」
控方指何桂藍拍攝白衣人或構成挑釁
林卓廷第6日作供，控方高級檢控官程慧明繼續盤問。林早前稱有人於月台放置衣服，控方問林有否鼓勵黑衫市民更衣保護自己，林強調當時環境危急，沒有想過。控方又指出，實際上白衣人是「選擇性襲擊」站內人士，襲擊目標是從閘內人群步出，或有挑釁行為的人。林不同意，並指有記者被毆打。控方指何桂藍當時正拍攝白衣人，「影佢哋可能係挑釁？」林驚訝回應：「吓？」控方補充：「我唔係話挑釁你就去打人係啱，你同唔同意佢哋係選擇性打人？」林表示：「我唔係白衣人呀，唔知佢哋用咩準則去打人，更加唔同意影佢就係挑釁囉。」
控方指林可選擇與何君堯商討
另外，控方指閘內市民告知林卓廷「何君堯喺嗰邊公園同白衣人影相」，並著林過去與何「傾吓」，但對話被打斷。控方問林：「如果你覺得同何君堯傾係可行，其實你可以跟進？」林不同意，指「佢唔喺現場。如果佢在場，我即刻捉住佢問，啲人係咪你帶嚟㗎？」，而且他質疑：「佢係咪真係可以同班人講得掂？唔知㗎。」
控方質疑林「從來冇試圖同白衣人商討和談」
控方向林指出：「你從來冇試圖同白衣人商討或者和談，睇下有冇機會平息件事？」林解釋：「我埋去向白衣人做手勢話唔好郁手，如果佢哋唔郁手，冷靜啲大家傾，我絕對可以傾。但係佢哋好短時間已經開始打人，點埋去傾？埋去已經好似打你，停咗襲擊先有機會傾㗎，點傾呀？太過強人所難啦。」
控方質疑林無說「不如冷靜啲」林：咁講會唔會太天真？
控方續指，在白衣人未施襲前，「其實你可以商討和談，譬如話『大家冷靜啲，不如咁樣，市民想返屋企⋯⋯』，但你冇做類似嘅平息？」林回應：「做唔到，唔係冇做到！佢一路指罵恐嚇，我手勢冇惡意⋯⋯佢哋好快打人，都冇機會，未去到你講緩和氣氛嘅地步已經開始打人。」
控方問：「你冇話『有事慢慢傾』？」林同意沒有。控方又問：「你有冇話『不如冷靜啲，放市民返屋企』？」林表示：「根本現場唔係咁吖嘛，我咁講會唔會太天真？人哋粗口爛舌一路鬧緊你，睇落形勢隨時郁手打你。如果對方好似檢控官閣下你咁斯文，咁就梗係好傾。」
控方質疑：「其實你冇試到（和談）？冇試你點知有冇用？」林表示：「我評估係冇用」，又指需要先阻止暴力。林同意控方指，當時他說「唔好郁手」是沒有用。控方再質疑：「你冇試圖找尋其他方式平息事件？」林不同意，並指自己有嘗試其他方法，包括拉住站得前的市民，又拍攝白衣人以阻嚇。
控方指黑衣人挑釁白衣人 挑起對抗情緒
另外控方問林，其立法會議員身份是否對平息事件幫助不大，林同意。他解釋，這個身份並非在每個場合都有幫助，但「唔嘗試努力去做，唔知幫唔幫到㗎嘛」，至少在事件中，有市民說「議員你都打！」、「嘩！打議員呀！」，證明議員在場遇襲，會令市民覺得襲擊事件性質更嚴重。
控方指出，閘內有黑衣人挑釁白衣人，包括「手指指」及擲物；林不同意屬挑釁，因目睹白衣人一直打人，「指罵佢（白衣人）點樣叫挑釁呢？我都指住，係喝止，唔係挑釁。」控方續問：「你同意黑衣人行為有機會挑起白衣人對抗情緒？」林不同意並重申：「白衣人一路打人、掟嘢、指罵，佢哋見到乜嘢作出行為我係唔知。」
控方：林號召人群留閘內、自恃立法會議員放肆挑釁
控方指出：「你到場號召其他人留喺付費區，以至人群集結更加多，令氣氛嚴重導致激烈衝突？」林表示：「完全唔同意。」控方再指：「你自恃立法會議員，自以為白衣人唔夠膽襲擊你，所以同付費區嘅人群放肆挑釁白衣人？」林冷笑並稱：「完全唔同意。」
控方指林挑撥敵意不顧市民安危 林：係指鹿為馬
控方指出：「你冇考慮試下同何君堯聯絡，用任何方式試下平息件事？亦都冇試圖用和平方式同白衣人商討，容許市民安全離開？亦冇向與元朗區關係密切嘅議員求助？」林一律不同意。控方最後指出：「其實你根本無意平息事件，相反地希望挑撥雙方人士敵意，破壞社會安寧，完全置現場市民安危不顧，包括付費區內外？」林激動表示：「嘩！呢個係指鹿為馬，絕不能同意。」
案件明續審。
7名被告均否認暴動罪，包括：時任立法會議員林卓廷（43歲）、庾家豪（35歲）、陳永晞（37歲）、葉鑫昇（31歲）、鄺浩林（26歲）、尹仲明（48歲）及楊朗（26歲）。
案件編號：DCCC 1106/2020、1132/2022（已合併）
審訊第28日
控方質疑林卓廷無能力：警察未到，你手無寸鐵憑咩保護市民？
控方質疑林卓廷「冇試圖同白衣人和談」 亦無聯絡何君堯平息事件
審訊第27日
控方指林卓廷入元朗挑起事端 令警方疲於奔命 再攻擊辦事不力
審訊第26日
林卓廷：遭白衣人指罵「最衰都係你」、被打至嘴流血及手臂骨裂
審訊第25日
林卓廷稱未完成保護市民故無離開：點可以喺危難之中，自己走咗去呢？
林卓廷稱閘內市民射水為救傷者 官問：你有冇喝止佢哋？