【獨媒報導】2019年7.21元朗事件中，遭白衣人施襲的前立法會議員林卓廷，與6男被控暴動罪，案件今（6日）在區域法院續審。林卓廷供稱，7.21前認知西鐵站較安全，從未發生過大型襲擊，相信「冇人咁大膽走去西鐵站公然打人」，「咁嘅規模，我諗係香港歷史上前所未見。」林指有男子叫他到公園找何君堯，他不認同對方並警告：「過去呢，就準備打交。」林形容對方態度是煽風點火，並認為對方是「覺得自己好勇嘅人」。法官陳廣池質疑：「佢哋覺得自己好勇，你唔話『你咁勇你自己去』？」林略帶激動表示：「咁我咪多一條罪！煽惑佢喎我驚！」林表示其後閘外有數以十計持棍白衣人向其方向靠近，於是擺出停止手勢，想叫「白衣人唔好埋嚟」。林又不斷叫「唔好郁手呀！」，因不想衝突開始，「一開始就好難搞㗎喇。」
林稱不打算換走黑衫：換衫會無私顯見私，且不打算離站
林卓廷第二日作供，他與辦事處總幹事莊榮輝及民主黨社區主任冼卓嵐，於7月21日晚抵達元朗站，聽到月台有人叫「下面打人呀！」，於是步出車廂。閉路電視顯示約10時43分，林等3人在月台行走，林身穿黑色上衣及淺色長褲，而莊及冼身穿印有字樣的黑色上衣。林表示沒有手持任何東西，但法官陳廣池留意到林步出車廂時手持電話，及後放入褲袋。林聞後對表示：「法官大人，你明察秋毫，我都睇唔到。」
辯方大律師黃錦娟問林打算走往哪裏，林表示：「當時冇咩概念，只係人潮多數向邊邊，咪跟住行。」他又指自己對元朗的方向感不是太強。林形容月台氣氛緊張，有男子大叫「下面有人打人呀！」、「落去幫手」。林補充，列車未抵達時，已感覺車廂個別人士開始緊張，有乘客問他是否如網上消息指元朗有白衣人；林回應已聯絡警察，並盡快入元朗監察。林又指，月台上有人靠着圍欄向下望，他不覺得月台有特別多深色衫人士，亦不覺很多人持傘。不過他見月台上有人擺放少量衣服，並提醒：「唔好着黑色衫，換衫呀，唔係就白衣人打人呀。」
辯方問，為何林卓廷等3人沒有更換上衣，林解釋：「我根本唔會考慮換衫，因為我太易認啦，換唔換衫啲人都認得我，換衫會無私顯見私。」再加上他不打算離開元朗站，以免穿黑衫會有被白衣人打的風險：「我個心覺得，我根本唔係想入元朗嘅，唔離開西鐵站係最好嘅決定。」而且他以收到的消息，白衣人沒有進入西鐵站，因此留站內會更安全。林認為警方「會好快做嘢」，因他已對警方表明正前來監察，但不知道實際上是否已行動。
林：公然打人我係唔敢相信，我諗係香港歷史上前所未見
陳官追問：「你點知白衣人唔會入站？你唔出去唔代表佢哋唔入嚟，你覺得危險仲喺度？」林表示7.21之前，其認知西鐵站是較安全，從未發生過大型襲擊，「冇人咁大膽走去西鐵站公然打人。」林續指，事後回看知道當時的認知並非正確，「原來可以發生咁嘅事情，呢個係超出我當時想像」，「公然打人我係唔敢相信，你話零星個別衝突係有可能；但係咁嘅規模，我諗呢個係香港歷史上前所未見。」陳官問以林的說法，是否指：「如果喺西鐵站外公然打人，你覺得唔出奇？」林回應，自己於2019年6月經歷過遭親政府人士在警方面前毆打，「當時社會就係咁呀嘛。」
林：站內向市民表示已聯絡警方
閉路電視顯示，林於10時44分沿扶手電梯向下前往大堂付費區，途中林將電話交冼進行 Facebook 直播，讓公眾知道他如何履行公職，並留下紀錄保障自己。
辯方播放林的直播片段。片見林於10時45分抵達付費區，他表示當時見女士頭部流血並面露惶恐，於是林稱：「嘩！好多血呀！」林上前慰問，後來得悉有人照顧對方便離去。有市民說：「之前有啲白衫衝入嚟打人。」林及後問「打人啲人喺邊？」以評估形勢。其後林對身邊市民稱：「我已經聯絡咗元朗警區嘅警官，叫佢盡快打擊站附近嗰啲黑社會。」他希望以立法會議員身份，釋除市民的顧慮及擔心。
片段顯示林與一名男子的對話：
男子：「（佢哋）拎晒架撐！」
林：「攞咩架撐？」
男子：「木棍同刀仔」
林：「刀仔添呀？」
男子：「木刀嚟嘅」
林：「木刀即係點呀？」
林表示，他聽聞有木刀後開始緊張及擔心，「唔係我初頭認知嘅藤條咁簡單，如果係刀，係非常危險嘅狀況。」之後林呼籲：「大家唔好自己出站先，因為出面仲有好多黑社會喺度。」他之所以這樣說，是因最後掌握到的資訊提及白衣人在雞地集結。
林稱相信很多白衣人是黑社會 官：無證據，為何不說「白社會」？
陳官問，為何林起初一直說「白衣人」，後來卻改稱「黑社會」。林解釋，他相信有很多白衣人都是黑社會，「係咪全部我唔敢講，但係相當多係黑社會。」陳官質疑，既然林沒有證據對方是黑社會，為何不說「白社會」？林表示不解，最後陳官問：「你覺得白衣人等於黑社會？」，林強調是「相當多」。
林：並非叫市民與黑社會打架
林之後稱：「佢（警方）唔可以一路係咁㗎，如果唔係會打大交㗎！」他意指警方不能不驅散黑社會，否則他們會「猛咁打人」。陳官質疑雙方打鬥才算「打大交」，林重申自己並非想叫市民與黑社會打架，只是即場用字不會太精準。林續說：「嗰啲棍唔好𢭃佢先。」
林稱不同意市民叫「打柒佢」 因只想局勢緩和、安全回家
林表示，聽到有人說「打柒佢」，但自己沒有回應。他解釋不同意對方說法，「我想局勢緩和，大家安全返屋企；如果唔同意佢，同佢鬧交，更加無謂。」他希望警察處理黑社會後回復平靜，「3個一齊返屋企最開心囉，我係想咁咋嘛。」
林表示著市民放下木棍 認為屬證據待警調查
片段見林對市民說：「唔好攞，你擺⋯⋯擺返低（木棍）。」林表示當時自己緊張及惶恐，並相信是證據一部分，上面或有施襲者的指模或DNA，「我覺得係要畀警方調查㗎囉。」陳官質疑，林一方面說想待警察驅散後回家，另一方面卻收集證據。林強調兩者沒有矛盾，但首要目的是安全回家。
男子叫林找何君堯 林認為對方似煽風點火及挑戰
及後男子對林的對話如下：
男子：「何君堯同啲白衫影相，喺公園嗰度，你過唔過去呀？」
林：「何君堯⋯⋯」
男子：「你過唔過去呀，林卓廷？」
林：「過去呢，就準備打交」
男：「唔係打交，你同何君堯傾」
陳官問，為何林會說「過去呢，就準備打交」。林解釋是「警告佢」，他認為過去會導致「好嚴重衝突」，如果有人跟他出去打架會「好大件事」，自己同時擺出手勢著對方冷靜。林補充，該男子的態度似乎是「煽風點火」，「佢挑戰我敢唔敢過去，感覺到來者不善」，原因是有激進市民不支持民主黨而「見到我哋就鬧」。林認為對方說話不友善客氣，故判斷他並非支持自己。林又認為，該男子「係激烈嘅人」、「即係佢哋覺得自己好勇嘅人」，但自己卻不認同對方，因為其目的是想「降溫」，希望大家不要出站，待警方打擊黑社會。陳官質疑：「佢哋覺得自己好勇，你唔話『你咁勇你自己去』？」林略帶激動表示：「咁我咪多一條罪！煽惑佢喎我驚！」
林：擺停止手勢及叫白衣人「唔好郁手」
林補充，有一刻想過與何君堯傾談「有冇得諗呢」，若何認識白衣人，可以「去撳住佢哋囉」。但約10時48分閘外開始嘈吵，林回頭並站近閘機，他見閘外有數以十計的白衣人向其方向靠近，部分手持木棍，於是林擺出停止手勢，想叫「過緊嚟嘅白衣人唔好埋嚟」。林其後不斷叫：「唔好郁手呀！」他害怕白衣人真的動手打人。而前方一名男子不停罵林。
林：拉住身旁男子避免衝突
片段顯示，林再叫：「唔好郁手，企後少少，企後啲！」林解釋當時所勸身邊的「大隻男」站後些，亦有用手捉住其右臂。因他感覺對方與白衣人開始有言語衝突，若然白衣人襲擊他及閘內人，會導致危險及受傷，「我唔想衝突開始，一開始就好難搞㗎喇。」林又稱：「黑社會真係惡呀！影住佢啲樣，全部影住佢啲樣！」
7名被告均否認暴動罪，包括：時任立法會議員林卓廷（43歲）、庾家豪（35歲）、陳永晞（37歲）、葉鑫昇（31歲）、鄺浩林（26歲）、尹仲明（48歲）及楊朗（26歲）。
案件編號：DCCC 1106/2020、1132/2022（已合併）
相關報導：
審訊第24日
林卓廷稱事前不信會在西鐵站公然打人：係香港歷史上前所未見
審訊第23日
林卓廷稱被告知「鄉頭吹大雞」及「有劇本」：穿黑衫挑釁就「藤條fit兩吓」
林卓廷稱往元朗站「畀壓力」及監察警方行動 警長曾告知「一直有便衣睇住」