（獨媒報導）譽宴集團為配合政府的「疫苗氣泡」措施，早前發通告要求所有員工接種疫苗。飲食及酒店業職工總會今午到位於觀塘的「譽宴．星海」分店抗議，斥集團不顧員工安全，強迫接種疫苗。酒樓經理葉先生驅趕工會成員，期間多次口角。葉稱「我哋全部自願（打針）嘅」，又稱「為國家、為香港、為自己飯碗、為老闆，有乜問題？」
譽宴集團早前發出內部通告，要求全體員工在本月26日前接種第一劑疫苗，否則自29日起會被停工。通告指，若員工因健康理由不宜接種，必須提交醫生證明信。集團主席張家豪接受電台訪問時，稱「停工」是「用住先」的字眼，又指會派發1,000元奬金予已接種的員工。
飲食及酒店業職工總會幹事何鴻興（右一）
工會憂開壞先例 蒙兆達：致疫苗歧視
工會今午12時在鱷魚恤中心門外集結，幹事何鴻興帶領叫「返工唔應搵命搏，還我疫苗選擇權」等口號。他不滿譽宴罔顧年老員工的安全，又質疑若員工接種後出現不良反應，集團會否視作工傷而賠償。他擔心譽宴開壞先例，要求交代將如何處置拒絕接種的員工。
職工盟總幹事蒙兆達明言今日是來找譽宴「算帳」，不滿張家豪指「停工」是「用住先」的字眼，「你用住先用咗好多日啦喎」，又質疑張曾說的「九成員工願接種」的真確性，促請集團承諾不會解僱拒打疫苗的員工。對於張指員工可交醫生紙拒絕接種，蒙指醫生只會陳述風險，鮮少明確反對，斥張強人所難。
蒙又將矛頭指向政府，指「疫苗氣泡」是赤裸裸的「谷人打針」。他強調「今日受害嘅係工人，但嚟緊受害嘅可能係每一個市民」，擔心社會形成「疫苗歧視」，「唔打疫苗嘅人冇工開、唔可以去食肆食飯」。
職工盟總幹事蒙兆達
經理：冇工開，係咪你養我全家？
工會成員其後拉起橫額前往分店正門示威，於接待處遭身穿西裝的葉經理攔下。葉經理以「唔好阻住我做生意」為由，按住工會的橫額，被工會成員厲聲喝止：「唔好掂我哋啲嘢！」葉辯稱「我哋全部自願（打針）嘅，已經有七成人接種咗喇，包括我自己，仲有三成人有醫生紙！」他高呼接種是「為國家、為香港、為自己飯碗、為老闆，有乜問題？」
葉經理反問工會成員「我哋冇工開，係咪你養我全家呢？」，並稱「阻住我做生意，我而家係咪問你賠償？」他又質疑現場記者身份，「有冇TVB？有冇邊啲係有名嘅？」現場情況一度僵持，5名軍裝警員及1名督察到場戒備，酒樓內食客則照常用饍。
被指收獎金打針 經理：到時影張相畀你睇吓
蒙兆達要求集團交代拒打針員工會否被停工，稱「我哋好關心工人」，遭葉打斷「多謝關心我哋！」，又指「我打咗兩針啦！唔洗擔心！」蒙繼續要求集團解釋，葉經理則顯得不耐煩，指「點解政府淨係要求餐飲去打針啊？唔要求啲人搭巴士打針啊？」葉隨即被追問是否認同政府措施不恰當，惟他連忙稱自己支持政府。
葉經理多次呼召管理處驅趕工會成員，「走啦！走啦！你唔打（針）咩！」工會幹事陳子傑則回應「我哋有選擇權！唔係你公司迫嘅！」，又諷「你哋老細話，打咗疫苗有1,000蚊㗎」。葉經理直認不諱：「係㗎！會㗎！到時影張相畀你睇吓！」
何鴻興表示，工會已收到逾20宗員工被上司迫打疫苗的求助。他勸籲工人不要輕易屈從，亦不要自行辭職，並致電工會熱線9108 1499舉報無良僱主，工會將製作黑名單，呼籲市民杯葛相關商店。