自願離境聲明
問︰離境原因
答︰我係停車場大廈，本身喺油麻地住得好哋哋，但有條「中九龍幹線」話自己咩咩咩可以連接西九龍同啟德，又可以紓緩中九龍交通，而我就阻住佢走線，喂喂喂叫我企開啲啦！噉我咪移民囉。
問︰出生日期？身高體重？有無從小分裂社區，危害大家安全？
答︰一九七零年出世，出世時得一幢北期大樓，高九層，到一九七七年，擴建埋南期，兩幢都高十一層。講真，油麻地真係多得我唔少囉，唔係我頂住條天橋，邊得嚟咁多車日以繼夜以繼日以繼夜來來回回呀？唔係我，邊有咁多車位空出嚟呀？唔係我，街坊邊有圖書館打躉，學生邊有自修室溫書，點樣溝仔溝女呀？分裂社區？促進社區和諧就有我份！
問︰有無從小分裂社區，危害大家安全？
答︰乜咁煩架……都話無……
問︰有無從小分裂社區，危害大家安全？
答︰……問完又問……我估你都係想將啲人吸毒入我數架啦。係係係，有人喺我幢樓hi嘢食白粉，仲有人自殺添，但呢啲唔係我想個喎。社區設施就係畀街坊出出入入架啦，唔應該玩歧視玩標籤，唔通要趕佢哋出社區？
問︰喺原居地有咩政治／人脈聯繫？會唔會繼續聯絡？
答︰有好多老友。樓下廟街檔檔睇相我都識，隔籬榕樹頭位位歌王歌后，次次落場都會叫我點歌，玉器市場同煲仔飯大排檔啲哥哥姐姐我又熟，個個油麻地街坊都係我啲friend，認真寫三日都寫唔完喎。
繼續聯絡？我都想呀，但今日油麻地，明日大嶼山，到時老嘅老，走嘅走，舊事物一一被取代，都唔知有無人記得我喇！話就話舊嘅唔去，新嘅唔嚟，但新舊唔可以並存嘅咩？
（此聲明屬自願性質，本局承諾絕不政治審查申請人。）