油麻地，香港著名嘅舊區，大多數人會覺得呢喥「龍蛇混雜」，而地道嘅社區人，又會點睇呢喥呢？
「唔好意思，聽日訪問都係用返視像啦，要打點聽晚出隊送飯盒，都係唔方便出嚟喇。」
電話另一邊，係一把又渾厚又溫柔又熱情嘅聲音。
佢，人稱Allen Sir，每日就孭住背囊，喺油麻地同佐敦嘅橫街窄巷穿梭，會分享食物畀老友記，會陪街坊睇醫生，又會幫無家者申請上樓。
「以前喺教會服侍，只係照顧到特定群體，但越喺油麻地左右奔走，就越見到呢喥有好多人有需要，又有好多人被忽略……」
Allen Sir一九年開始，真正走入油麻地，同一大班志同道合嘅朋友，組建「油踐入心」，希望可以不受限制噉連繫社區嘅人脈，同弱勢嘅人一齊行。
「我哋做嘅都好簡單，見到有人喺公園露宿，喺麥當勞過夜，就走埋去認識佢哋，傾吓計，聽吓佢哋嘅故事。行啲講句，的確聽到好多人情冷暖。而且同好多人傾得耐咗，自然會睇到呢喥形形色色嘅問題。簡單嚟講︰個區要啲乜，我哋就做啲乜。」
一入夜，公園、隧道同橋底都會見到佢哋嘅身影。
「有次幫手推部車仔去回收中心，成車都係紙皮，雖然未至於被人歧視，但大概個個都見怪不怪，唔會有絲毫異樣。始終呢個就係香港，太多太多社會問題，窮人周街都係，幫得一個都幫唔到十個。最窮嘅瞓都無地方瞓，就算肯做肯捱，但年紀大學歷低，唔係外判清潔就係大廈保安，人工出半斤，責任就足十六兩，乜都關你事，要炒又炒你先，咪就係香港地囉。」
「初頭帶住好多期望，無論係無家者、獨居老人、長期病患，都希望幫佢哋搵到問題癥結，對症下藥去解決。後來慢慢發現，人同人之間嘅隔閡唔係咁容易消除，信任亦都唔係咁容易建立。記得跟過一啲無家者，由瞓街去到幫佢哋上樓，佢哋仍然都會同我哋保持好遠距離，大家只係無咁陌生嘅陌生人。」
「我好想佢哋生活有改變，生命更有目標方向，但反應又唔一定係噉，我只能盡力提供一啲相對實在嘅幫助，但佢哋點諗，恐懼啲乜，執著啲乜，外人往往唔知道。」
好多人都以為Allen Sir做緊啲咁有意義嘅嘢，佢自己都一定樂觀積極，希望在心間。無奈實情係越做得多，失望沮喪苦澀，反而就越多。
「美都餐廳附近有三個露宿者佔領咗人哋後巷，一直被業主立案法團投訴，但一直唔肯搬。我哋接觸佢哋無幾耐就遇到寒流同疫症，後來其中兩位過咗身，剩返一個成日話好快輪到佢……我哋真係無諗過，會咁輕易面對到「死亡」。執遺物嗰陣，感受到裏面有好多苦澀，要慢慢去消化……」
「嚟近油麻地有大變，大興土木，希望點變都好，唔會太妨礙到街坊。如果社區有更多友善設施，例如梳洗嘅地方，或者環保回收中心，相信可以裨益到更多人。」
「當然呢喥仍然會有好多地區問題︰多窮人，個個公園都有無家者，條條街都見到人執紙皮，好多獨居老人身兼長期病患，外判清潔工日做夜做，好多小朋友缺乏照顧，近佐敦一帶好多少數族裔，好難融入香港。但同時呢喥又好精彩，生活模式豐富，如果將多啲良好嘅文化帶入嚟， 可以有好多轉變。」
或者同Allen Sir一樣，好多人都試過付出，但付出以後，無奈發現世界原來不像我預期……但希望各位好似Alan Sir一樣，就算會灰心會失意，仍然願意踏出一步兩步，由踐行到入心，以行動思考個人同社會嘅關係。
＊＊＊＊＊
關於「油踐入心」
大家可以喺Facebook 搜尋「油踐入心 Praxis」，了解佢哋更多，甚至可以inbox應徵做義工！