前排本研研究員發現荔枝窩村口嘅告示牌，變成一部發光LED mon，連同另外三部於其他郊野公園嘅相同設施，盛惠92萬。花近百萬【註1】，以為有咩超卓功能，例如會閃出金光，但原來只係播天氣同宣傳短片 ，淪為「廢mon」，連原有指示牌實用、遊人必須嘅嘅荔枝窩村地圖都拆埋。
漁護署辯護話，LED mon 可以提供即時資訊例如突變天氣，令行山人士可以更改路線，仲好醒咁話過咗6點後會熄螢幕【註2】，唔會有光害咁話喎（行夜山就無突變天氣？其實天文台app 亦有特別天氣告示，荔枝窩亦收到電話訊號，同樣資訊電話都睇到）。
行山人士一片負評，其實唔係無原因。係郊外地方豎立傳意牌同告示板，其實係一門學問，告示板設計有嚴謹準則，而呢幾部價值百萬嘅發光LED電視簡直係攞零分。
郊野告示牌哲學(The philosophy of the display of signs in the Countryside)
一份有關郊野公園策劃嘅港英解密文件表明【註3】，所有告示板都屬城市入侵物（urban intrusion），所以豎立告示牌時必須謹慎，可免則免（kept to a minimum），所以郊野公園設施大多都會運用天然簡樸嘅風格，提供少而精嘅資訊之餘又會同環境融為一體。故此郊野公園告示牌需要有效、不突兀同點到即止（effective, discreet and adequate for their purpose）。
幾乎違反所有郊野指示牌設計原則
而呢個郊野廢mon，幾乎犯晒所有郊野公園指示牌設計嘅天條：
天條一：唔好廢（no real function）
要避免一啲無聊或無意義（no real function）嘅告示。文件特別指出，好多警告類告示，其實都無實際功用（many cautionary signs come into this category）。突變天氣資料屬警告類資訊，但呢項資訊手機都睇到，甚至你事先已經feel 到天氣將變，為提供天氣資料而整個發光螢幕係一個固定位置，絕對係無聊。
天條二：唔好無效（ineffective）
郊遊前要做足準備，包括check 天氣，呢樣嘢政府宣傳片都有講。而家放個LED mon 出來，如此「貼心」，即係鼓勵人出門前唔使做準備。天有不測之風雲，而且隔咗座山，局部地區天氣都可以好唔同，係萬變嘅情況下，一部價值$2,300、可以便攜嘅手提電話有用啲，定抑或固定係村口、價值$23萬嘅LED mon 更有效？
天條三：唔好核突、低俗（ugly and vulgar）
文件提及，隨著郊野公園設施日漸豐富，告示牌亦會越來越多，但必須理性規劃，否則結果必然係混亂，會出現無效、核突、低俗嘅告示（unless this is done in a rational way the result maybe chaotic and the environment may be affronted by signs which are ineffective, vulgar and ugly）。
根據守則，告示連形狀、顏色都要小心考慮（signs should be discreet with care and used with discretion），但現今政府竟然將一座發光發聲嘅LED mon 放喺寧靜郊野，呢種一啲心思都無嘅粗放式發展，同周遭環境不匹配，但又無考慮過郊遊人士嘅切實需要，以為有光有聲又”high-tech” 就係好，既核突又低俗。
天條四：唔需要經常維修
文件又提及，一件好嘅郊外設施應只需要最少嘅維修（should require a minimum of maintenance）。LED mon 本身就屬室內設施，放喺郊外日曬雨淋，除咗要諗防水、仲要諗日夜溫差大對零件嘅損耗，維修費必然高。漁護署交代每個螢幕$23萬成本時，亦指明當中只包括3年保養期，可能連製造商都知道呢個LED mon 命不久矣，3年之內會打柴。
郊野公園新揸fit 人－旅遊事務署
無論從功能到設計，都睇得出呢啲新嘅又廢又突兀嘅設施唔係為行山客，而係為咗迎接「鴨仔團」之類mass tourism而設，繼而不加思索，係郊外地方硬插呢啲又大又閃，破壞郊野嘅原汁原味嘅設施。
而且螢光幕已顯示埋商務及經濟發展局轄下嘅旅遊事務署嘅logo，顯示郊野公園揸fit 人已換人，亦證明政府已經套用旅遊概念，而非 #保育為先 嘅諗法去發展呢啲突兀設施（不斷設立呢啲大大舊閃光設施本身亦未必係一種好嘅旅遊概念），所以出現郊野巨mon、龍脊嘅「龍爪」、升級豪華營地、樹頂歷奇等入侵性設施，將為郊野公園帶來一場浩劫。
可幸嘅係，漁護署話呢啲設施都係「試行」，所以大家識做啦～
延伸閱讀：
【 #搞乜郊野 】郊公主題樂園狂想曲：
【註1】明報 2021年4月6日 漁護署郊野公園設4電子顯示屏 每個23萬元被批「小白象」
【註2】郊野公園教育活動計劃 Country Parks Education Programmes 【郊野公園有個Mon】
【註3】Notice and Signs in the Countryside, in HKRS287-1-806-1 The Use and Conservation of the Countryside Advisory Committee for New Territories, Hong Kong Public Records Office