有睇新一期《馬聞》嘅讀者，應該都留意到我哋喺下期出版後就會停刊半年，希望喺內部重組之後，可以用更好嘅面貌去繼續報道馬鞍山事。
而唔出版報紙嘅《馬聞》，係咪會就咁消失半年呢？當然唔係！我哋會繼續做網上報道之餘，亦都會舉辦唔同社區活動同街坊交流，而「馬鞍山散步團」就係其中一個啦。編輯部喺復活節期間，分別舉辦咗兩場散步團，主題係「假如你聽日就要離開馬鞍山唔可以再返嚟，你會帶走啲咩？」
今次我哋邀請咗六位街坊一齊參加，用散步嘅形式，去行大家想帶走回憶嘅地方，同時用照片紀錄低嗰件物件或者事情。第一日我哋由海柏花園開始行，上返商場逗留咗一陣，之後經馬鞍山公園去海濱長廊往恆安方向散步。然之後我哋再走咗入去馬鞍山遊樂場行一圈，最後係耀安解散。
揀海柏花園巴士站做起點，因為兩年前《馬聞》創刊號係喺呢個地點開始派發，係各個成員開始再認識、關心社區嘅一個里程碑。
街坊Alison表示，佢最想帶走嘅就係馬鞍山廣場嘅旋轉木馬。Alison回想細細個嗰陣，佢曾經試過因為想坐旋轉木馬，所以扭計要家人買飛畀佢玩。唔同而家逢星期六、日，街坊可以排隊拎飛騎馬仔，以前想玩木馬係要消費到某個金額先可以換一張飛。感受到家人嘅寵愛，加上兒時喺旋轉木馬留低各種美好嘅回憶，所以Alison想帶呢度走。
而街坊Yoyo就想帶走馬鞍山海濱長廊嘅回憶。成個學生時代都係喺馬鞍山渡過嘅Yoyo，放咗學之後會自己嚟跑步、望海，或者會約朋友坐喺海濱長廊吹水、飲珍珠奶茶。帶走海濱長廊對Yoyo嚟講，就好似帶走佢浪漫嘅青春。
至於街坊阿雞，就喺《馬聞》歷年拍攝嘅圖輯當中，揀咗想帶走反送中運動期間，鞍誠街花園天橋貼滿咗memo紙嘅呢段時期。阿雞覺得真真正正感受到馬鞍山街坊嘅團結同人情味，就係喺呢條天橋築起「連儂牆」嘅時候：「喺呢個成日會經過嘅空間，冇諗過可以凝聚到一班街坊，雖然大家互不相識，但係都會駐足表達己見、互相關心。其實成件事好溫暖，住咗咁多年先發現馬鞍山咁有人情味嘅一面。」
編輯部成員「鹿鞍山堅微妙」就想帶走馬鞍山礦場嘅歷史印記，所以揀咗《礦山記憶：鐵，不一般的故事》呢本書拎走。馬鞍山礦場曾經聚集咗嚟自五湖四海嘅礦工，佢哋都係馬鞍山好辛苦咁做嘢，共同建構出馬鞍山雛形。而本書就用咗好多口述歷史嘅角度去記載同埋訪問咗好多礦工。所以「鹿鞍山堅微妙」就想帶走馬鞍山珍貴嘅歷史，日後喺異地再細味。
第二日，另一批街坊就由馬鞍山公園慢慢散步行去恆安邨。街坊Anna想帶走喺馬鞍山渡過嘅童年，而佢細細個成日去玩嘅地方，就係馬鞍山公園。近公園辦事處附近呢個草地嘅位置，以前有唔同機構會喺呢度舉辦嘉年華。成日都蒲馬鞍山公園嘅Anna，好記得當年有機構會準備定一啲紙皮，砌條瀡滑梯出嚟畀啲小朋友玩。不過而家假日嘅馬鞍山公園，就只係見到大大小小嘅帳篷。
街坊Frankie就想帶走馬鞍山公園近海濱長廊呢一個角落。雖然睇落好似平平無奇，但係佢由學生時期至到出咗嚟做嘢之後，都會成日嚟呢啲櫈度坐低，思考下人生。依家諗返轉頭，其實呢一個角落都陪伴咗Frankie經歷過唔同人生階段嘅高低起伏。
街坊高佬就話，其實佢唔係一出世就喺馬鞍山住，係喺之後先再搬入嚟嘅。高佬好鍾意馬鞍山嘅寧靜：「除咗商場，馬鞍山其他地方都好安靜，可以畀自己靜落嚟。」恆安邨亦都係其中一個佢好鍾意嘅屋村。如果佢會離開馬鞍山去其他區住嘅話，就會帶走馬鞍山嘅寧靜。至於如果係移民，高佬就話會帶走佢個肉身，留低個精神係馬鞍山傳畀其他人。
編輯部成員鈞然就影低咗出去馬鞍山必經嘅繞道之前，望到嘅嗰個馬鞍「山」。每日為生活奔波勞碌、出出入入馬鞍山，其實成日都覺得每晚好似只係返酒店瞓咁。但係每次經過呢個位嗰陣，都好有返到「家」嘅感覺，所以想將屋企帶走。
另一位編輯部成員Michael，就唔覺得佢會帶走任何嘢：「我離去，並唔會帶走所有嘢。」Michael認為佢對「離開馬鞍山唔可以再返嚟」嘅理解，一個係身體上嘅離去，可能係移民；一個係精神上嘅離去，即係死亡。
Michael續稱，無論係身體上嘅離去，定係精神上嘅離去，「人、物、事呢啲嘢我哋係帶唔走嘅。」因為呢啲事情都會隨住時間一一消逝。但佢相信唯獨能夠帶走嘅嘢，係人與人之間嘅幫助同愛，呢啲情感、美好嘅事物，係佢希望可以帶得走嘅嘢。
總括嚟講，其實街坊都好鍾意馬鞍山呢一個背山望海、環境清幽，又帶畀佢哋好多回憶嘅地方。唔知各位讀者，假如你聽日就要離開馬鞍山唔可以再返嚟，你又會帶走啲咩呢？