（獨媒報導）宣佈與關注囚權組織石牆花合作，將運作一年的手足計劃升級為「物資支援中心」後， Jimmy Jungle 的知名度增加不少。店主 Michael 和阿希覺得，這要多得近日媒體和大眾對囚權的關注，因為本來只有年輕一群中較「黃」的人，才會認識這家由四名「痴線 90 後」創立的零食網店——即使他們是全香港最早提出要支援在囚手足買日用品、並將理念化為實際行動的人。
如今回想一年前的情況， Michael 仍覺得不可思議：「我都唔明點解冇人諗到，點解冇人做，明明咁多人入咗去（監獄）。直到 Jimmy Jungle 開始做，大家先開始一齊做。」
但這也是 Jimmy Jungle 想做到的效果：努力發掘一些創新、微小卻有意義的東西，再吸引大家跟隨和擴展空間。雖已將物資支援的大部分工序交予石牆花， Jimmy Jungle 表明未來會繼續以自己的方法，推動囚權議題和支援方式：「我改變唔到人大釋法，但可以改變到人如何去睇件事情，睇嘅角度唔同，事情都會唔同咗。如果更多人同我一樣，至少會有一班同路人去做到一啲嘢。」
＊ ＊ ＊
一年前創「手足計劃」 為家屬搜羅可入獄物資
手足計劃的起因，是 Michael 的朋友被捕。去年初， Michael 從朋友的家人得知，購買零食和日用品予在囚人士有一定困難，因部分懲教署指定可以進入監獄的物品款式，未必能在一般超市買到。於是 Michael 以 Jimmy Jungle 的名義聯絡供應商，購入零食後，再以成本價賣予在囚者的家屬。
不過對在囚者而言，零食始終不是必需品。相比之下，毛巾、牙膏、洗頭水等日用品更重要。於是，Jimmy Jungle 四名店主跑遍港九新界的藥房，為家屬搜購指定款式的日用品後，連同零食執拾成一袋袋的「物資包」，免費送給他們，並將此命名為「手足計劃」。
再後來，還柙和被判入獄的抗爭者不斷增加，Jimmy Jungle 的貨倉空間不大，難以應付突如其來的龐大物資需求，索性於今年 2 月與石牆花合作成立「物資支援中心」。Jimmy Jungle 購入物資後，會全數放置在石牆花的辦公室，讓家屬在有需要時可較快取得。
石牆花辦公室內的「物資支援中心」，放滿各式懲教署指定可入獄的物資。
開創囚權空間 盼大眾認識私飯、讓寫信成為潮流
「囚權方面，只要做到少少突破，已經可以有好大效果。」這是 Michael 這年來最深刻的感受。去年，Jimmy Jungle 曾推出「和你送零食」活動，在去信獄中抗爭者時，在信中附上心意卡及回條，讓對方在回條填寫想送甚麼零食給家人，再由 Jimmy Jungle 代為將零食及心意卡送出。後來，這個計劃演變成「和你送花」，由花藝師小葉替在囚者免費送花給親友和情人，並運作至今：「其實唔係咩驚天動地嘅 idea，入回條係一樣好白痴、好 straight forward 嘅嘢嚟，但你做咗出嚟，感覺可以好好，效果可以好大。」
因此 Michael 希望，Jimmy Jungle 可以繼續發掘這些微小的事情，並吸引大家跟隨：「我哋行咗一步、開創空間之後，大家可以去跟隨同埋再擴展。」對他而言，在牆外的世界影響更多人去關注囚權，提供更好的支援，是 Jimmy Jungle 的重要崗位。例如，當大眾拼命尋找那包 40 克 M&M 朱古力時，他反倒在社交平台上發起「寫信 challenge」，又積極搜集關於監房膳食的資料，打算日後多點透過文宣，讓大眾了解「私飯」的重要性。
監房膳食因欠缺調味，出了名難以入口，在囚者往往會靠零食製作「監房料理」，或者訂購「私飯」。「私飯」即由持合法牌照食物供應商提供的私人膳食，不過只有未被定罪的還押人士可以訂購，而且價格高昂，如羅湖懲教所一個的月私飯索價 1.2 萬元，非人人能負擔。
Michael 覺得，對在囚者而言，信件和私飯明明比零食重要得多，卻沒太多人關注：「信冇得用錢解決，要個人有心去寫才做到。而還柙期間佢哋需要嘅，其實唔係嗰包 M&M 朱古力，當手足有私飯嘅時候，其實佢哋唔食零食都得。」
他希望日後多點透過文宣，讓大眾了解私飯的重要性，協助支援高昂的私飯費用，又希望帶起「寫信師」的潮流：「每個人都有自己嘅工作，你想畀錢咪畀錢，你想寫信嘅就寫信，但我哋希望人人都寫信。」
想過放棄 Jimmy Jungle 但沒想過放棄手足計劃
無論是推動囚權方面，抑或做生意方面， Jimmy Jungle 四名店主都是毫無經驗的素人。四人本身各有正職，去年年初之所以創業，不過是因為街頭抗爭減退，思考過自己可以做甚麼後，才決定開店，招聘同路人、做文宣、提倡囚權，以另一種方法出一分力。
不過由於毫無經驗，Michael 承認他們不太懂得管理生意：「例如同事之間有個人好 hea 嘅，我哋鬼識解決咩，我哋本身就係 hea 嗰啲人嚟㗎嘛！大佬宜家有人做咗我個角色，應該點樣處置？」此外，由於 Jimmy Jungle 免運費的門檻較低，零食的利潤亦不高，花上許多時間和心機：「但一張單只係賺幾十蚊。」
「好老實咁講，花咁多時間但冇錢收，個感覺點都係唔好。」開業一年多，四人還未出過糧給自己。他們想過放棄：「講真，我哋擺多時間落去，請手足、做文宣、捐錢，容我張狂咁講，我哋基本上任何一點都做足一間黃店可以做到嘅 standard。假設一間咁嘅黃店係生存唔到，就代表呢個方法真係唔 work。而呢個方法唔 work 時，就唯有摺咗佢。」
最後為何沒有放棄？阿希答得老實：「因為已經簽咗一年死約（倉約）……」但當然，手足計劃也是考慮因素之一：「當時真係未有人做物資支援，如果 Jimmy Jungle 執咗，家屬要自己外出四圍頻撲。我哋唔忍心見到呢樣嘢。」
Michael 直言，一直對手足計劃充滿自信，因可以以最少的資源（成本價格），讓獄中抗爭者得到最多物資：「如果以收集形式（得到物資），等同畀街邊的士多、藥房賺錢。」因為，他們從沒想過要放棄做物資支援：「冇諗咁多，真係每一袋嘢都畀到人，好似冇乜問題吖。係到 Poly 嗰排（編按：指早前大批抗爭者突然因「理大圍城」暴動案，被落案起訴，須即時還柙），就真係覺得（物資供不應求的情況）太誇張啦……都唔係灰心，總之就係有問題咪解決囉。」
改變不了世界 也不要被世界改變
有因為現實環境而灰心過嗎？我問得直接，Michael 不住衝口而出：「哇，成日㗎喎屌！」阿希則說覺得還好，因為自己早有心理準備，香港只會變得越來越差：「睇新聞時我會覺得好撚離譜，但唔會話好唔開心。我揀咗留喺度（香港），心入面就有最壞打算，就係呢度會同大陸一撚樣。」
「同埋我成日都唔知點講呢件事，就係世界越黑暗，能力越細嘅人先要越光越亮。係咪好膠？但我真係咁諗。」對阿希而言，營運 Jimmy Jungle 讓他覺得自己做了些有用的事，某程度上為他帶來了自我安慰和滿足感：「我哋始終都係平凡嘅人，無辦法改變成個世界或者社會，但喺呢個情況下都要繼續做，行為要對得住自己，唔好因爲改變唔到啲咩，就唔去做囉。」
Michael 的想法也類似：「我改變唔到人大釋法，但可以改變到人如何去睇件事情，睇嘅角度唔同，事情都會唔同咗。如果更多人同我一樣，至少會有一班同路人去做到一啲嘢。」他唯一擔心的，是 Jimmy Jungle 某日會在不知情下踩中紅線，遭受不合理的打壓或被捕：「唔應該為咗做一間黃店而有任何（被捕）風險，唔值得。」
記者：梁皓兒