（獨媒報導）經常於抗爭現場出現、曾遭內地扣留的王婆婆王鳳瑤，涉2019年初於高等法院外推撞一名女保安，被控一項「普通襲擊」罪，原定今（25日）於東區裁判法院開審。王婆婆選擇自辯，卻未有時間及器材閱覽所有控方文件及光碟，裁判官鄭紀航應她的要求將審訊押後。王婆婆庭上透露，控方文件有多處以黑色筆遮蓋，又投訴警方曾不當對待她，致使她兩度入院。她又提到，不想找律師是因為「知道佢哋好忙，有好多手足好慘，我唔想阻佢哋時間」，而自己為了應訊，「已經好勤力溫書，咪法律、咪文件」。由於王婆婆遲遲未能決定好是否找尋當值律師，她在排期審訊時，一度遭主任裁判官羅德泉怒斥「浪費時間」、「到此為止，忍耐都有底線」。王婆婆最終決定作「公民抗命」，「唔認罪、唔請律師、唔自辯、唔求情」，案件押後至5月11日開審。
被告王鳳瑤（64歲）被控一項「普通襲擊」罪，指她於去年1月20日，在高等法院大樓地下大堂襲擊胡婉鴻。
王婆婆需時看畢控方文件及光碟 申請押後
王婆婆開庭時向裁判官鄭紀航確認，今日沒有律師代表，將會自辯。惟她表示，並未準備好開審，因控方昨天提交了新文件，而她亦未有時間和器材閱覽所有文件及案發片段的光碟。鄭官僅表示：「控方責任只係畀文件你，你自己要去張羅。」
其後就律師代表的問題，鄭官提醒王，若選擇自辯需熟習法律，並提議王可使用裁判法院的當值律師服務。王說，曾嘗試找當值律師，「但要排期，最少一個月前，我唔夠時間」。鄭官即質疑，王上次提訊是2月8日，應有足夠時間。王回應：「我太過自信以為自己可以搞掂，點知好頭痛。」又指自己資產都在內地，沒有錢。
鄭官隨即提高聲線說：「以我理解，正正係你冇錢，當值律師更加會提供服務畀你喎！」王再表示，她要返大陸才能證明自己資產，但保釋條件不容許，而且「就算比我返我都唔夠膽」。
鄭官最後再向王說：「請唔請律師都係你要處理嘅事，我唔可以幫你，正如我唔可以落手落腳幫控方。」
鄭官再向王確認是否延期開審，王先澄清，上次提堂其實沒有決定好認罪與否，乃主任裁判官錢禮為她決定不認罪。她又指，「件案兩年幾前，我記唔起好多嘢，筆記又喺大陸比國安收咗睇唔到，要睇晒啲光碟先知認唔認罪」。
投訴警方偏幫法院保安、拘捕後粗暴對待致使入院兩次
王其後提起，「法官閣下，我成日覺得警方有好多嘢會偏幫高等法院的保安，希望有個獨立調查委員會。」鄭官回應：「你所問非人啦，呢個我唔可以協助得到你」。
王又說起有案中案的問題，鄭官隨即打斷道：「你都知道好多嘢喎，又話冇睇文件，而家又知咁多，你係咪睇晒㗎？你好熟習案情啦啵！」王說，「我係好快?過晒，50幾頁」，鄭官即說：「咁係咪可以開審啦？」王再回應：「我仲有好多嘢需要自己辯護⋯⋯我自己知道自己係完全冇做過。」
王繼而說起「案中案」問題，指自己去年11月被捕時，「警方失當令我兩次入院，血壓好高，高到200幾度，又冇足夠水飲」。鄭官指，案發於2019年，但王的投訴是在2020年，「同本案有咩關係？」並指如她認為警方有不當行為，可以去投訴。
王說已經投訴過，但警方以案件進入法庭程序為由暫時停止調查，鄭官指「咁你想我點？」王再說起，「而家警方有好多不當行為」，鄭官再打斷說：「你鍾意講晒冇人阻到你，但一般辯方唔會咁早開晒牌比對方睇晒」。
指控方文件多處遭遮蓋 不想請律師因「好多手足好慘、律師好忙」
王再提出，控方給予的文件中有多處以黑色箱頭筆遮掉，無法看到所有資料。控方指只是遮蓋需要保密的個人資料，但王指「成個行動嘅程序都刪埋」，控方否認。
王其後展示該些文件，鄭官表示一般而言辯方不會希望法庭看到該些文件，又解釋可能有部分資料基於公眾利益豁免披露，需要由辯方律師要求控方披露。他再次建議王找專業的律師團隊幫忙。
王回應：「其實有好多律師想幫我，但我知道佢哋好忙好忙，有好多手足好慘，我唔想阻佢哋時間。」鄭官強調：「佢都伸出援手，係你拒絕佢。呢個最終都係你嘅決定。」
鄭官最終表示，由於王是第一次申請押後，控方亦沒有反對，「今日我唔想同你爭拗啦」，故決定押後開審日期，着王到第一庭處理。王並特別提出，因為「精神支持唔到」，希望每天最多進行半天的審訊。
要求押後3個月、未決定是否找當值律師 官怒斥「浪費時間」
王婆婆其後轉到第一庭，由主任裁判官羅德泉負責處理。她向羅官解釋，1月已收到控方文件，但昨日再多收到幾張文件，沒有時間閱畢。
羅官建議她可尋找當值律師，王說自己資產不符合要求，羅官即解釋，就其所知，當值律師服務只計算收入，不計算資產，「你有心去搵就查清楚，唔好估人哋點樣」。
王又小聲說，自己身體不好，「我已經好勤力溫書，咪法律、咪文件，但成日都唔記得嘢」，希望押後3個月。
羅官不耐煩地質疑：「1月收到文件，點解要3個月咁耐？」，又說「你記憶衰退，唔會3個月後就記憶好返，我諗個個人有常識都知」。
王再稱沒有足夠時間，羅官打斷她，提高聲線說：「足夠時間係講緊合理的足夠時間，如果有人要1年、10年去睇，我諗唔係合理足夠時間」，並厲聲說：「我講得好清楚，每個人都要秉公辦理」。
羅官多次詢問王找當值律師的意願，王沒有正面回應，並說「法官閣下，你容許我講一樣嘢」，繼而指出被捕時要求看律師名冊，發現很多律師的辦事處都在中國大陸，「我好擔心啲當值律師，我唔識佢哋」。
此時羅官大聲斥：「我唔想再浪費時間！我係用『浪費』呢個字去形容。我話畀你聽，如果有興趣（找當值律師），你問咗人哋先啦，問都唔問就自己喺度想像。」王欲再說話，羅官即打斷：「我話畀你聽我夠啦！到此為止啦今日，忍耐嘅話係有底線。我唔係同你講笑，我好嚴肅。」
王再猶豫要否找當值律師，羅官終指：「你望吓後面仲有好多人，既然你咁多嘢諗，我將件案擺到最尾處理，因為我連你點諗都唔知」，話畢有人拍手。
午後表明「公民抗命」 不認罪、不聘律師、不求情
案件押後至下午再排期審訊，王婆婆離開法庭時揮動英國旗，表示「今日特登帶埋嚟，因為唔知之後仲有冇得揈」。她又說，自己會「公民抗命」，「唔搵律師、唔求情」，亦不會找裁判官建議的「官派律師」（當值律師），「反正我坐監都冇咩嘢，佢哋明屈」。說起有很多義務律師願意幫助她，但她都拒絕，因為有很多手足更需要律師，王婆婆不禁落淚。
下午開庭後，羅官再次詢問王婆婆會否聘請律師。王表示，她決定「公民抗命」，「我唔會用律師、又唔會自辯、唔會認罪」，羅官指，她只有請律師或自辯兩種選項，王再說：「我兩樣都唔要，我要公民抗命」，羅官不耐煩稱：「呢個同公民抗命冇關係㗎」。
王續說：「我對法律真係唔太認識」，並補充說自己決定不會盤問控方證人，也不再考慮傳召辯方證人。羅官續問：「如果係咁，點解今日開唔成呢？」王回應道，她是午飯後「深思熟慮」有此決定。
羅官再向她確認，王在審訊中會保持緘默、不會傳召證人、也不會聘請律師，王此時稱「呢個唔係獨立調查」，羅官皺眉質問：「你講緊啲咩？你冇乜嘢啊嘛？點解會語無倫次呢？」
王後再強調：「我會百分百沉默。」羅官問她會否盤問證人，她輕聲說：「冇用㗎，我唔會，我係百分之百嘅公民抗命」，又表明自己「不求情」。
羅官最終決定將案件押後至5月11日開審，他提醒王，案件嚴重，而且已佔用法庭時間，要盡快處理，「凡一件事都會有完結的方式」。王此時說：「我都冇諗過兩年後啲警察會拉我」，羅官回應：「呢個係你同警方之間的事」，王再表示：「唔係㗎，佢哋屈我，我答咩都冇用」。羅官終指：「你自己鍾意點就點。」
案件編號：ESCC2490/2020