（左起）葉先生、Julia、黃小姐，分別住在各棟公務員樓，但皆視己為「美善同村」村民。第一代居民如葉先生，沿路皆能與鄰居閒話家常。
九龍城公務員合作社要解散，公務員樓重建，但樓內的人與情卻是一輩子的關係。在21世紀，過往公屋的鄰里關係寥寥可數、少之有少。退休公務員葉先生均住過私營屋苑、公屋和公務員合作社，他認為公屋的鄰里關係是最親密，但他指的「公屋鄰里關係」是他年少時的年代，要數現今的話，非公務員合作社莫屬，「公務員樓上樓下都係公務員，息息相關，大家都係有呼應，隔離左右好熟，私樓個個閂埋門係無得比。樓上樓下邊個有事，個個都會衝曬出嚟幫。」
葉先生舉例，「地下有個婆婆唔舒服，我哋都係會即刻去幫佢睇下佢咩事，幫佢叫救護車，通知佢返緊工嘅仔女，呢啲事普通私樓係唔會做到，因為個個都閂曬門。」
葉先生批評政府奪去他們親自設計興建的安樂窩。（照片由受訪者提供）
第二代合作社居民Cecilia憶述童年至今的鄰里關係，是今時今日難以想像的奢侈，「隔離鄰舍uncle、auntie會煮啲餸俾我哋食，例如，佢哋整咗嘢食就會敲門問我哋：『喂我煮咗咩呀，你落嚟拎啊』，試過食到雞、冬菇、燜鵝掌。」
她與合作社的第二代居民「由細識到大」，曾在6樓家中的露台擲下零食給對面5樓的鄰居分享，她亦對於這種鄰里關係感到自豪，「會同同學講自己屋企成棟樓嘅人都認識，呢一樣嘢依家唔會有人做得到。」她的父親李uncle亦慨嘆：「（合作社）呢種街坊模式搬咗去第二度唔會搵得返㗎喇。」
Cecilia不願家園重建，坦言不認為再遇到相近的面積與設計的單位。 （照片由受訪者提供）
葉先生以舊式唐樓作對比，「啲舊樓啲人係會一早就放曬啲垃圾喺樓梯，但係我哋就會喺收集垃圾時間就嚟到嘅時候先會放啲垃圾出嚟。」合作社的居民除了會互相幫助和疼惜家居，從前更會一起舉行「annual gathering」，如同春節聯歡會，後來第一代人年紀漸大，口味轉變，才沒有再舉行。
葉先生感慨重建後不捨街坊友誼，「當初建社一定係志同道合，大家同聲同氣一齊諗，先會一齊合作。（日後）走散咗就未必聯絡到，各散東西，依家我哋可以喺街朝見晚見，將來拆散呢幾百戶之後，我諗，東南西北架喇。」，「住合作社感情同關係，同其他屋苑完全兩回事，其他屋苑自己身份只係租客，又可以『轉工』。私樓好似件衫，唔鍾意咪換過件，可以隨時搬出去，可以賣咗佢；公務員合作社唔係，係一生一世。」
九龍城公務員樓群中，這是最受觸目，設計最典雅的「明星樓」， 葉先生亦是這裏的住客。
而黃小姐、Julia、Cecilia同屬第二代合作社居民。黃小姐指部分合作社年輕一代已經移民，剩下了獨居老人或雙老家庭，反而從中可見合作社與別不同的鄰里關係，「有個婆婆自己一個住，有一日心臟病發，第一件事唔係打999，而係拍隔離屋門幫手，樓上樓下聽到都會幫佢。去完醫院返嚟之後照顧都有啲困難，於是家家戶戶嘅屋主、外傭間唔中都會落去幫下佢，例如整藥、整嘢食，呢啲相信係私樓較為少見。」她又說，「有啲師奶整開糕點，就會成日互相交換糕點，春節食品都會交換。」
黃小姐擔心獨居老人重建後的生活，「有啲街坊會覺得死啦，無咗啲鄰居會點呢？因為（我）屋企樓下有個婆婆，同我媽媽係屬於同一間教會，婆婆90幾歲，好壯健，但係無仔女同佢一齊住。有日我湊我媽同個婆婆去教會，婆婆就話，死喇，第日拆散晒嘅話，邊個帶我同我一齊去教堂？」她續指，「林鄭有無諗過點樣去安置返呢啲人，婆婆剩低嘅日子已經唔多，連一個卑微嘅願望，每個禮拜同教友一齊去教會都未必做到。」
公務員樓環境好、面積大，居民卻不只是為了一個單位而留戀或爭取，鄰里關係更是花錢也買不到，亦是他們捨不得被奪去的「家產」。
本文為九龍城區議會贊助，社區新聞工作坊學員作品。