一年開頭，就以《多喝水》做開始。
鄭融上次出歌已經係19年嘅《13樓的大笨象》，由Howie@Dear Jane作曲，Wyman作詞，呢首歌為鄭融帶嚟四台冠軍歌，係繼06年《紅綠燈》後，第2次做到呢個創舉，可惜最後呢首歌年終只係喺新城頒獎禮得到歌曲獎。至於今次嘅《多喝水》，Wyman其實喺4月寫《哀的美敦書》同《乾爹》嘅同時已經寫完，不過點解咁遲先派台就不得而知。
諗起呢個歌名當然諗起鄭融另一首名作《健康教育》，「一天喝八杯水／但我這天看來／真的很快樂麼」，講嘅係即使讀幾多書、守幾多規矩、生活得幾健康都好，但感情從來都唔係咁易控制倒，因為中間有太多變數。
感覺上《13樓的大笨象》同《多喝水》係同類作品，除咗因為曲詞同樣係Howie@Dear Jane X Wyman嘅作品外，更加因為佢係透過唔同嘅「意象」去講感情世界嘅事。
《13樓的大笨象》，源自「Elephant in the room」，意指某些事物明顯但仍被視而不見，即使如大象般仍被刻意忽略。Wyman將呢個現象放喺感情上，「就是家中有匹象／大家都怕聲張／硬把安慰獎當 成大獎」，去講戀愛中嘅雙方有感情問題，卻不願去面對，而係選擇去逃避。
至於《多喝水》，我認為同上面嘅情況有少少似，都係因為一句說話衍生出一份歌詞。上年大家多咗講「見字飲水」，而且喺疫情下，健康問題被正視，變咗大家都講多咗飲水。
而呢首歌當然唔係想叫大家飲多啲水，從歌詞嘅開首已經見到，「狂流吧／汗和淚純屬水份／你是人／所以需要澎湃愛恨」，佢更多想講每個人都需要水份，同樣地每個人都有感情煩惱，都會有自己嘅情緒，如果我哋平日需要「見字飲水」，同樣我哋其實都需要正視自己嘅其他需要，包括情感同情緒上嘅支援以及需要。
之後我哋望下chorus——「強大先可以撐過去／還未醒請去潑冷水／全日都只喝眼淚／怎夠眼淚／汗顏才更累」，就會見到Wyman想提醒大家，即使有幾傷心幾疲累，都需要堅強；「長命先可以撐過去／痊癒中應該多喝水／還未結局／原地康復／誰話幸福那一天／回不去」，呢句就講得更白，提醒大家撐到最後，直至見到幸福嘅一日。
當然，Wyman點會只係講喺感情中遇到挫折嘅人要撐過去呢？正如《銀河修理員》除咗係首情歌外，更重要係「祝你在亂流下平安」、「形勢壞透只好對抗」，而《多喝水》你慢慢繼續睇歌詞，都會見到好多呢類tag。
「休息喝點水／再發力去追」、「生命以後有著各種爭取／若時辰未到／明天去」、「尋夢者應該多喝水」……好多句子仔細睇都可以有更多嘅解讀，而留意開歌詞，就會發現Wyman同佢徒弟陳詠謙同樣都擅長將流行現象同文化寫入歌詞，再伸延去講自己想講嘅嘢，而呢個亦都係佢哋擅長嘅地方，與其開宗明義去講自己支持嘅嘢，倒不如畀個波大家自行發挖同闡釋。
「還在渴望／人就不累／誰被逐出了伊甸／回不去」，即使我哋已經不再喺伊甸園，但大家只要繼續發夢、多飲水堅持落去，終有一日會見到光復嘅一日。
最後都想講，好鍾意鄭融嘅快歌——《紅花會》、《大女仔》、《成人對待》……希望鄭融今年出多啲歌特別係出翻快歌，次次睇返佢啲跳舞片都好high。
鄭融《多喝水》
曲：Howie@Dear Jane 詞：黃偉文
編：黃兆銘 監：Howie@Dear Jane／Tim@Dear Jane