（獨媒報導）往警署報到前一日，李予信選擇了去紋身，在手臂紋了「水」，繼續Be Water。他接受獨媒問，矢言「我好想變勁啲」。這名「狂舞派」已是註冊社工兼區議員，李予信在去年更報讀中大法律博士學位，欲成為大律師；又學習泰拳，希望能文武全才對抗威權。「我唔可以咁易受傷，要保護好自己，所以學泰拳。反送中好多年輕人被人拉，好想用法律幫到佢哋，唯有精進法律知識。」
記者不禁問道，「點樣為之勁啲？係咪有法律證書就勁咗？」李予信想了想說，「唔係有張cert就得，我都有社工牌，但我都係好幼嫩，無喺社福機構打過工。但喺我心目中，勁嘅人要歸納、實戰，再學以致用。」
「邊度需要我，我就會上」
今次的紋身在手臂顯眼的位置，李予信希望能令自己舒服一點，「我想紀錄呢一刻嘅心情，所以紋『水』。入獄冇fashion，無得gel頭、打扮，紋身可以陪伴渡過難過嘅moment吧。」
在前年的區選傳媒茶聚，26歲的李予信鋒芒畢露，一副官仔骨骨，傳媒稱他為公民黨「余文樂」，有記者更要求他即席表演跳舞。果然，他成功繼師兄鄭達鴻同打入紅區北角，並獲公民黨看重，成為執委。兩年下來，香港政局起了翻天覆地的變化，公民黨三名立法會議員遭DQ，余文樂都慨嘆生活不如意。
公民黨沙田區議員黃文萱原報名參選立法會超級區議會，最後以私人理由退出。公民黨徵召李予信頂上，力爭第四席。「形勢上我可能係被動，但我個心係主動，邊度需要我，我就會上。」
《港區國安法》立法後，公民黨內部曾坐埋「檢視」法例，認為部分條文是為政界個別人士度身訂造。當警員殺上門拉人，李予信聽到「顛覆政權罪」，已不感到意外，最意外是涉及民主派初選。
在搜屋期間，李予信房內的書籍遭到檢查，美國社會學家Alex S. Vitale的《The End of Policing》吸引了警員眼球，「真係好諷刺，想搵同仇警有關嘅嘢。」
早在雨傘運動期間和警察速龍小隊對峙，那次交手令李予信衍生了從政的想法，「政治就係武力、資源，同妥唔妥協嘅博弈。」李予信對從政不後悔，「香港本身已經太多社會問題，我睇唔到香港有未來，作為社工亦唔可以令到年輕人同服務使用者覺得有希望；但我會想繼續試。」
曾經的「廢青」 跳舞重尋自我
在基督教家庭長大，家人同樣關心社會，「我都係基督徒，但好少返教會。」李予信中學成績太差，考試得分試過單位數，曾經的「廢青」，打機直至通宵達旦，中三「終於」被踢出校。
「聽到Rap就覺得好正，嗰種感覺好自由、好有節奏感。」跳舞令李予信重新尋回自己，14歲那年，他和家人參加船上派對，看到親戚跳Breakdancing覺得好有型。
李予信便跑去學跳舞，家人一度反對，父親更上網搜尋「Hip Hop和宗教的衝突」對李予信說教。長輩眼中的街頭可能是黃賭毒，李予信的街頭是萬千世界。「（跳舞）係個時喺『現實世界』中難得投入嘅事，我諗我都用行動說服咗屋企人。」
因為跳舞，李予信去到世界各地交流，在20歲文憑試等放榜期間去了加拿大，進入了更高層次的創作世界。「移民？從來冇諗過離開，香港係我嘅根。」在前年6月9日，李予信亦暗自說過，如果當局撤回《逃犯條例》修訂，才會繼續練習跳舞。
然而，一旦未能保釋，47名民主派將要先行還柙，李予信承認有點不捨得，不捨得仍有自由的時候，「驚反而唔係最大部分。」
盼證專業人士從政不離地
風蕭蕭兮易水寒，壯士一去兮不復還。有人將今次民主派初選大搜捕，和1979年的台灣美麗島事件類比。
陳菊當年在獄中的遺書寫下了這一段：「願所有受苦、被受縛、被壓迫的人早日得到解放，願我深愛的故鄉——台灣的人民早日享有真正的公平、平等、自由、民主的生活。祈法律能象徵代表正義，而非只是統治的工具，形同具文愚弄人民。」
政治檢控不斷，有人說香港法治已死，正義未能伸張，李予信卻跑去讀法律。他承認無力得很，指不少法律原則和理論都「很聰明」，大多是歷來案例的成果，「當你見到香港司法系統，受住咁大影響同滲透，會有啲迷失。」
李予信堅定地說，讀法律是自己的決定，「專業人士從政，喺每一個地方都好重要，話畀人知唔離地、唔係藍血人。」
唸法律因黃國桐一番話
為被捕者提供支援的「星火同盟」，前年12月遭凍結銀行戶口，民間集會團隊及後舉行集會力撐。人權律師黃國桐在台上的一番話，令李予信更決心讀法律，「無論警察用乜嘢程序刁難律師，都會守住法律觀點，同手足行落去、斡旋到底。」
「你識法律要面對呢個司法系統，唔識法律都係要面對呢個司法系統，咁點解唔裝備好去『面對』呢個司法系統？」
「我唔預設自己要坐監，因為我冇做錯嘢」
記者問道，有甚麼未做的清單。李予信自言討厭生涯規劃，認為人生有不同形態，在不同階段自然會有不同走向，「咁先係Be Water吧。讀書已經好多規範，人生志業嘅嘢，交俾自己就好。其他Admin嘢，就冇乜好講吧。」他瞧一瞧記者反問，「五大訴求都未做得到啦，係咪？」
「我唔會後悔，我知自己做緊乜嘢。我唔預設自己要坐監，因為我冇做錯嘢。」
「想同公民黨講，將來嘅日子，會比大家預視嘅日子更困難，所以要有更壞嘅打算，大家要發展出更多嘅默契同合作。」
記者：麥馬高
攝影：林若勤