（獨媒報導）民主派47人被起訴控串謀顛覆國家政權罪，在前往警署報到前一日，馮達浚接受獨媒訪問，這名「公子哥兒」對參加立法會初選表明絕不後悔，「我哋可能未必睇到香港重光，亦都唔需要睇到，但有份揼石仔畀後面行咪得囉，我覺得我唔做會仲後悔。」
馮達浚最想多謝的是母親，「對唔住，我對你唔住。」他一度眼泛淚光，感激家人即使如何不喜歡，仍然無怨無悔支持，「嗯，我好任性，我真係衰仔嚟，但好多謝媽媽。」
酒徒
說馮達浚是「公子哥兒」絕不為過，他住在太子，出生小康之家，中學讀拔萃男書院，浸大傳理系畢業。唸大學時去了一本生活雜誌實習，從此視酒如命。快樂喝酒，不快樂喝酒，連Facebook的自我簡介都寫上「酒徒」。
喝酒是馮達浚的生活態度，他想過開高級餐廳，為食客介紹美酒佳餚。一說到飲食，他便眉飛色舞，「我其實好鍾意食麥當勞，一有新包就要試，最鍾意就係食豬柳強（豬柳蛋漢堡）。」
按照這軌跡走下去，馮達浚應和政治沾不上關係，「食好西，撚下貓，呢個咪Frankie，我啲朋友成日咁講。」
雨傘運動成政治啟蒙 參政由2.28說起
馮達浚本來可以在後方生活如常，甚或花天酒地，但這名公子哥兒卻選擇走上前線。2014年雨傘運動，唸大學二年級的他參與罷課，在金鐘吃過催淚彈，這是他的政治啟蒙。在此之前，馮達浚其實不太看新聞，「睇住粒催淚彈飛埋嚟，嗰時頭盔都無個，但覺得要做就要做，唔會諗。」
5年前的2.28，馮達浚跑了去調景嶺體育館，看立法會新界東補選點票。梁天琦敗選，旺角騷亂的官司隨之而來，加上到雜誌實習，馮達浚有點心灰，「專心」上班；每日到不同的餐廳試菜、喝酒，政治其實已與他分開很遠。「享受，其實好享受，某程度上呢段日子確立咗我。」
5年後的2.28，馮達浚身陷紅磡警署，這一切可能要從2018年的某一天說起，他下班收拾雜物，發現兩年前2.28的補選單張，重遇梁天琦尤如觸電，「我會諗，雖然依家生活好開心，但會唔會可以為我成長嘅地方出一分力。」
媽媽質疑點解要選：都冇人識你
2019年區議會選舉，改變了馮達浚的人生軌跡，這亦是他的政治BB班。他在朋友介紹下，參加戴耀廷發起的「風雲計劃」。首次上堂便遲到，遭同案被告、區議員楊雪盈、范國威喚其答問題，「佢哋叫遲到嗰個答，即係我，邊個會諗到三年後都要坐監？」
在反送中運動浪潮下，不少人搭上政治順風車成為區議員，馮達浚初試啼聲，在區選僅以99票之差落敗。朋輩都成為區議員，馮公子卻斯人獨憔悴，「嗰陣時好介意自己輸，覺得自己好『柒』，後來慢慢先覺得，呢個世界唔係贏就係輸。」
在去年立法會初選前，媽媽問馮達浚，「點解你仲要去選？都冇人識你，個個排出嚟都勁你咁多。」
馮達浚緩緩拿下眼鏡說，「其實，就算唔係我，始終都會有人做」，「蜀中無大將，如果九龍西有個叻嘅本土派，我願意支持佢，但到報名我都睇唔到，咪我做廖化囉。」
如果命運能選擇，馮達浚依然會參選區議會和立法會初選，「後唔後悔？唔後悔。唔係話好鍾意享受鎂光燈之下，就算當為咗自己都要做。」
在區選落敗後，馮達浚其實一度想過不再沾手政治，亦答應媽媽找份全職工作。他托著腮喃喃自語，自問從沒有抹黑對手，「我事後發現呢，如果要贏就唔好將道德標準放到最高。真㗎，我有時真係咁諗。」
「我都無做錯嘢，笠咩頭？」
警方在上月初對參與初選的民主派進行大搜捕，前一晚馮達浚還和李軒朗等朋友喝酒，早上5點還在看Netflix劇集《夜魔俠》，最後在迷迷糊糊間睡著。睡夢中傳來嘭嘭聲，馮達浚初時以為自己幻聽，「唉，得啦得啦，唔好爆我門，畀阿媽鬧多兩錢重。」
遭帶走時，警員問他要不要頭套，馮達浚反問，「我都無做錯嘢，笠咩頭？」
說時遲那時快，媽媽在晨運後回來，母子在走廊四目交投，空氣中彌漫著說不出的憂心。這一刻，馮達浚不禁問警員，「可唔可以行過兩步先扣，邊有人想睇到個仔畀人上孖葉。嗯，呢個警察算有人性啦。」
中學時最愛化學科，馮達浚在「我的志願」曾寫上消防員，這是看了電視劇《烈火雄心》的緣故，後來想做法證，則因為電視劇《法證先鋒》「好型」；大學聯招入不到理學院，入了傳理系，現在成了國安法下的政治犯。
「我想同屋企人去旅行，去晏菲路睇利物浦。我仲想飲更加多嘅酒，唉。我其實一路都覺得入去之前要再做多啲。」馮達浚認為，民主派被捕、上庭和入獄，或許能喚醒港人看清政權的真面目，「原來喺香港參加初選就係政治犯，就可以顛覆國家。原來我、家成、Fergus同子悦呢一輩都做到政治犯，原來我哋都『顛覆』到政權？」
拒絕移民 「呢個世界唔會有第個香港」
大時代下，去或留成為港人最重要的命題。在立法會初選後，馮達浚家人曾商量是否要離開香港，「其實呢幾個月一直有討論，但我唔想」，「佢寧願想我走先，都唔想我坐監。我當時應承係話好，點知1月就嚟咗。」
「人哋嘅地方始終係人哋嘅地方，呢個世界唔會有第個香港。如果真係無得揀，可能要走。但你要我移民去安居樂業，對唔住我做唔到。」
古來聖賢皆寂寞，惟有飲者留其名，馮達浚同樣怕孤獨，他在不同場合均會主動和別人搭訕，「嗰晚入到去臭格，我係咁聊隔離條友講嘢，佢都唔理我。」
馮達浚對入獄不感到恐懼，恐懼的是要面對未知。「其實最驚係入晒去之後就無人夠膽講嘢，當呢一代政治人物全軍覆沒，香港人做晒順民，咁就係最可惜嘅事」，「仲驚啲乜？我想講驚屋企人擔心，其實都唔冼驚，佢哋實擔心。」
馮達浚：九西初選機制真係雙軌制
馮達浚在初選中反勝為敗，最終在九龍西初選九張名單中排第五，位置在何啟明之後。馮達浚及後在抗爭派的記者會上稱「暫時繼續戰鬥到底」，這番說話被演繹為「唔守信用」。
馮達浚強調，九西的初選機制屬雙軌制，即「初選」及「民調棄保」，出線隊伍數目須待協調會議後決定，「可能我present得唔夠好，令身邊嘅人受到攻擊，到今日，我會講我對初選機制嘅認知同原來嘅有所不同。」
「其實，都就嚟入面（監獄）見，恩恩怨怨都應該抹咗佢。面對同一個敵人，贏咗佢先，之後再慢慢派系鬥爭飽佢。」
拒絕遺忘 「我覺得自己做得唔夠好」
然而，馮達浚感到遺憾的是，未能在初選多講述「共同體」的概念，「如果預視到參與初選，就成為政權的眼中釘，我會做得盡啲，講啲嘢放啲，我覺得自己做得唔夠好。」
「無論打壓係點，只要繼續講繼續有呢種韌力，香港係會重光到。」
在報到前，馮達浚已立好「遺囑」，尤其交帶媽媽照顧四隻貓，「如果真係搞唔掂，等朋友嚟，如果都唔掂到時唯有送走佢哋，唔想媽媽咁辛苦。」
在訪問中，內容總是離不開母親。在訪問尾聲，馮達浚在拍照期間主動對記者說，「阿媽話同我喺黃大仙求咗支籤。」
在報到前，馮達浚沒有告知記者籤文是吉或凶。「其實今次結果點都好。我估呢，佢（媽媽）會想我成為一個，搵到食之餘，對自己生活開心嘅人，如果只係打份牛工，返嚟成隻死屍咁，佢都未必開心。」
記者：麥馬高
攝影：林若勤