（獨媒報導）「我罪名係subversion（顛覆國家政權罪），個警察唔識串，要摷個電話睇國安法，我話我串俾你聽啦。由我自己講返出嚟係一個諷刺，即係連個執法者都唔識寫我嘅罪名。」何啟明說。
6/1/2021 ：突襲
2021年的第六天，民協深水埗區議員何啟明因參加民主派初選涉嫌違犯《港區國安法》中的顛覆國家政權罪首次被捕。
警察清晨六時帶同搜查令及拘捕令到達何啟明深水埗的住所拍門，要求他立即開門，「我話等一等，佢都話唔等得，要等就爆門。」警方入屋後指他參與民主派初選，涉嫌違犯《港區國安法》中的顛覆國家政權罪，「我第一下諗，我邊到顛覆咗呢？自己顛覆咗都唔知喎。」
6-7/1/2021：等了又等
何啟明以「等」概括他首次的被捕經歷。他指警方搜查他的住所超過一小時，然後將他扣上「孖葉」先押返深水埗警署，之後又押到兩個區議員辦事處搜證，直至早上十時再被押返警署，等到下午二時多才首次錄取口供，翌日下午一時再錄第二次口供，大部份時間都是等待與睡覺。「我記得1413（下午2時13分）呀嘛，律師同我講話要做一生一世㗎﹐同事後來講笑話一生一世坐監就有份。」何啟明苦笑道。
在羈留期間，何啟明起初仍「淡定」，認為自己「唔係太嚴重」，應該可以即日保釋，所以沒有太多擔憂，直至夜晚仍未有消息才「識驚」：「律師話有可能直接上court。嘩，咁就好似快必咁，冇得返出嚟㗎喎。嗰時反而諗下啲後事，辦事處屋企甚至乎個人財務。」他之後愈想愈累，不自覺便睡著。最後何啟明被扣留近36小時，在翌日晚上8時才准以三萬元保釋，同時要交出旅遊證件，並於2月10日再報到。
首個羈留夜
何啟明第一個羈留夜調到長沙灣警署的「臭格」過夜，翌日才送回到深水埗警署，「深水埗警署其實瞓唔到，佢有幾個倉，不過幾個倉都塞晒雜物。」他又指所謂的床其實只是一張石凳，領了三張毛氈便去睡覺，「一張鋪底、一張冚、一張捲埋做枕頭，好彩嗰日仲未好凍。」他稱自己不算「姿整」，只是「怕污糟」，別無他法下也只能逆來順受，「啲氈一浸味，喺張氈摸到啲粒粒，但眼不見為乾淨，唔去睇啦。」
睡覺問題尚且可忍，如廁需要又要如何解決？何啟明指蹲廁周圍都是濕淋淋的污跡，「入面唔俾著襪，都唔知踩緊啲咩。」他指自己儘量少飲少食，避免要上廁所，36個小時內只去了三次廁所，「開頭唔知，屋企人送咗個早餐嚟﹐我仲飲晒杯熱華田。」
無形的罪
何啟明與另外五、六人一同被關於羈留室內，他指同倉的被捕人士都有輪流「自介」，惟沒有人相信他的「罪狀」﹐「有個犯真係問衰咩入嚟，叫大家輪流講下。我話我衰國安法，佢問我即係咩，我話顛覆國家政權，佢之後呆咗唔識應，細細聲咁講咗句『唔想講咪算囉』。」
他指唯一明白《國安法》的，反而是一位在港17年的巴基斯坦裔人士，「佢有睇新聞，仲問我係咪嗰53個其中一個。」他更向何啟明說起政治與生活，指自己見證著香港情況愈來愈差，對繼續在香港生活感到灰心失意。
何啟明承認香港人的生活只會愈趨困難，「依家成日講融合，香港就係愈來愈似大陸，好多嘢唔做得、唔講得。呢個政權就係要香港人自己識做。」他批評政府不諳管治，從來沒有回應社會訴求，只懂往死裡打，希望藉操控及打壓得到「一班聽話嘅人」。一向能言善辯的何啟明在訪問中亦顯得小心翼翼，他坦言：「我依家同你做訪問都要好小心，可能有啲唔出得街，就算出得街都要好識表達。因為每講一句說話都會成為拉我哋嘅原因。」
談未來：係灰㗎，但一放棄就冇㗎啦
政府農曆新年後再出招，將提出修訂《宣誓及聲明條例》和《立法會條例》，要求區議員宣誓擁護基本法及效忠特區。被問及如果不當議員的去向，自2015年起當選區議員的何啟明即貫徹其天馬行空性格，說到興高采烈：「我有諗過去uniqlo摺衫…雖然我未考到車牌，都想去做巴士司機，我想試下未做過嘅工作。」
「如果留得低喺呢一行，我會去讀書。」何啟明突然收起笑臉、認真地道。他指希望修讀法律，或任何與從政有關係的科目﹐「我睇返台灣同韓國嘅例子，好多時學生被打壓，有一部份會走去讀law，往往佢哋之後喺反抗又好、從政嘅路又好會發揮得更多。」
讀社會科學出身的他指政權愈來愈高明，會利用僭建的法律管治甚至打壓人民，「讀得成畢到業，其實就係喺呢方面去反抗，而其實呢方面需要更多人去做。」何啟明指今次被捕令他學會要更加聰明：「點樣可以巧妙地表達自己諗法，但同時又唔會成為把柄？你要同佢玩，就要用更高明嘅手法去回應。要靈巧像蛇，我自問都仲未handle到。」
前路茫茫，有人移民離開，有人默然接受。何啟明始終認為「每個崗位都應該有人堅持落去」，「係灰㗎，但我成日同人講要堅持信念，一放棄就冇㗎啦。」
記者：周頌謙
攝影：林若勤