（獨媒報導）政府擬實施電話智能卡實名制，今日起開始為期一個月的公眾諮詢。有深水埗鴨寮街電話卡檔主批評實名制變相是剝奪言論自由，只為更好地「管理」香港，「香港本身唔係一個咁樣嘅社會，點解要做到同中國一樣呢？」有市民則質疑政府立法並非針對電話騙案，而是針對近年的社運事件，「怕啲人喺網上面溝通！」
政府於日前的記者會上建議在實名制下，電話卡用戶須提供中英文姓名、身分證明文件號碼、身分證明文件副本及出生日期；每名用戶只可向每個持牌人登記不多於3張儲值卡；16歲以下用戶須得到一名成年人確認。政府將就實名制進行公眾諮詢，直至2月28日，目標在今個立法年度按《電訊條例》訂立規例；在規例實施後，電訊商將在120日內建立登記系統，並在之後240日內讓用戶進行登記及執行。
阿K
電話卡檔主：實名制「管理」香港人
阿K於深水埗鴨寮街售賣電話卡近6年，主要以旅遊電話數據卡為主。她指疫情令旅遊卡無人問津，生意額大幅減少八成，「搞埋實名制，我哋係可以結業㗎喇」。她說，即使客人願意提交資料，但市場亦很快會飽和，若以四大主要電訊商計算，「一個人最多12張，用完一張用另一張，好快飽和。我哋係做新卡，唔係做增值，就算繼續做都無用，人係得咁多㗎咋嘛。」
她批評政府推行實名制是「無嘢搞搵嘢嚟搞」，認為政府只是希望更好地「管理」香港人，實名制變相令市民失去言論自由，「唔再係講乜都得，令大家收收埋埋咩都唔講」，「香港本身唔係一個咁樣嘅社會，點解要做到同中國一樣呢？」
阿K坦言，昨日得悉消息後，對前景感到迷惘，亦擔心趕不及清貨。她指，過往批發時每次都會大量入貨，估計將有大量電話卡過期後變「死貨」而要丟棄。她又指已經開始考慮轉行，「可能要轉行賣電話殼喇」，又嘆自己人微言輕，「反對聲音都唔到我哋出聲啦！我哋講幾多，都唔夠啲官講一句！」
許先生
批實名制浪費人力物力
售賣電話卡3年的檔主許先生直斥實名制浪費人力物力，「依家買張卡係幾廿秒嘅事，到時登記埋，可能延遲到十幾分鐘㗎喇喎！」他指，一個人或無法兼顧銷售及登記資料的工作，但亦無法應付額外聘請員工。
對於政府稱立法是為了打擊不法之徒使用電話卡犯案，許先生形容政府的真正目的是「司馬昭之心，路人皆知」，「坦白講，過去呢幾廿年，有幾多單騙案係同太空卡有關？搵藉口咋嘛佢只係！ 」他又表示，電話詐騙主要來自內地，「平時啲電話詐騙都唔係香港人send㗎，係大陸send嘅，禁嚟都無用！ 一係你返大陸拉晒佢哋！」
許先生嘆，受疫情影響旅遊卡銷量大跌，生意額大跌七成，剩下三成靠本地儲值卡支撐，「再推實名制嘅話，（生意額）一定再無一半，咁睇下......邊個死先囉！」他又指，有不少公司會一次過購買逾百張電話卡，供海外來港客戶使用，一旦立法，將會帶來很多麻煩。
謝先生
市民質疑立法針對社運
市民謝先生亦質疑批評政府立法目的並非針對電話騙案，「佢最主要嗰樣嘢避開唔講，係因為呢幾年嘅社運事件，怕啲人喺網上面溝通！」他今日到鴨寮街購買電話卡，稱日後即使實名制實施亦會繼續購買，「因為真係平過上台交月費好多，我都係幾個月前買張試過先知！」
楊先生
市民楊先生則贊成實名制，「無所謂呀，影響唔到我」，又認為能有效打擊罪案，對社會有好處。他使用「太空卡」約3年，指立法後仍會購買，並相信電訊公司會守規矩，不會外洩其資料，又認為「有嘢唔見得光」的人才會擔心提交個人資料。
他又指，一直使用太空卡是計算過「最抵用」，「除非你話啲錢多到用唔晒，基本上我哋呢班老嘢覺得俾百幾蚊用服務唔值，宜家平均每個月都係廿幾蚊，一個月有大約5GB數據用。」他表示今日到鴨寮街，是替8歲的孫子買「太空卡」上網打機。