（左起）油尖旺區議員李偉峰、副主席余德寶
（獨媒報導）昨夜7時至今早6時，政府將油麻地碧街9至27號及東安街3號劃為「受限區域」，區內所有居民在完成檢測不得離開。行動中共330人接受檢測，發現1宗確診個案。油尖旺區議會副主席余德寶形容政府的突襲封區行動失敗，成效低下及擾民。油尖旺區議員李偉峰認為政府只為「跑數」、做「政治show」，以及為密集式封區試水溫，並非有心為市民檢測。
余德寶：政府唯一成功突襲「自己人」
余德寶認為政府胡亂封區極度擾民、影響區內經濟，行動勞財傷民，而無實際作用。余又指，政府唯一成功的是突襲了「自己人」，在昨晚7時至9時半前，封鎖區域內的警員與民政處均不清楚整個流程及細節，「其實封區第一件事理應通知居民，但政府人員連自己要做乜都唔知，淨係set場都用咗兩個幾鐘先開始進行檢測。」
居民重複檢測 無所適從
李偉峰批評政府做「政治show」，受限區域內的順豐大廈及碧街9至13號數幢大廈，近日被列為強制檢測大廈，有市民為趕及交齊家中老幼的檢測樣本，早已勞心勞力，「（政府）要啲居民做完（檢測）又再做係為乜呢？」，令居民無所適從。
他又表示，親眼目睹封鎖區內的警員在受限區域解封前，突然搬來鐵馬封鎖道路，又喚政府攝影師拍攝警方解封區域的全過程，「其實唔止解封拍片，有街坊講連上樓叫人做檢測，都要俾政府新聞處嘅Camman行前上樓先，要拍到政府防疫好熱血咁。」
李偉峰批評政府突襲式封區，是為平日封區進行強制檢測試水溫，「（居民）7點放工返嚟等半個鐘先上到樓，食完飯被叫落去做檢測，做到凌晨啲官就同居民講凌晨6點解封，仲可以返工。林鄭咁樣逼啲居民係幾賤格嘅。」