開首有啲嘢必須要講清楚：
(1) 站長所有朋友中粗略統計，大約得一成係交通迷，當中唔少屬於巴士迷。作為鐵路迷，站長從來唔會認為「成為巴士迷會學壞」，興趣嘅嘢無必要製造偽二元對立。
(2) 無論有咩興趣甚至政見，品格比起一切成就更為重要。
早幾日YouTube流傳一段短片，內容大概係有一位中學生透過演說方式，用廣東話同英文講自己將於2021年成為「全職巴士迷」，並公佈其「愛車」。站長收到朋友分享呢條片，一開嚟睇覺得好尷尬，正如睇返自己過往受訪片段咁老尷。網民反應兩極，讚賞者欣賞佢充滿自信咁分享自己愛好，甚至鼓勵「應該用知識去改善交通，先會係專業嘅交通迷」；批評者認為「巴膠弱_智」、「點解要問准其他巴士迷攞愛車，睇到好老尷」，更甚者則引用Telegram頻道資訊起佢底。朋友成日話交通迷群體「貴圈真亂」，但點解呢個圈子咁「亂」呢？
自智能電話拍攝質素大幅提升，以及網上影片串流平台發展蓬勃，近年香港巴士迷同鐵路迷開設各式各樣嘅YouTube Channel。頻道數量眾多，內容質素良莠不齊乃正常現象。過往分享影片旨在分享所見所聞，多人欣賞固然開心，無咩人睇亦唔會太上心。但去到近年嘅交通迷圈子，頻道之多固然產生競爭，為追逐觀看人次、讚好數字，總會各出奇謀。有新奇嘢睇固然開心啦，但唔值得為推高Views而擅闖不對外開放區域。
有唔少香港巴士迷同鐵路迷幾鍾意搵各種車輛，作為代表自己嘅「愛車」，甚至取用代表車嘅車牌及/或車號作為自己網名。後來呢種文化演變成需要登記以獲取「主導權」情況，即係「某人只要將某部車列為自己愛車，就唔畀其他人將嗰部車列為其他人嘅愛車」。站長從來都無收過任何愛車，頂多都係得站長夫人呢個「愛人」，所以無暇亦無興趣參與呢類「爭奪主導權」嘅討論。
有人嘅地方就會有「埋堆」，交通愛好者群體亦唔例外。交通迷要走埋一堆可以有好多原因：相若背景、共同興趣、類近鑽研範疇，總之總有一個原因走埋一齊。啱傾嘅可以攬頭攬頸、稱兄道弟；唔啱傾又或者係朋友嘅仇家，就不時群起攻之。作為「交通迷群體」其中一份子，點都有朋友，亦會有Haters。清潔姐姐之前同站長提過，佢曾經幻想過交通迷群體可以成為一個大家能夠和諧共處嘅烏托邦，但去到後期大家心知呢個環境難以實現。
聞說呢段影片出街後惹起牽連大波：影片於Facebook及連登上流傳並引起熱烈討論，於Haters全力動員下，影片負評數目遠多於正評，影片主角亦不斷刪除各種批評及起底留言。當事人嘅WhatsApp被大量外國電話滋擾，佢嘅家人唔畀佢再於YouTube上傳短片，最終剷走埋段片。相信大把花生友講緊呢件事，站長亦無謂加多把口評論影片內容了。
面對批評，有則改之，無則嘉勉。呢個世界比自己更聰明、更學識淵博嘅大有人在，最重要都係保持謙卑。站長亦唔相信交通迷圈子一味靠惡就可以「帶風向」，唯有互相尊重先能夠真正讓其他人信服。面對如此混沌嘅世界，期望大家仍有顆赤子心，讓自己能有所得著，同時讓整個群體可以持續發展。