政府建議馬鞍山郊野公園邊界外10多米改劃發展，無視既有1－2公里「緩衝區」指引，更表示界外起樓「沒有無法克服的技術困難」【註1】，令人質疑是否為係囤地地產商開路發展。
40年前泡湯的昂平纜車計劃
其實馬鞍山郊野公園成立時，亦曾有地產商同政府「討價還價」，要求喺劃界時剔除現今極受市民歡迎嘅昂平大草原，然後係草原起一個收費野生動物園（safari park），仲有「昂平纜車」（cable car）及度假式別墅（resort）同哥爾夫球場，甚似近年郊野公園邊陲地發展嘅建議。好彩當年政府斷言拒絕，先令昂平大草原逃過一劫。40幾年後嘅今天，政府態度截然不同，積極向郊野公園邊陲地試探，令馬鞍山郊野公園陷入成立以來最大危機。
港英政府：山野屬大眾 不應有大型私營發展
咁當年政府點回應地產商嘅試探？翻查一份1978年10月南華早報報導【註2】，雖然時任新界政務司鍾逸傑（David Akers Jones）已經講個大型發展同郊野公園宗旨不符（incompatible with the country park），但發展商仍然「扭計」，言之鑿鑿話到時個野生動物園（收費會非常平，普通市民都負擔到 main beneficiaries will be the main-in-the-street, and not the super-rich）。
港英政府十分懷疑，唔信地產商開善堂。南華早報4日後另一篇報道補充【註3】，政府留意到當年私人哥爾夫球場都係收得好貴，另外類似野生動物園、由賽馬會資助嘅海洋公園都要收費十五大元（1978年），唔相信係山腰起resort 會係普通市民負擔到。如果最後收費太貴就會令到少咗人去，違反咗定立郊野公園應該免費畀大眾享用嘅原意。
當時政府亦好清楚提到，先例一開畀一間私人發展商踩入郊野公園，其他地產商必定會有樣學樣，齊齊瓜分原本屬於大眾嘅郊野（might well encourage others to draw up similar plans），最後否決計劃。
骨牌效應： 第一步邊陲外，下一步邊陲內
兩份陳年剪報顯示，港英政府面對地產商「睺住」郊野時尚會守住原則，相反今天特區政府主動開發郊野公園邊陲地帶予私人發展，顯示已摒棄「緩衝區」指引，亦忘記郊野地帶為服務大眾市民服務嘅宗旨。
難保今次馬鞍山綠化地改劃，將會成為政府開發郊野公園嘅第一張骨牌：若成功開發郊野公園邊陲外，下一步必然是郊野公園邊陲內。大家不要忘記，2年前政府曾委託房協研究向郊野公園開刀發展，只不過係市民激烈反對下作罷。
若先例一開，政府好可能再抵不住當年地產商要求割郊野公園地興建「昂平纜車」之類的壓力，原屬大眾嘅樹林，變成地產商嘅搖錢樹。
【註1】明報 2020年12月15日 馬鞍山郊園邊8綠化地 申改劃發展 最近距郊園15米 環團斥違諾「試水溫」籲反對
【註2】South China Morning Post. 25 Oct 1978. Change park for us, urges developer.
【註3】South China Morning Post. 29 Oct 1978. Let’s keep these parks free for all