記得八十年代去電子廠做暑期工，發覺D工資好似好得意咁，無啦啦會斬開一截截，乜野底薪呀、佣金呀、勤工呀、各式各樣嘅津貼呀、獎金呀、超額獎呀……… 種類繁多，當年問D工友點解會咁樣安排，會計計糧都計到一頭烟啦，老細豈不是自找麻煩？有心水清嘅前輩就同我講，老細做野點會死錯人，搞咁多野就係為左壓低個底薪，在計算假期工資、離職補償等等時只計底薪，甚至離職前最後個糧期嘅游津貼、獎金，都話你唔做就唔出俾你都敢死。
今時今日，法例針對呢D博大霧老細，作出了一些修改，將上述大部份嘅項目納入「工資」的範圍，計全部都計算為「工資」一部份，唔可以巧立明目計D唔計D。
雖然係咁，而家仲有僱主好鍾意喺基本工資以外，整D咩膳食津貼、服裝津貼，但又唔係合約講清楚。到你離職時又話唔一定有呀咁。
最近勞工組收到一個以設計師命名的高檔女士fashion brand員工求助，她入職和Area manager 溝通時，得知不需要穿著制服，可著自己衫，公司提供clothing allowance，去到三月尾四月頭，更收到Area manager通知，一季會有$3000 clothing allowance，當時也有問怎樣claim，Area manager說交單據給老闆（？），他便會支付。
因為事主知道自己未過 probation，所以諗住等過三個月後先Claim。直到過了probation之後，大約六、七月時事主再問Area manager，他表示隨時都可以claim，也再次表示是一季$3000服裝津貼。不久之後area manager 被解僱，是在公司補足錢情況之下走。稍後事主自己8月頭遞辭職信，同時也有問公司HR consultant ，但對方説唔清楚，叫她問executive secretary（?）, 事主就即時向她查詢，佢話已問老闆，佢話佢地會答我，事主見一直無答，事主便在8月18日直接by email send單據比佢地！事主一直有追問，但佢哋都無回答。直到事主離職之後公司計尾糧，仍然無出上述的服裝津貼。
稍後勞工組介入，經EMAIL聯絡後，公司卻一路透過律師事務所作為中間人與事主和勞工一組聯絡，不肯直接聯絡事主和勞工組，其實搵律師既錢貴過俾返3000蚊事主好多。
律師講來講出，指出僱主不願意支付3000元的理由就是沒有書面合約內沒有承諾有這筆服裝津貼。但衹要對法例有基本常識，都知道合約可以有幾種形式~
1.書面
2.口頭
3.透過客觀事實體現（例如你做左幾年，每年年尾都有雙糧出，便可以理解年尾有雙糧是合約內容一部分）
3000元對一些人來説，可能不是大數目，但事主就覺得僱主不能言而無信，更不能隨便揾員工笨，而更荒謬的是管理層爲了補自己的鑊，寧願付上比原本3000元多更多的律師費。
（事件未完~待續）