Hair13 老闆 Wing（左）、Dino（右）。
撰文：Kady
攝影：Frank
理髪店 Hair13 由 2 位香港人共同成立，Dino 入行逾 25 年，一次機緣下，他參與了青年創業計劃，得到第一筆創業貸款。拍擋 Wing 自幼反叛，在社工循循善誘下踏上理髪師的道路，創業理念與 Dino 一拍即合，共同創辦了Hair13。
至今，Dino 已於馬鞍山經營理髪店約 15 年。當初選址考慮到成本問題，眼見馬鞍山仍有待發展，店鋪租金相宜，便選擇於福安商場開設第一間理髪店。生意上軌道後，今年更「細鋪搬大鋪」，搬遷到馬鞍山中心較大的地鋪擴充。
Hair13 位於馬鞍山中心的新鋪位
培育年輕人 回饋社會
雖然 13 有不祥之意，Hair13 中的「13」卻是取自 Dino 的生日。對於 Dino 而言，理髪店是他人生新的一頁，Dino 沒有豐厚的家庭背景，亦沒有亮麗的學業履歷，當初開設理髪店家人都不特別支持。但他相信讀書不是唯一的出路，正所謂行行出狀元，理髮亦能闖出一片天。
身為過來人，Dino 希望在理髪店不虧損的情況下，幫助與自己相同處境的人。「因為如果佢哋有心做，我哋唔想佢哋輸在起跑線，唔鍾意讀書唔係罪嚟㗎嘛。」他希望在自己店內培育具潛質的年輕人，令他們可以有一技旁身，發揮所長。
疫情肆虐，理髪店都沒有實行分組上班，亦沒有扣減員工的薪金，只有加強店內的衞生措施應對。「咁佢哋都好乖，所以都唔想減佢哋人工，寧願我哋自己頂咗個損失。如果有咩閃失都入肉㗎，但如果一定有人唔開心，咁寧願我哋自己唔開心。如果減佢哋人工，佢哋都唔開心，咁你成間鋪頭做嚟無意思，咁不如我哋兩個頂咗佢。」Dino 表示目前店內共有 8 名員工，分別是4位理髪師及4位助手，大部份都是充滿熱誠、幹勁的年輕人。雖然理髮店的規模不算大，但對員工十分慷慨，佣金比同行高 3 成，另再設有勤工獎。Wing 設計的公司 logo，以純黑背景配上白色的公司名，代表即使周邊環境黑暗，理髪店仍會發光發亮、發放正能量。Dino 和 Wing 均相信年輕人如果肯學肯做，仍是會有出頭天。
除了聘請年輕一代，他們亦經常做義工。兩者的對象不同，Dino 會到大學開班培養大學生剪髪興趣；Wing 則集中教導基層青少年手藝，希望他們可以學到謀生技能。「希望佢哋可以有一門手藝，將來就算移民都可以為自己生計打算，去到邊度都可以生存到。」
去年，他們自發舉行「義剪」活動，為社會出一分力，反應超乎預期，惟店鋪未有充裕人手應付，幸好得到有心行家毛遂自薦，主動向他們請纓幫助，活動才得以圓滿完結。Dino 透露曾打算在區內開設另一間理髪店，提供「優剪」服務，即優質的「速剪」，希望可提供更多就業機會予年輕人，同時開拓不同的客戶群，惟被疫情打斷，惟有暫時閣置。
為了令顧客放心光顧，他們決定使用即棄毛巾代替可重用的毛巾。
謝絕低質客
馬鞍山是新市鎮，社區較為年輕，消費力亦較高，居民對生活品味有一定要求。不少人把理髪和洗、剪、吹畫上等號，但其實理髮背後還有許多功夫，包括髪型及形象設計等，雖無形卻更具價值。Hair13 為每一位客人提供形象設計，除滿足客人要求之外，更希望每一位客人踏入與踏出店鋪的形象截然不同，務求「靚」過理髪前。
香港經濟表現下滑，失業率創新高，嚴重影響市民消費意欲。面對艱難時刻，Hair13 仍堅持自己訂下的底線，不願為了生意向低質客低頭，「其實我哋都幾『寸』，我哋一向唔做低質客生意，拖喼、口音唔正都唔做，就算個場無人都同佢哋講 full 咗 booking，永久都 full booking。」一來希望保持店內最舒適的環境，二來希望保持客戶質素，保持整體服務水平。「我哋幾個師傅都有共識，無客幫襯都唔會做佢哋生意，唔會為賺個幾個錢而折腰。」Wing 續說「客人對我哋有要求，我哋對客人都有要求。宜家啲客都好有質素，馬鞍山啲客大部分都好有質素。」問及理髪店的客路，二人異口同聲表示「中產家庭、後生仔、專業人士、有文化的人多。客人要求高、識貨。一睇就知我哋有無『水』佢。」
無悔表立場 難得真心客
其實早在 6 月二人已經就社會運動輕輕表態，有罷市和貼出香港加油的標語。搬新鋪後，店內的佈置更是說明了一切。毫不掩飾地表達立場難道就沒有任何顧慮嗎？難道不擔心影響客路嗎？「我哋都有計過條數，諗諗下都係唔計啦，831 之後就立刻表態，在 831 之前我哋都真係有顧慮。我哋都有諗過，會唔會真係得失咗好多客人呢？始終 Dino 有屋企人要照顧。」Wing 續說「即時啊，即時少咗一半客人。」
屋漏兼逢連夜雨，疫情緊隨社運而來，「其實疫情初期都有客人由觀塘都特登嚟幫襯，好感動，佢哋講明係因為我哋立場先嚟，但因為疫情宜家就無辦法再嚟。所以疫症對我哋影響好大，佢哋想支持都嚟唔到。」Wing 補充「始於我哋呢行唔同飲食，佢哋可以做折扣吸引客人，可以做外賣，流轉可以好快，我哋始終剪個頭髪要時間，如果有埋折就仲大獲。宜家都係靠客人支持，有客人都專程過嚟又電又染。」
店內的 Pepe 掛飾。
原本二人因為立場，想放棄申請政府的抗疫基金，但後來有做會計的客人知道了，便主動收友情價幫忙申請，「原本諗住有骨氣啲，唔去申請，但有個客聽到就話，啲錢咪又係納稅人到嚟，唔好蝕比政府」，二人反而被客人說服。「但最後佢一蚊都無收我哋，想話不如送月餅券比佢做回禮，但個客都仲未嚟攞，呢啲就係守望相助。」
理髪店紮根馬鞍山，無數客戶光顧，其中不少昇華至無所不談的好朋友。由開店到現在，Dino 及 Wing 都聽過不少事，各有甜、酸、苦、辣。客人面對理髮師反而更容易說出難以啟齒的事，傾訴過後，內心亦覺舒坦許多。疫情持續多時，Hair13 雖然無可避免的受創，「抗疫」路上，他們依然十分感恩，因為一路上得到不少的支持及鼓勵，有客人更「山長水遠」親自到店鋪為他們加油打氣，這些窩心的舉動令他們可以在艱難的日子，咬緊牙關堅持下去。