政府成日話要解決今日嘅房屋問題，所以十幾年後起個島俾大家，已經令人搲爆頭。但明日大嶼嘅破綻可止呢一個？
舊年3月發展局局長黃偉綸推銷明日大嶼個陣時話，2032年有首批居民入伙，但原來今日施政報告，林鄭「靜靜雞」將入伙日期延至2034年，原因冇解釋，但研究都未做，工程都未開始，入伙日期已經延遲，明日大嶼變「後日大嶼」，林鄭果然係攞第一嘅。
既然政府話明日大嶼係應付增加人口，咁我哋應該認真睇番統計處最新人口估算。今年9月，政府公佈《香港人口推算2020-2069》，香港人口會喺2039年到頂（809.7萬）【註1】，並會續年下跌至2069年嘅735.1萬，人口比現在更少。即意味政府今日最樂觀的入伙時間2034年，之後只有短短5年時間，人口便會開始下跌。
而且根據往績，長期人口估算有高估後再調低嘅傾向【註2】，難保未來會再調低2039年嘅預計人口，或者人口頂峰會提早出現。而根據過往經驗，越大型嘅基建，工程延遲嘅機會亦越大，隨時竣工時香港人口已經逐漸萎縮。令人不禁質疑，點解政府唔正正經經解決今日嘅房屋問題，而將個寄望放喺一個不會解決房屋問題嘅島上？
爭議再拖落去，呢啲問題將會逐步露餡，怪不得林鄭話明日大嶼已經「曠日持久」，巴不得速戰速決。
【註1】《香港人口推算2020-2069》
【註2】 香港獨立媒體網 十八年來香港人口首次下跌