（獨媒報導）12名港人被扣留中國境內至今第92天，部分家屬陸續收到被關柙親人的來信。其中被以《國安法》拘捕、29歲的「香港故事」成員李宇軒，在信中表示自己已反省，並籲為他開設專頁「Andy is Missing」向國際求援的妹妹「咪繼續搞，好收手喇」，又謂「我就係人辦，千祈唔好搞到好似哥哥咁，到時後悔都嚟唔切」。李宇軒妹妹接受《獨媒》訪問指，不相信此乃哥哥的真心說話，認為可見哥哥被中共視作較大的威脅，「想hold住我哥做人質嚟叫我收聲」。惟她強調自己不會停止發聲，籲外界繼續關注12港人情況，「令中共知道佢唔係可以為所欲為」。
李宇軒親筆信（受訪者提供）
收信感安心 惟質疑洗白看守所不人道對待
「Andy is Missing」專頁今公開李宇軒寫給家人的信，信中李宇軒表示「喺倉度生活得都算OK，無俾人蝦無俾人打」，又提到「有三餐食，有熱水沖涼」、「有病可以睇醫生」，也有請律師作法律諮詢，「而家都理解中國內地呢邊嘅法律程序，律師嚟緊都會喺庭上面幫我辯護」。信中又叫妹妹「咪繼續搞，好收手喇」，稱自己已經反省、看清形勢，「再搞落去係無前途嘅」，「我就係人辦，千祈唔好搞到好似哥哥咁，到時後悔都嚟唔切」。
李宇軒妹妹表示，此前一直未收到信，曾想過是哥哥不肯寫虛假的內容。直至周五（20日）收到信，「認到佢嘅字跡，第一下係安心嘅，至少佢有一隻右手function緊先啦」。
與其他被扣柙港人的信相似，李宇軒的信也強調現時生活安好。李小姐質疑一切都是「喺個模板度抄出來，點對點回應返外界的質疑同要求」，實質卻是「洗白」看守所內的不人道待遇： 「既然裡面情況咁好、咁人道，咁你咩事唔畀律師見人呢？」
李小姐（網上截圖）
信中稱已反省兼警告「收手」 妹批被逼寫悔過書 不會噤聲
李宇軒的來信，特別指名李小姐「咪繼續搞，好收手喇」，又表示已反省及看清形勢，籲李小姐「千祈唔好搞到好似哥哥咁」。李小姐坦言，不相信乃哥哥自願所寫，感覺是當局「逼他寫悔過書」、「係文字版『拍片認罪』」。
她認為，這信相較其他家屬的措辭強烈、直接，是因為背負《國安法》罪名的哥哥被當局視作威脅，加上自己又從事國際戰線的工作，引起當局注意，故要恐嚇、警告自己，「想hold住我哥做人質嚟叫我收聲」。
但李小姐強調，並不會因此而收手：「佢越係叫你收手就越唔可以收手，因為佢就係唔想咁多關注，冇人關注佢就做乜都得」。她坦言現時「冇得揀」，只能繼續發聲，希望當局因此「唔可以對佢太差」，「令中共知道佢唔係可以為所欲為」。她在專頁也表示：「如果中共認為這能令李宇軒妹妹沉默，他們就是再一次錯誤理解香港人抗爭的理由。」
無宗教信仰李宇軒稱「有祈禱」 妹：可能受很大壓迫為自己找出口
李小姐說，雖然信中多處明顯違反哥哥意願，但仍有一些內容符合真實情況，例如哥哥普通話的確「好麻麻」，也相信他對家人的慰問出自真心。
而信末李宇軒提到「每日都有祈禱」、「知道神會一路陪住我行呢段路」，又指「神都會保守同祝福你哋」，李小姐透露，哥哥並無宗教信仰，平時也不會說這種話，但「可能佢入面情況真係好差、受咗好大壓迫，精神上完全冇寄託之下就用咗祈禱去為自己搵一個出口」。
雖然終於收到來信，但李小姐仍然擔心哥哥的狀況：「佢成封信都冇提及叫我哋放心，只係叫我哋出面的人平安」。哥哥被扣留至今三個月，她仍然想對他說：「唔好放棄，出面都仲有好多人關注緊同支持緊你」。