問前老細攞嘢，話難唔難，話易唔易，如果你要問前老細攞份employment proof，你估你攞唔攞到？
事源：
一位朋友托勞工組朋友（下稱L）幫手，問佢前老細可唔可以填份employment proof，因為佢嚟緊海外就業既資歷證明，唔只係簡單一份工作證明就得，要前老細填三頁紙，內容係學校同職位既基本資料，以及佢工作內容咁。佢擔心老細嫌佢麻煩，已經自己填好晒，老細睇過如果OK，簽個名就得，有咩錯漏佢修改又得。但係其中有老細一直唔肯幫佢填。
L的紀錄：
其實我唔熟教育界，所以問咗幾位教師朋友，佢哋主要講法都係老細唔肯既話亦無佢符，其中一位朋友直頭講，學校唔俾就唔駛旨意搞掂，無乜方法。
咁所以打去學校之前，已經期望唔大，但姑且一試，因為呢位事主其實本身係同路人，而且過去喺自己職場都幾敢言，曾經為自己權益親身出頭，呢類打工仔好少有，佢想有援手時值得幫手。
打去搵校長，傾偈過程約莫都有30-45分鐘咁，主要有以下幾點：
1. 大部份時間都係聽校長講呢位老師壞話，例如佢好煩
2. 校長覺得老師draft既employment proof唔符合實情，所以拒簽
3. 佢唔係唔肯幫前老師填，但不滿老師既手法
4. 問我哋係乜水，appreciate我哋肯幫老師，但要睇幫緊咩人
咁我也表達咗以下幾點：
1. 睇返份表，佢其實唔係要校方去推薦佢，只係因為該處理資歷既機構有自己既form，所以一般離職時攞到既工作證明才不適用，而呢份employment proof內容亦主要係學校資料以及老師既職位要求等等。
2. 雖然校長對老師相當不滿，但似乎係佢同校長喺相處問題，多於佢既教學資歷上有問題。
3. 老師已經離開咗學校，而且可能離港，需要一啲援手，呢類情況唔只事主，其他老師學生亦可能有需要，校方既做法一般係點呢？點決定邊啲幫、邊啲唔幫？
4. 據老師提供既一啲對話資料，老師早前請求校方幫忙時，已經多次為過去一啲衝突道歉，既然佢已經多番講對唔住，係咪可以一人讓一步？
5. 假如校方唔同意老師draft既內容，咁不妨老師send份blank form俾學校，校方按自己說法填寫？
咁經過大半小時既聊天，最後校長話考慮下先，但可以照send blank form過來，咁再過咗一陣，老師來訊表示學校約佢即日下午可以回校取呢份employment proof，最後佢亦真的如願以償攞到手了。
最後，之所以促成我想寫呢篇紀錄出來，係因為我唔係教育界，份表雖然三頁，但要人填既空位其實唔多。所以都有啲感概，個感概既地方係......我有諗返起細個讀書時幾敬仰既一啲老師.......我希望如果佢哋有需要請學校填呢啲employment proof時，唔會遇到太多障礙。
始終我唔知佢哋雖然受學生歡迎，但喺校長、教職員之間係咪如魚得水，我希望老師們有需要時，可以順順利利。
並祝老師們生活順心、身體健康。