All Things Bright And Beautiful 的（左）阿莉、（右）Joanne
（獨媒報導）2020年多災多難，社運、疫情、黎巴嫩爆炸、各地森林大火⋯⋯ 但走進「How To Survive A Disaster」的展覽，映入眼簾的不是頹垣敗瓦，而是明亮的「好風景」—— 色彩繽紛的熱氣球、微笑中的太陽，以及色調柔和的大樹佈景；展出的童趣畫作，甚至令人誤以為置身於兒童樂園中，沒有半點「災難」的感覺。
作品充滿童趣的本地設計品牌「All Things Bright And Beautiful」，於11月1日至15日在灣仔艺鵠藝術空間舉行展覽，透過畫作談如何在災難中生存。基督徒插畫師 Joanne 和阿莉期盼自己面對災難時，盡力做能做的事，以及保護比自己弱小的人。
畫與不畫 —— 反送中運動和港人的痛
2019年延續至今年的反送中運動令很多香港人感到難過，Joanne 亦不例外。在這段期間，她創作了不少嘲諷時事的畫作，題材包括警暴、721元朗事件、831太子站事件等，並上載至 All Things 的社交平台。
Joanne 解釋，自己非刻意以社運為題材，只是她習慣在每晚睡覺前畫畫，當刻想畫甚麼便畫出來，「過咗一日之後，（當日）發生咗啲好癲嘅嘢，覺得：點解咁嘅！臨瞓前就畫返出嚟。」
凡是與時事有關的畫作，均出自 Joanne 之手。對她的拍擋阿莉而言，以社會事件作為畫畫題材太困難，「太難畫喇⋯⋯我覺得好難表達，我同其他人（對社會上發生的事）嘅反應都係差唔多，未必搵到一個 viewpoint 去畫。」
不過，嘲諷時事的畫作只能在社交平台上看到，兩人沒有將這些畫作印刷成產品，也沒有在是次展覽中展出。她們解釋，今次展出的畫作都是2020和2021年月曆中的插畫，「平時 post 出嚟梗係無問題，但每個月都要睇住（個月曆），唔會想成個月淨係睇住『721』咁樣。」
曾被建議不要畫「充滿憎恨」內容 阿莉：隨心創作㗎啫
說到底，她們期盼的，是畫作能夠為人帶來快樂。All Things 從2011年創立至今，作品一向予人正面、童真的感覺。即使是控訴政權的畫，也沒有絲毫血腥的成分 —— 例如《港區國安法》生效後，警方配備了新的紫色警告旗，指有關人士可能觸犯顛覆國家的罪行；Joanne 便畫出警察同時舉起七種顏色的警告旗，儼如一支彩虹旗，當中更有一支旗寫著「singing is off key」。
Joanne 說，自己習慣以幽默、輕鬆的方式表達：「會覺得啲嘢黑暗到一個地步，要用啲好搞笑嘅方法先可以表達出嚟，如果唔係就會好似睇新聞咁辛苦。」
不過，即使盡量便用輕鬆的方式表達，亦曾有網民聯絡她們，善意地建議「唔好成日畫咁多充滿憎恨嘅嘢」。Joanne 說自己其實有點認同：「我覺得佢講得啱嘅⋯⋯」
不過，阿莉卻覺得「無乜所謂」，指提建議的人純粹是留意到她們一向的畫作較「hopeful」；但阿莉認為不必規限自己，強調「都係隨心創作㗎啫，我諗我地本身唔係刻意一定要散播愛與和平架嘛！你嗰刻個諗法係點樣咪去畫囉。如果咁啱人地覺得我地畫出嚟啲嘢好，咁咪多謝。」
以「災難」作展覽主題：好多disaster係人造出嚟
品牌名稱為「All Things Bright And Beautiful」，但是次以「災難」作展覽主題，是否代表並非一切事物都美好？
Joanne笑言：「完全無諗過喎 ⋯⋯ 因為個事實係咁吖嘛，呢個世界嘅事實係咁。唔可能永遠都咁 all things bright and beautiful ⋯⋯」
阿莉進一步解釋，「我哋係覺得，最初神造呢個世界嘅時候係 all things bright and beautiful 啫。我哋覺得本身好多嘢係好靚、好好嘅，但唔係話現實所有嘢都美好到卡通包裝咁。」
Joanne接著補充，「有好多 disaster 係人造出嚟嘅。」
如何在災難中生活下去？
展覽中，每幅作品都是 Joanne 和阿莉對「How To Survive A Disaster」這問題的答案。若要挑選一幅最能代表她們想法的畫，Joanne 會選擇一幅在黑暗中，人類和動物都用手舉起一顆小星星的畫。她說，「好多嘢控制唔到，但 at least 做到嘅嘢就做」，認為每人的力量聚起來可以很多。
阿莉所選的畫，是在下雨的情景中，一個人撐起了黃色的雨傘，為五隻小雞擋雨；而人的背後，有一隻高大又溫柔的恐龍以身軀為她擋雨。阿莉指著畫作解釋，當危難來臨，專注去保護身邊比自己弱小的人，追尋一些比自己更大的事時，就會忘記自己的恐懼。
Joanne 的家人都是基督徒，不僅是「信二代」，更可以稱得上是「信三代」；阿莉則從小學開始成為基督徒。她們說面對災難時的盼望就是「主會再來」，即相信就算世界上沒有公義，但最終神會帶來公義。
說罷二人又笑著你一言我一語：「有時會求主快啲將公義帶嚟，但又驚一驚，死喇！可能我都係被審判嘅，哈哈」、「世界太絕望嗰時先會特別諗呢一樣」、「都係㗎！平時生活得好好地，去旅行咁樣唔會諗主再來㗎嘛，都係諗下陣間食咩好㗎啫！」
