R爆黃藍綠之說在前頭：
這年來我們都聽到不少故事，好多都不能簡單以立場回應，我們都很想知道，不同社會位置的人，會怎樣回應這個問題？每個月的處境題，我們都會不記名地邀請兩至三位人士回應。我們希望創造一個平台，讓大家的想法在此進行交流。
同時，必須澄清，R爆頭處境的故事，全乃根據不同人的故事重新組合，故如有雷同，實屬巧合，與不巧合，之外…
R爆處境三： 黃店整野唔好食，幫唔幫襯好？
話說某黃店，是一班走左去境外的後生仔，在當地為左維生而搞。呢班後生仔，完全無做過生意，更加無要經營一間日日都要煮野食俾人的舖頭，唔單止由零做起，簡直係負數起跑點。由於佢地的食物質素真係好麻麻，縷縷遭到網民投訴，更有人開始討論：「幫襯黃店都唔係老逢架，你啲食物質素咁差點對得住呢撐你的手足？黃店就係要做到有良心，證明自己做啲野的質素好過啲藍店呀嘛！」但又有人會話：「呢啲黃店，資金就算有人捐，都唔係永恆架，燈油火臘全部都係錢，完全無經驗無技術，完全唔識，仲要係流亡咁的狀態，你想人地點啫，萬事起頭難，真係支持手足，就應該有難同當，難食啲都要幫襯啦！」
R爆處境題：咁如果你係一個顧客，你又會點抉擇呢？你會基於咩諗法和原則去做個判斷呢？
＝＝＝＝＝＝＝＝＝＝＝＝＝＝＝
甲：某黃店經營者
如果說是食店，不論黃藍，質素都要基本OK，對得住來吃東西的人。假如你是自稱黃店，就有更大的責任，否則會好似用宣傳技倆，利用運動的身份去「水」我的顧客，或者黃的身份成為賺錢的手段。我自己去年都接手了一個飲食的業務，裡面各個工作崗位我都試過。其實，飲食真的好專業，不是隨便無經驗一班人好有熱誠就可以做到的生意。到現在，好多流程、運作等等的我都覺得我未做到最好，對自己出品未夠有信心，所以我無打正旗號係黃店。
經營一間以黃店為旗號的店，你與顧客的關係，就不只是資本和消費者的關係，而是運動同路人的關係。因此，黃店應有更多的責任提供到更好的服務/食品，才對得起那些因理念去光顧你的人。
這個個案裡的朋友，全無經驗去開店都有點太衝動了吧？如作為消費者，我會觀察他們有沒有花心機改善自己的產品質素，以及有沒有實踐其他的我支持的理念，例如勞資關係合法公平、性別友善、環保等等，總之在他們的店的空間裡實踐更多商業以外的東西。如果有，或許我會有更大動力去包容，多給幾次機會。但若持續無改善，無可能長期以捐錢的心態去消費。我未必追求好好味，但會希望看到他們願意努力做到正常水平。
雖然，黃色的光譜好闊，本身好多人有好多技能，有人煮食厲害，有人擅設計工作流程，有人熟悉貨源，能告知你如何以實惠價錢去買貨。這就看店方本身願意開放同大家溝通的程度。雖然不是人人的意見都合用，但一定會比你幾個無經驗的人去處理這麼多新問題，會容易得多。老實講，一間黃店質素不好都有一班客人願意回來光顧已經好幸福。一般店舖，質素不好，顧客不回頭也不會告訴你原因，要改善都無從去改，他們願意向你提出意見，已經好幸福，真是超級珍貴的禮物，應該要珍惜。
乙：某忠實黃色經濟圈支持者
俾我就會幫襯幾次，支持下，可能吃兩三次，試下唔同款，但長貧難顧，做生意要有客源，唔係善堂靠捐款，在外地更需要有外地客去撐，唔改善質素，剩係靠過來旅遊既香港人，撐唔得耐喎。咁我可能試下隔幾個月再去睇下佢有無改進囉……
食店食物味道是基本呀，好食都是良知既一種，唔係要求你識飛，但都要有基本質素和有追求改善的心，舉例講，就算你整魚蛋，都要彈牙架。和你開店做生意去賺生活費，即係你都係打算自力更生，
好多小店都唔係難吃，即係如果你覺得入唔到口，都仲要人地撐，咁長期以來都係委屈緊Ｄ食客。社區經濟都係要有基本質素，無質素果D其實玩唔耐。譬如小食店，就算唔係好食過人，都要維持到一般質素，咁人地再加上其他價值如信念理想等，去支持你會無咁難受。但如果本身D食物，就真係唔得。
除非你真係靠長期捐助為生，如果唔係會有斷捐的問題。本身開店都應該是想有長期固定收入，而唔係靠捐助呢D咁不固定的收入。咁我理解如果要開業，可能要眾籌，或突發性需要一筆過資金，咁可以當眾籌咁偶爾run，但你經濟活動長遠都係要有收入去填補，咁先叫經濟活動嘛。
長遠嚟講，如果唔想只做消費者去評論啲野好唔好食，淨係係到批評手足做得唔好，咁大家就幫下其他手囉。例如，如果有廚藝了得或者識整食既人可以去幫下拖，也可以專請啲毒舌的朋友批評下D食物等佢地改進下。
其實正常一間小店，開業應該都係盡量就自己擅長／有特點地去開，其他人可以將它好的一方面去宣傳，但如果先天地就在各方面都是差劣，咁應該建議它考慮下做過第二啲生意啦… 咁當然可以是吸收意見渠道，繼續去改善，但咁就要睇返ｄ人有幾開放可以去接受批評和建議。咁有d小店，煮既野食對比其他店舖，可能無咁好吃，但它可能平日會做善事，或者幫人，咁其實都是可以去宣傳呢d面向。
消費者去選擇消費，從來都是有各種因素考慮，不止是價格和質素既，但價格和質素點都佔一個重既角色，咁其他方面可以加強Promote，等大家多些資訊去選擇。
我諗反而黃色經濟圈本身就係撐起左好多小店，當然也可能是令小店變左D新既大店去壟斷市場，但整體而言，小店係現在呢個脈絡下反而係比前前多左生路。咁你食物的質素，可能要做到與其他小食店差不多，但起碼味道上要合格，大家能入口，咁再promote佢其他價值，先做到相輔相成。
==========================
[草根.行動.媒體]
網頁：https://grassmediaction.wordpress.com
臉書： https://www.facebook.com/grassmediaction
telegram channel： https://t.me/actionofgrassmedia