（獨媒報導）離島區議會昨日（10月19日）舉行第六次大會，區議員梁國豪就長洲中興新街天后廟對出店舖阻街的問題作出提問。期間，長洲鄉事委員會主席翁志明向梁國豪「開火」，指其「次次都話DO（民政事務專員）唔喺度」，更稱「我代表你老豆老母教訓你」，引起眾人譁然。
長洲中興新街的士多提供租用燒烤爐服務，假日有不少少街坊及遊客租用，造成阻街、噪音等問題。梁國豪指出，單車及中興街燒烤爐一直都是長洲的核心問題，但政府沒有積極處理，舉例他曾就單車問題向民政事務專員求助，「搵咗一個月都搵唔到，都唔知DO其實係咪平時太忙開會」，因此希望民政事務助理專員可以積極配合。
翁志明：代表你老豆老母教訓你
梁國豪發言後，翁志明即「發難」，指「我而家想問下梁國豪議員，你做咗議員幾耐呀？」他不滿梁指「搵唔到DO」，「你次次都話……成日搵唔到DO，其實你明唔明白㗎，一個阿頭成日俾你搵到㗎咩？」，表示有時要「搵佢助手」，就如他作為鄉事委員會主席，如找不到他就可以找副主席，「我真係唔抵得你話次次都搵唔到DO，DO成日俾你搵到㗎咩？」他又指，民政事務專員不止處理一個議員的事務，「你睇下我哋呢度咁多區議員。」
翁志明續指「你係新議員，我係廿幾年嘅議員……我本來就想教訓你，我代表你老豆老母教訓你。」會議室內眾人譁然，梁國豪隨即指「嘩，咁就刺激喇！有會議紀錄㗎喎，非常好，唔該晒！」離島區議會主席余漢坤則向翁指「唔好人身攻擊喇好嘛？」，惟翁繼續斥梁國豪「你身為長洲嘅居民，長洲嘅子民，我同你老豆都熟嘅。」
梁國豪：我老豆唔識你
梁國豪隨即反駁「我唔識你你唔好亂講呀，我老豆都唔識你。」翁志明再稱：「你唔識我一件事，話畀你聽，你都真係離晒大譜嘅次次都！」梁國豪反駁：「係呀係呀，喺會議上面鬧人爹哋媽咪嗰個唔離譜！」
余漢坤要求梁不要打斷翁發言，並再向翁指不要人身攻擊，但仍容許其發言。翁志明再指「我幾時有人身攻擊，佢成日都攻擊DO做咩事啫。」梁國豪要求其解釋「邊度有攻擊（DO）」。惟翁志明僅重覆指「好似你做區議員，會唔會搵助理幫你手呀，唔通吓吓要你做呀？」，「而家你做區議員，你應該要知道呢個道理，好喇我講完喇。」
梁國豪不滿，指「我咪搵李豪（民政事務助理專員）先生做嘢囉，我唔知阿翁生咁躁底，搵埋我爹哋媽咪出嚟（做乜）」。他又批評翁志明「你做咗廿幾年議員，都處理唔到單車問題、燒烤爐問題，你仲好意思提我爹哋媽咪？笑唔笑死人呀呢鋪。」他又著其「飲吓茶先啦，唔好勞氣啦，講返公事先啦！」，「唔好再提人爹哋媽咪喇，下次唔係咁同你講㗎喇，仲要我屋企人唔識你，你有會議記錄㗎嘛，唔好亂認親認戚！」