（獨媒報導）「你係黃定藍？」在過去一年的反送中運動，位於灣仔摩理臣山道的新嘉美茶餐廳處於風暴之中。這間黃店曾經被標記為藍店，生意因而受影響。老闆娘秦小姐接受獨媒訪問，表示因為父親不談政治的作風，故在運動初期沒有申明立場。不過其實她一直有開放茶餐廳予示威者休息，又曾捐出營業額予6.12人道支援基金，「好坦白講，生意一件事，良知一件事，如果兩樣比，我寧願要良知多過生意。」
新嘉美茶餐廳早前在《蘋果日報》賣廣告，這個廣告背後有一段有情有義的故事。秦小姐在十一年前接手餐廳，一班聖公會鄧肇堅中學的學生常常來光顧，學生都喚她「靚姐」。
靚姐看著學生長大，舊生畢業至今仍不少與她有聚會，「我都估唔到會有咁難得嘅友情，呢班後生仔俾咗好多嘢我。」武漢肺炎疫情爆發，餐廳生意滑落，這班師弟師妹擔心不已，建議靚姐在《蘋果日報》落廣告，「蝕緊錢咁手緊，仲點俾錢賣廣告呢？」結果，這個廣告從建議、設計，到刊出，由舊生們出錢出力一氣呵成。
不忿遭標為藍店 曾想過放棄
政府強推《逃犯條例》修訂，爆發反送中運動。一石激起千重浪。新嘉美茶餐廳位於摩利臣山道，本有不少馬迷及遊客光顧，運動開始這批客人大幅減少，而茶餐廳的電視一直播放TVB，部分員工亦反對運動，令餐廳生意一落千丈。
新嘉美茶餐廳遭網民斷定為藍店，秦小姐慨嘆，網上欺凌嚴重，一直對網上言論選擇置之不理，「都唔想越描越黑，但原來唔澄清都係錯。」她對記者坦白，曾想過放棄，「如果我放棄咗，我爸爸仲喺度，佢會點諗呢？唔會囉，其實應該要做好返。」
「我會諗，我有咁多學生，如果我同學生立場真係唔同，相信佢哋都唔會支持我。」有學生曾對靚姐表示，不如替新嘉美在網上澄清，「我話唔好啦，唔想俾人話係請寫手。」「我唔識處理，真心，我好少面對呢啲問題，我不嬲都係做生意。」
不過事實勝於雄辯，運動期間，她為部分有需要的遊行人士提供食物和飲品，以及稍作休息。去年的一次遊行中，有手足特意走進餐廳，給秦小姐留下一張「連豬」貼紙，她還自嘲「你話我哋藍嫁喎。」對方卻送來一句「你係咩，我哋有眼睇嘅。」秦小姐當仁不讓，將「連豬」貼紙貼在餐廳外。
雖然有「連豬」認證，但繼續有網民質疑「點會黃呀」。去年12月推出的「和你Pay」，將新嘉美列為藍店。秦小姐感到不忿，決定主動向版主反映，「呢個唔係事實，我之後將我個人 Facebook 俾佢睇，然後就藍轉黃。」
轉黃當日即遭放蛇
不過「轉黃」當日，餐廳悄悄發生了一件事。一名手足上門質問新嘉美的「立場」。餐廳的伙計不知如何回應，只稱「你想食可以入嚟食，我哋都有連豬貼紙啦，你覺得唔舒服可以唔食。」事後網上再起風雲，「靚姐」感無奈，「我只會怪自己，無交代到應該要點做」，「我只會講有人放蛇，但點都好，所以我情願低調，始終我唔可能全天候喺餐廳度。」
「元祖店」嘉美茶餐廳早在1968年在觀塘開業，經營至1984年結束，兩年後轉到灣仔現址開業，易名為新嘉美茶餐廳。
「靚姐」秦小姐在讀書時，已替父親收銀，後來到澳洲唸會計。回流香港後，她本沒有想過接手。後來父親年紀漸大，秦小姐不忍茶餐廳結業，在十一年前接手家族生意。
11年前接手 繼承父親不談政治作風
在2009年7月接手後，秦小姐有感餐廳較殘舊，決定先進行裝修，和關閉了原有的雲吞麵和麵包部。不少新開業或新裝修的茶餐廳，一般會掛上「大展鴻圖」這四個字，不過她想也不敢想，「做好廚房同水吧，守業都好難。嗯，我已較好多人幸運，人哋係由1開始，我係101開始。」
這間茶餐廳養活了秦小姐一家人，「有感情，爸爸成世人時間都擺咗喺餐廳度。」
自由行在十多年前興起，餐廳的收入自然增加。然而成也自由行，敗也自由行。自由行近年漸漸減少，加上人工和租金的支出增加，秦小姐承認餐廳情況吃緊，「自由行其實係 bonus，對香港任何一個行業都係，著重自由行其實唔係我選擇。」
附近學校的學生和在辦公室工作的市民，佔了新嘉美午市的一半客源。餐廳還提供外賣到會，遠至東涌、上水。說到這裡，秦小姐臉上終於有點微笑，「我主力生意發展，嗯，我會形容我係做前鋒，去衝前去開拓。」
秦小姐的父親一直拒絕將政治掛在口邊，和客人耳語間亦不例外，家中同較少討論政治。秦小姐亦不其然接納了這做法，「爸爸話人人意見唔同，唔需要話俾人聽。我當時都覺得係，生意就係生意。」
禁堂食令一日撤回 轟政府反智
疫情爆發，食肆首當其衝，政務司司長張建宗喚市民可以到郊野公園用膳，勞工及福利事務局局長羅致光更稱，落雨才知道戶外工人須要用膳；全日禁堂食推出僅一日即告收回。
在禁堂食當日，餐廳只能做外賣，生意只剩下十分一。「靚姐」炮轟政府做法反智，「你話唔禁就唔禁，唔洗入貨？唔洗準備？唔洗安排員工？」「我話俾你聽，我爸爸死，殯儀館要上山，我都無休息。我竟然為咗你，休咗四日。」
嘆香港無希望 考慮回流澳洲
在時代的漩渦下，政治已徹頭徹尾走進日常生活，香港人不得不表態，食肆亦然。「點都一定要有，疫情、限聚令，乜都係政治，政府真係同市民對著幹。」「2003年我都有上街，50萬人都已經要腳痛落台，你呢個林鄭政府。」
今年6.12，「靚姐」捐出生意額予612人道支援基金，「生意其實好差，其實好拉鋸，但想做返啲自己想做嘅嘢。」「唔洗2047年，2020已改變晒，香港都變咗新疆，都一國一制啦。」她表明會考慮回流澳洲，但不忍年輕人吃苦，「到我呢個年紀，佢哋到時就2047。」「嗯，香港真係無乜希望。」
停播TVB 「要我揜住良心做嘢真係做唔到」
訪問期間，餐廳內正播放著 ViuTV，這又有一段故事。電視機旁貼上一張寫有「因無線新聞立場十分偏頗及誤導。本餐廳決定停播任何無線新聞。如有任何不便，請見諒」的字條。說起該張字條，靚姐不禁斥道，「TVB 真係好誤導，我轉去 ViuTV，發現真係差好遠。」
她笑言，已對客人解釋到口臭，又不想伙計難做，索性貼出字條，「有伙計同我講，有熟客因為唔播唔再嚟食，我只好講一句真係唔好意思，要我揜住良心做嘢真係做唔到。」
記者：麥馬高、周頌謙