Whatsapp Group 同朋友丁緊柏迪轉會阿仙奴，突然有條粉腸send咗條av…sor，係歌mv link出嚟，原來係阿仙奴『會歌』之一《爭霸》。一睇，一聽，哭?咗，因為每一句歌詞、每一幕畫面都令人憶起很多舊事。
//舊日憾事 每個季尾總繼續兌現//
MV裡，我見到嗰支曾經叱吒風雲、所向披靡、全季不敗嘅阿仙奴；
我見到當年嗰支先殺皇馬、再殺祖記、再殺維拉入歐聯決賽、最後十人應戰僅輸2：1嘅阿仙奴；
我見到嗰支當年雄心壯志殺入聯賽盃決賽，但最後竟然輸球on9波因而破唔到冠軍荒嘅阿仙奴；
我見到嗰支一年賣一個隊長、人腳永遠都廢過人但又好好彩咁年年有第四嘅阿仙奴；
我見到嗰支年年季初目標爭標、然後突然季中甩拖、二三月突然大敗幾場、英超由爭冠變第四、歐聯做十六郎，一星期內四大皆空、然後季尾檢討，下季又再loop嘅阿仙奴；
因為鍾意，所以有期待；因為有期待，所以有失望。
//這陣容 疲倦了在教授領軍下 看回頭 若果那陣時會像這般嗎？//
呢十幾年無冠又庸庸碌碌嘅「四弟」日子，我見到好多經典人物；
我見到以前被寄予厚望、冇人會當佢係二五、只會當佢係廠長嘅法比加斯；
我見到曾經係阿仙奴鋒線值得期待可以打破九號魔咒、但最後卻敵不過被剷斷腳、即使復出都不復當年勇嘅度度；
我見到比阿迷形容為第一代嘅「狂歡三寶」－「歌王」桑治、「神丹」丹尼臣、「玻璃人」迪亞比；
我見到當年嗰條阿仙奴黃金中場線四人組－法比、法明尼、希比、路斯基；
我見到仲係被重用嘅奧燒；
我見到仲係好好波、冇傷患、有人爭住要嘅牛奶仔；
我見到仲係球員身份嘅阿迪達；
我見到title仲係寫住「阿仙奴領隊」嘅雲加；
人腳一路由賣big name，再到開始有big name願意加盟，卡叔、普度斯基、甚至奧燒，甚至有機會殺入決賽，差一步就可以打破九年冠軍荒，你明唔明嗰種由絕望到望到有希望嘅滾動有幾咁動L？
//面對足總 能活下來嗎？ 能否以冠軍終此笑話？ //
但你點估到，開波唔夠20分鐘已經輸緊兩粒畀侯城。係當年幾乎降班嘅侯城，唔係曼城啊！
但係//幸有卡蘇然後變出夢幻//，加上「啞仔」高斯尼冒住斷腳風險門前撞入，//瘋癲扭轉兩粒之差//。
嗰刻嘅滾動，就好似望住當年過晒轉會deadline先見到艾沙雲加盟一樣，係幾咁食神，幾咁估你唔到。但更估你唔到嘅係，加時下半場由基奧特助攻畀藍斯反勝3：2。
基奧特，一個畀人笑只識錦上添花，關鍵時候啞火、失機後淨係識得擺pose嘅model；
藍斯，一個畀球迷恥笑只識轉變360、後期被稱為死神嘅雞肋；
兩個極不受阿迷欣賞嘅球員，偏偏由佢兩個協助阿仙奴打破九年冠軍荒，世事就係咁估你唔到。
//回望昨日無盃困倦嗎？心酸嗎？ //
呢十幾年望住阿仙奴由爭冠big4，到一年賣一個隊長嘅歐聯十六郎、年年永瀆雲加嘅英超四弟、到後來終於有大名加盟、再到破冠軍荒，足足等咗九年，呢九年美斯同c朗夾埋都唔知拎咗幾多次金球獎，而阿仙奴偏偏先搵返對獎盃嘅憶掛。
到咗今日，阿仙奴聯賽比熱刺騎足幾季、連歐聯都打唔入、甚至幾乎連歐戰都冇埋；阿仙奴唔再賣隊長，但亦都再冇雲加，連由高貝利陪到去酋長球場隻吉祥物Gunnersaurus都走埋，呢十幾年嚟仲有啲咩係會永瀆？
//前塵不放下 如何建造繁華？//
係嘅，有啲嘢係需要放棄先會迎來新氣象，但係唔代表故有嘅感覺就會變，正如離開阿仙奴嘅雲加唔願意再踏足酋長球場半步，但仍然會遠距離睇阿仙奴每一場比賽，說穿了只係換個方式去愛，愛依然喺度。
打打下文，開始變打丁，anyway，呢首改編歌真係充滿好多對阿仙奴嘅回憶，每句歌詞都蘊含住過去十幾年阿迷對阿仙奴起起跌跌嘅心聲；同時亦記載咗呢段興衰更替嘅十年往事，每當遇上挫折總可以拎出嚟睇，然後咬緊牙關暗裡自說：
「屌，當年咁撚廢嘅阿仙奴你都頂撚得住，頂足九年啊，塵世間仲有乜撚嘢你捱唔撚到？」
嗯，頂撚住吧。