（獨媒特約報導）90後的Rex和Sam，上月創辦中環區外賣平台「中仔」，希望為被捕年輕人提供穩定的就業崗位。平台營運一個月，已錄得2萬元虧損，但他們稱不介意，只希望為「手足」出一份力。
開業至今，Sam最難忘的是有政府部門會定期光顧，落訂大量外賣。他指，若只有「黃絲」向他們訂外賣，只是「塘水滾塘魚」，故鼓勵客人替藍絲「落單」，吸納「藍營」的收入來減少內耗。
他們亦直言，黃色經濟圈是為運動作「漫長的準備」，希望港人一直記住初心：「每一次消費都喚醒返我哋，點解要做咁嘅選擇？點解我哋當初6月要選擇出嚟？去到呢一刻，我哋俾嘅每一蚊，都係投緊票，提醒自己好多嘢仲未完。」
餐廳常客變合作夥伴 盼助被捕年輕人維持生計
Rex及Sam（化名）都是90後，說起二人的相遇，Sam形容為「好搞笑」：Rex是某間中環黃店店主，而Sam是他的常客。去年「黃色經濟圈」崛起，店舖生意大增，某次店內人手不足，Rex便問Sam：「不如你幫手做一日part-time?」詳談下來，二人均希望「做啲嘢幫吓手足」，便一拍即合，開始熟絡起來。
兩人均稱，一直有接觸和支援不同因反修例運動而被控告的年輕人，知道他們因為常要到警局報到，難以找到全職或穩定工作；加上武漢肺炎自年初開始肆虐，「炒散」工作機會大減，故二人於上月成立中環區外賣平台「中仔」，希望為「手足」提供彈性工作機會，有空餘時間便可以「返住先」，以維持生計。
Sam
首月蝕2萬拒放棄 只抽少量佣金、外賣員可「袋曬運費」
現時中仔有8名兼職外賣員，每日處理2至10多宗外賣。Sam指，平台只依賴Telegram及Whatsapp接收訂單，再以人手分配工作，沒有程式輔助。團隊設立不足一個月，暫時由Rex負責提供所需器材及墊資人工，Sam則負責日常運作，包括分配人手及與手足和餐廳溝通；而二人本身有正職，故只能利用工餘時間處理平台的運作。
對比大型外賣平台，中仔向餐廳抽取的佣金較少，外賣員亦能夠「袋曬運費」。Rex解釋，他們希望外賣員、餐廳及客人能互惠互利，笑稱「我哋唔係想賺錢，所以空間大啲」。
Rex坦言，平台一直有虧蝕，過去一個月只有一、兩天能夠平衡收支，首個月已虧損2萬元。但他強調，一早已經預見這個情況，因為生意剛開始不久，而中環區外賣生意很有市場，目前虧損是尚可接受的範圍。
寧可墊資也不放棄，Rex說相比「手足」為香港作出的犧牲，自己做的事其實微不足：「後生仔勇氣大過我地好多，但大家有唔同角色，希望可以貢獻自己做到嘅野⋯⋯（手足）冇得旨意政府或者其他公司，我哋又唔係好幸苦咁做呢樣嘢嘅，只不過係用手上嘅資源去做多少少。」
Rex
難忘政府部門定期幫襯：黃圈冇大水喉射住，就要靠自己
坊間不少黃店，向來不太歡迎「藍絲」光顧，甚至會貼出告示作警告。但Sam認為，若只有「黃絲」向他們訂外賣，只是「塘水滾塘魚」：「黃（絲）嘅錢就係得咁多，所以無可避免要轉向藍色市場。」因此，他們經常鼓勵客人替「藍絲」同事叫外賣，而不少客人也真的會響應——Sam印象最深刻的，是中仔總會定期收到某個政府部門辦公室的「大訂單」。
Rex則認為，即使是「黃絲」，亦不可能把所有錢花在黃店上：「經濟好的時候大家仍然能夠承受，會踴躍支持黃店。但現在經濟衰退，大家荷包都可能縮咗水，你唔賺藍絲錢係好戇居。衰啲講句，好多大集團有得拎資助（政府保就業計劃），即係有大水喉射住，但我哋冇，所以要靠自己。」
中仔未來計劃推出其他產品，包括生果禮盒、海味及咖啡掛耳包的團購服務。Sam希望除了外賣，客人亦會購買黃色經濟圈的其他產品：「由邊間平就揀邊間，到每樣嘢都可以揀黃店。」
「一個人醒咗，就唔會咁易瞓得翻」、「有啲嘢係做唔做生意，我哋都要堅守」
《港區國安法》實施後，不少黃店都轉趨低調、甚或退出黃圈，Rex理解某些字眼會令店主「瀨嘢」，但認為外賣平台無關政治立場，而是幫助客人尋找喜歡的餐廳。他強調「我哋正當做生意，冇話驚唔驚。」他認為，即使某些敏感的字眼需要收斂，但無論是不是做生意，有些事情都需要堅守。他舉例，「願榮光歸香港」的口號便十分中性，故不應該退縮：「唔可以吓吓缩到咁」。他質疑：「如果人哋講咩就係咁缩嘅話，其實係咪仲適宜留喺香港呢？呢個仲係咪香港人嘅地方呢？」
Sam則說會盡量避免做有犯法風險的事，惟他亦坦言：「一個人醒咗就唔會咁易瞓得翻，有擔心自己言論影響班細（平台內的手足），但有啲嘢好難唔講。」Sam續指，香港很多公司都有聘請「黃絲」工作，只是大家不會明言。
黃圈是「漫長的準備」：每一蚊都係投緊票，提醒自己好多嘢仲未完
時至今日，很多人形容抗爭運動來到樽頸位，Sam卻不同意。他認為，港人只是把抗爭逐漸日常化，並開始明白「唔係話今日行出嚟，天就會跌落嚟有真普選，或者有大家想要嘅嘢，係需要長時間準備」。他指，黃色經濟圈的重點在於為「我哋想要嘅嘢」做準備，包括金錢、抗爭熱度及社會連繫，而現在的低潮不過是個漫長的準備：「大家都唔應該忘記，我哋嘅目標係點樣、想爭取啲咩，但只係現有條件唔可以即刻做到。」
Rex認為，運動能夠持續的關鍵在於大家堅守的一些價值，例如不分化、不割席。對於社運圈子或黃店間不時出現紛爭，他語重心長地說：「人始終係一個人，即使黃絲都會有私心、有競爭，但係我希望大家完咗件事先處理，搞清楚我哋嘅目標係乜、最大嘅敵人係邊個。」
Rex續指，無論是運動抑或黃色經濟圈，從一開始就預料到政權會積極打壓、分化，但他希望港人回想去年6月堅守的價值及理念：「每一次消費都喚醒返我哋，點解要做咁嘅選擇？點解我哋當初6月要選擇出嚟？去到呢一刻，我哋俾嘅每一蚊，都係投緊票，提醒自己好多嘢仲未完。」
記者：王珮殷