R爆黃藍綠之說在前頭：
這年來我們都聽到不少故事，好多都不能簡單以立場回應，我們都很想知道，不同社會位置的人，會怎樣回應這個問題？每個月的處境題，我們都會不記名地邀請兩至三位人士回應。我們希望創造一個平台，讓大家的想法在此進行交流。
同時，必須澄清，R爆頭處境的故事，全乃根據不同人的故事重新組合，故如有雷同，實屬巧合，與不巧合，之外...
R爆頭處境題二：如果你係支援平台admin：仔女離家搵家長屋 黃媽媽TG找你哭訴被屈藍 咁點搞好？
某網上平台平時專做支援手足的工作，有日admin收到一個典型的中學生求助個案，話屋企人好藍，日日壓迫佢，佢要出嚟住。中學生情緒非常不穩定，admin擔心他再留在家中就會出問題，於是admin就馬上為佢聯絡家長屋，並接左佢出嚟住。一日後，有個女人搵admin自稱是該名中學生的阿媽，搵呢個admin，大聲哭訴：「我邊係藍呀！！我只係叫佢搵多啲時間讀下書，唔好成日掛住出去啫，我都無唔准佢出去！我都有捐錢俾基金資助抗爭呀！69,612果啲我都有遊行架，遊行果啲我成日去架，有無搞錯呀屈我藍！你快啲幫我搵番個仔番嚟啦！」
R爆頭處境題：如果你是這個平台admin，你會怎樣做呢？你是基於什麼想法而做這個判斷呢？
甲：某深黃中學老師
有關個中學生：
查實呢，呢位admin是否衝動左少少……？
學生話要離家出走，尤其係中學生，係可以安排佢搵家長屋嘅，不過，最好同佢傾多兩句，了解多少少佢同家長嘅情況，了解吓係咪非走不可；搞得唔好，啲家長覺得自己仔女真係畀人洗腦，嫌隙更大！不單止破壞關係，搞到藍嘅更藍，淺黃嘅嘅又易變藍，唔化算！
如果個學生未夠18歲，家長會唔會話個admin拐帶呢？都係了解咗情況，掌握多啲具體嘅關係，然後先至行動，咁樣會保障大家多啲。
咁咩情況會判斷個仔女非走不可呢？這是因人而異，最主要睇個仔女和父母個不能溝通的程度，如果去到以下兩種情況，
1.任何一方面完全唔想同對方有任何形式嘅交談或者接觸；
2.媽媽完全封鎖或放棄仔女的生活需要
咁咩情況係覺得佢地仲可以傾下：
唔係上面兩種情況，其實都可以傾下；
仔女要明白要父母改變觀念較為難，但係又唔係唔得，我哋自己都要學習，學習一個諗法：
「抗爭要由身邊開始」。試下理解父母嘅諗法，又俾佢哋又了解下自己嘅諗法；唔好咁輕易畀父母表面嘅責罵或者依依哦哦激親，佢哋成日口不對心。有啲野父母做得好的，可都可學習讚下佢地。
唔易做，不過試下啦，既然衝衝子都做得到囉，咁呢樣都應該可以試下啫？
我會唔會太理想化呢？
不過，人一世物一世，咩都試下啦，無壞嘅！
仲有一種可能：如果呢個學生係藍營臥底，（咪話冇可能！雖然我冇見過咁嘅case，
不過有都唔奇呀，有錢使得鬼推磨，所以我哋做得謹慎啲，冇壞嘅，而家係真抗爭，唔係遊戲，prepare for the worst係應該，查清楚無壞）就咁接個仔女去家長屋，會影響埋家長屋嘅家長，同入面嘅其他手足……
有關個家長：
至於，一日之後家長搵到admin，咁第一樣，一定要讚下個家長：唔了解個仔女都唔會咁快識得搵到個啱的admin嘅聯絡啦係咪？又要識Telegram, 仲要識得去邊個頻道搵。
跟住一定要聽多啲呢位家長講嘅情況，俾佢舒緩下心情先啦；
最重要嘅都係：俾佢哋媽媽同個仔女好好溝通下啦。咁點樣做好呢，建議個admin可以搵專業人士幫手，可以分別同媽媽同仔女傾下佢哋問題係邊度，共同闗注嘅又係咩嘢，然後做類似復和會議，唔好有淨係得佢哋兩個喺度講，有人帶下佢哋做有效嘅溝通係好緊要嘅。
我自己就覺得可以試下同個仔女傾：
1）阿媽肯搵個admin，已經唔係簡單嘅事；
2）阿媽肯話自己唔係藍，又肯去遊行，唔係必然嘅事；
3）咁樣嘅家長，已經比好多屋企好好多；
4）要抗爭成功，拉攏屋企人喺同一陣線係好重要！！
我覺得，媽媽同個仔女都要明白至少幾樣嘢：
1。政治光譜：深黃淺黃都係黃，唔好割蓆啦……
2。遠景願景：著眼現在，著眼未來，著眼目前抗爭，著眼裝備好讀好書再抗爭，其實根本矛盾，要明白：當下重要，但路漫漫……
3。與家人齊上齊落，這樣的抗爭才愉快！
--------------------------------------------------------------------------
乙： 某後援平台admin
有關中學生的部份：
我就好少見到啲親生家長，不如，覺得如果家長都同情運動係可以有共同基礎去傾下的。
大原則都係，了解下佢地的故事，佢地雙方可以傾到偈的狀態，搵個切入點。
其實，要接走一個未成年的人，是在行使好大的權力，以我的風格嚟講，就會覺得咁做是介入得太厲害。我自己的底線是，除非佢屋企人係身體上對佢施行暴力，那麼我就會想法子接走他，又或者，是親生家?會篤灰報警果啲，但如果係後者，即使我地唔接，個仔女自己都會走。
但有更多虐待的個案不是身體暴力，而是生活資源的切斷，例如不給零用錢，不交學費，不交補習費，或者不煮飯給他吃，又或者以各種方式不讓他出門口，情緒勒索，精神虐待，等等。
如果仔女求救，我會先看看手頭上有沒有資源可以接他走。但我覺得我有責任要告訴他，離家出走，當然是因為好嬲，明白，但核心的結果是，出左嚟會好堪坷，可能要去好差的環境，可能是板間房床位，或要流浪街頭。要諗清楚，是否真的想和父母決裂？對，去年當時的資源是很多，但沒有多到這種地步可以永遠接走任何一個仔女。如果說，只是出來住幾日，應該還可以，但如果是數周，就要思考生活費，2-3個月以上，更困難，好難有那麼幸運有個家長可以接濟你咁耐。我們有見過有些小朋友，不是很懂得找資源那些，離家出走後，因為無錢，是住在那些$80一晚的床位，而且因為無錢，可能住一晚床位，住兩晚街邊。這時剛巧讓我們碰上了，才找到資源幫他。
咁無法接觸個親生家長，都係試下同個細路傾下，找啲即時的支援俾佢，以當時的資源來說，有好多抗爭中的「家長」會可以付出很多，有幫手交學費的，有飯卷，也有即時支援。如果不是被親生家長身體上施暴的話，有抗爭中的家長支援，學費，吃飯，都暫時不成問題的。
關於個案中的中學生，雖然他媽媽自稱黃，但我都能明白個細路的心情。因為阿媽和阿仔的黃是可以差很遠的，例如，媽媽會覺得想仔女快啲離開現場，安全；對阿仔來講，安全就係掟火魔，有隊友先最安全，齊上齊落最安全最美好。又或者最近講立法會選舉，啲老一輩都講緊選功能組別，但唔少後生已經不會提選舉。我都試過有在後生過我的手足面前話，其實其他家長都有付出好多野，我見過大學學費都有人捐，從未見過捐款人托手㬹，但我就有人鬧話唔好再叫果啲人「金主」，話果啲人買野就話黃，淨係識得課金，唔係手足唔係自己人，我話人地都有個角色啫，我都覺得好無奈。不過亦有啲仔女，對住果啲唔係自己親生的家長的資助，表示過好大好大的感激。
不過，無論如何，我都係鼓勵，既然媽媽都係黃，試下找找對話的共同基礎，好多現實問題，唔係你走出嚟就解決。
________________________
關於媽媽的部份：
如果個媽媽真係嚟搵我，都係睇下佢的表達方法啦，雖然有時就算媽媽表達到阿仔都仲係反感的都會有。咁就建議，親生家長，唔好講以下：
1）唔好叫佢離開現場，首先係，其實你叫都唔會走啦。而且，唔叫佢走，係一種信任前線手足有be water 的決策能力。叫佢離開現場，你就係講緊你唔相信佢有能力安全番嚟同分寸。他們在現場，係最清楚。我地在冷氣房，無法完全明白現場。你做阿爸阿媽的就唔好再追魂CALL啦，仲叫人地報地點，咁危險！哽係唔睬你啦！
2）千萬唔可以篤灰，報警，不過黃的媽媽就應該唔會。
3）最難聽係，用啲好港豬好自私犬儒的方式，叫個仔唔好再搞唔好再出去，叫人地乜都唔好搞只理自己安全，係完全無理過年青人在外，都是想個社會好，想有個公義一點的社會，你卻完全否定了這個意願的可能性，否定這個價值的發生，那就無得對話。咁既你你100% 否定我，我就100%反抗你囉。好容易會咁。
4）唔好情緒勒索，唔好講啲咩你出去你就以後唔好番嚟。
5）如果你係黃，就唔好唔俾佢出去。一個前線，出唔到去，在直播見到手足被打被拘捕，是一種心靈折磨，有時見他們在channel寫野訴苦，甚至有人有自殺的念頭。
咁如果真係真係好擔心，其實都無乜法子，全香港人都好擔心啦，擔心無法避免，但都覺得做親生家長的，可以試試，也做抗爭中的家長，這樣可能會舒暢一些吧。你不一定要去前線，也可以是後勤和安全的地域，譬如有車的家長可以出車；了解清楚法律知識，知道保釋怎樣做；學習一下使用telegram，掌握一下情報及現場有不同的角色。為何那些後生會信任我們這些哥哥姐姐，是因為我們緊接事件的脈搏。例如，現場的人並非全是第一排的勇武，勇武也有分很多級的，第十排那些都好接近和理非啦，又或者，如果去做哨的，根本不會做任何犯法的事，是很安全的。如果你聽到仔女說出去做哨，你已經不用擔心吧？
講來講去，做父母都是要了解細路喜歡什麼，才有對話的基礎，否則個細路覺得你零知識，跟你講也是嘥氣，就絕對不會跟你對話了。
========================
［草根．行動．媒體］
telegram channel: https://t.me/actionofgrassmedia