今日有朋友send呢段片過黎問我：「嘩HKU D Hall係咪真係咁架？好癲呀！！」談起大學舍堂，真係一講D回憶就番哂黎。我Year 1 做過 Freshman、Year 2 上莊搞Hall O、Year 3 做組爸組媽（但Year 3 Sem 2就 Quit 左 Hall XD）；但唔計讀碩士，不得不承認自己已經離開左大學一段時間，可能同而家Freshman過的Hall O已經有一段距離（不過聽落 3 大Programme 模式都係差唔多，似乎改變不大）。究竟HKU D Hall係咪真係咁「恐怖」？
片中所談的都係真實的，而且已經是好少少的情況。一日訓到2-3個鐘已經算好，1-2個鐘或者通一兩晚頂都有聽過。唔知而家有無，但我有聽聞有D Hall會要求Freshman有最minimum的訓覺時間，我個人就相當贊成。另外所謂10日迎新，其實唔係十日，應該是夾埋11日，因為仲有所謂Day 0（諗番都覺得好癲，點解要咁...）。因為文太長，決定分上下兩篇刊出。
談Standing Order—其實是有用既……
Standing Order 呢樣野其實我之前都有寫過文，其實不止適用於Hall，而是HKU 一般正統答問大會必要學識的規矩。《學苑》指出，Standing Order「原意為節省時間、提高議事效率，故此對會眾的發言內容要求甚高。除了賦予主席更大權力以控制會議進度外，亦明文禁止回答者「答非所問」。當台下會眾認定發言者離題，便可隨時提出規程問題打斷其發言。」
點解諮詢者要用「震撼性的聲音」大罵，呢個就同仙制有關，其實Standing Order 本身的用意是不錯。我認為Standing Order 有用，但同時其實應要容許被諮詢者有回應機會。但迎新的MO時間委實太長（即係會運用Standing Order作為諮詢的活動）、亦無大作用，遺下的只是一堆寫到變龍飛鳳舞的Notes（不錯，HMO 是規定帶紙筆寫Notes...）、同埋打瞌睡到不行然後不斷被罵的回憶吧...～
談Hall Education—高壓背後有理由？
作為一個上過港大Hall莊既人，我諗我都叫可以講下當初Hall Ed用意（都係一個流傳說法）。話說以前入HKU的人係會好囂張、因為都叫做係「天之驕子」，仙制的作用就是透過「嚴肅認真」方式，等D新鮮人入到黎，知道自己唔係「天之驕子」，要識得融入舍堂生活咁話；但之後仙制有無變質就係後話。
而這一兩年社會動盪、加上疫情等等，當我們面對著一個如此這般的大時代、舍堂這種次文化其實真係好微小的野。到底仲有無「承傳」價值？Hall Spirit係重要、但對個人、對社會以致世界，又有幾大意義？我都實在很懷疑這有沒有保留價值。
另外，住Hall住到屋企又唔番、讀書又唔理者比比皆是，當時我就識人住Hall住到要Quit U咁滯。入得HKU，明明讀書能力一定有番咁上下，點可以搞到要Quit U？又點解會願意被洗腦式接受一套咁的文化？另外話說本人住的Hall近醫學院，會有較多醫科生住，但住 Hall 太多活動弄至成績低迷或經常勉強碌過者也有不少。回想起來，這始終是份與生命相關職業，住 Hall 不是問題，但要好好兼顧到學業才可吧。
回頭睇番，住Hall日子俾我的感覺是五隻字：瘋狂的青春。那種瘋狂不是少少瘋狂、而是你會奇怪自己點解會可以在這種次文化中生存的瘋狂，而且明明這班人理應是社會中「精英中的精英」。我不諱言這有點像邪教洗腦，而這種次文化更像是社會的縮影—像「多年的媳婦熬成婆」一般，你今日被人欺壓、他朝有天你成為欺壓人的人，而彼此從來不會問「點解會咁？」會唔會他朝零零後年青人，也會成為好似而家香港政府果班PK咁，去欺壓未來下一代？其實諗到呢個層面，自己都覺得有少少恐怖。
最後，我想分享當年一位堂友對舍堂的睇法：入港大住 Hall 好似打邊爐咁。你放咩野食入去，你最後夾番的未必是果D；但就好視乎你想帶 D 咩走（好似好言之有物咁？）。住 Hall 仍然是一屆人的集體回憶；不過究竟仲係咪要用呢種方式，定係問心佢只是讓初出矛蘆的小伙子嘗試擁有權力的滋味，呢點就由番住緊 Hall／住過 Hall ／未住過 Hall 的大家去諗了。