（獨媒特約報導）大埔太和及大埔墟一帶，多年來違例泊車問題嚴重，雙線行車變單線行車，連迴旋處亦泊滿車輛。有大埔區議員批評警方執法「敷衍」，辦事效率極低，促加強執法，運輸署亦需檢討車輛登記制度。

大埔區內違泊情況於周末及假日尤其嚴重，記者於周末早上十時左右到大埔鄉事會街、寶鄉街及運頭街一帶視察，單在寶鄉街已有超過十架車輛停泊在路邊，本來雙線行車的寶鄉街變成單行線。有車輛停泊在寶鄉街盡頭的迴旋處，令其他大型車輛難以行駛。

大埔區議員林名溢表示，違泊曾經令巴士、貨車無法轉向，堵塞鄉事會街、廣福道等主要行車線，令整個大埔墟區域交通癱瘓。他又指有商戶把貨物囤積在馬路，令其他貨車要在違規位置上落貨，阻塞行車線。不過林名溢強調貨車都只是受害者，「有啲商戶將啲垃圾擺喺落貨位，又有人攞雪糕筒出嚟霸位，落貨位比人霸晒，佢地咪要轉喺其他地方度落貨。」

 
林名溢指問題源於大埔墟車位不足，雖然區內有數個停車場，但經常爆滿，路旁泊車咪錶超時亦無人理會，「嚟緊寶活道會有新綜合大樓，但係依家牌（登記車輛數目）就係咁加，又唔控制車嘅流量，就算有多啲車位都消化唔晒。」他建議政府參考新加坡的交通措施，限制發牌數量，或可參考台灣，派人到停車場車位看守，並向逾時泊車司機收取罰款。

 
警方執法力度不足 無阻嚇性
 
記者視察當日，有兩名警員正處理寶鄉街的違泊車輛，但亦有不少警車駛過其他街道時，未有理會違泊車輛。林名溢表示他曾多次報警求助，但效果並不顯著，「佢地分得好開，馬路就係警察管嘅，行人路就係食環，但差佬嘅辦事效率真係低。街坊之前落街嗌吓口號就40個警察過嚟，依家違泊就咁抄一兩張牌就算，佢地根本唔重視民生問題。」

林名溢曾因的士佔用巴士站位置，與司機理論，結果的士駛走一段時間後又再重返相同位置泊車，「其實咁樣都冇用，如果唔執法佢地根本唔會驚，成日見到啲警車泊喺度，但又唔係做嘢，咁泊喺度做咩，其實見到就應該要即刻罰啦。」

 
行車線被塞死 屋苑主管：報警都冇用
 
大埔區議員劉勇威選區所在的大埔舊墟，由數條主要幹道包圍，內街大多數為單向行車綫，倘若有大量車輛違泊在內街範圍，會令當區造成大擠塞。他表示舊墟翠樂街有兩間比較著名的幼稚園，在上學時間，大量車輛會停泊在該條行車線，令道路完全無法通行。

翠樂街富萊花園的主管張先生指，花園停車場出入口經常有車輛違泊，「半架車頂住喺門口，我報警都冇用。搵到泊車嗰啲人成日都會喺呢度食飯，好嘅咪即刻揸走架車，有啲就話食緊飯，食埋先走。」

對於幼稚園家長的違泊情況，他形容像是「皇帝出巡」，「每次同啲家長講都鬧我話叫我比啲同情心，話小朋友要落車，我就成日比住客話我點解唔處理，但我做唔到呀嘛。」劉勇威表示有向幼稚園的校長反映，但因家長對於學校來說是客人，校方只會貼上告示希望家長注意。他稱「我有諗住劃雙黃線，但條路有好多老人院，如果劃咗，好多非緊急車輛都唔停得。」
 
此外，劉勇威表示，有車輛經常停泊在巴士站，妨礙巴士上落客，亦曾經釀成意外，「個站成日都有車泊喺度，巴士埋唔到站。有個坐輪椅嘅阿叔想上車，司機要喺路中心開條梯比佢，結果因為太趕急，搞到輪椅反咗，整傷咗個阿叔。」他認為如果馬路無法容納現時全港車輛的數量，運輸署應要以增加牌費等方式，減少原本不必要駕駛人士的出行模式，例如週末假期的駕駛者。

 
區議會討論無進展
 
大埔區議員（太和）陳蔚嘉表示，當區的違泊行為經常拖延消防及救護的救援工作。她指曾經有一名女生在太和邨墮樓，消防局距離太和邨原本只有五至十分鐘的路程。但當時救援人員駕駛消防車，遭違泊車輛所阻，延至半小時後才抵達，「唔講個女仔啦，呢區咁多老人家，成日都會唔舒服，真係多一分鐘就可能少一條命。」

陳蔚嘉又指，太和邨內有兩間小學，小學生通常會在廣福路下車，但因有車輛停泊在路旁，旅遊巴只能把車停在路中心，「咁樣其實對啲小朋友好危險，要佢地喺喺路中心落車。」陳蔚嘉表示，她與另外兩位區議員每次在區議會上都有要求警方加強執法次數及力度，但每次都只有交通事務委員會會議前後才會加緊執法，她形容議員每次交委會都像「錄音機」，「每次都會講返上個會啲嘢，但每次都冇改善，次次都要再重覆。」