（獨媒特約報導）打開浪頻道的Youtube頻道，最近更新的就只有「末日亭」播放清單。20條短片，全部長約一分鐘，畫面是電話亭的地板、沒掛好的聽筒、電話上的數字按鈕、電話亭外的日落……Benson笑指說，某次和Brenda、Ray三人外出拍攝時，碰巧看到有人正在拍攝路上的巴士：「我哋笑佢『巴膠』，但其實我哋仲戇鳩，係『亭膠』！」
浪頻道（Wave Channel）是本地影像平台，由古本森（Benson）、黃詩皓（Brenda）和鄧鍵延（Ray）三名年輕電影製作人組成。三人當中，Benson的名氣較大，曾舉辦個人畫展《扭曲》，2016年亦在大阪新世代藝術博覽會獲藝評人推介獎。但他向獨媒記者堅持，訪問一定要和Brenda和Ray一起做：「佢哋都係呢個project嘅骨幹成員，我想佢哋一齊做訪問。」
收集一分鐘的遺言投稿
「假如世界只剩下一分鐘，在電話亭中打了最後的一通電話，連接到一個你想致電的人，你會想說些什麼…...」
「末日亭」是浪頻近日道發起的藝術企劃，透過收集別人的遺言，再按投稿內容拍攝和請人聲演，講述每個投稿人的故事。Benson說，這個計劃有部分是由60年代的民謠《The End of the World》啟發。「我好鍾意首歌：有時，未必殞石撞落嚟先係末日，一段關係結束，都可以係一個人嘅世界末日。點解雀仔仲喺度唱歌，太陽照舊升起呢？我覺得好浪漫。」
Benson慨嘆，末日可以純粹發生在自己內心世界，而他收到的其一個投稿也有著類似的想法：「我知個號碼一早停咗，但我剩係諗到要打俾你；正如你選擇結束自己生命後，我都仲會寫信同你講我有幾掛住你。其實你走咗之後，我嘅世界就跟住一齊結束咗……」
讀藝術出身的Benson，自言對浪漫的東西有一份迷戀。浪漫的本質是甚麼？他說，有時限的東西就是浪漫——投入硬幣後，電話亭只能講一分鐘電話；現今社會人人都有智能手機，再沒有人使用電話亭，它於是淪為予人吸煙、避雨的地方，不知何時會被拆除；末日來臨時，生命在最後倒數，滴答、滴答……他將幾種元素混合在一起，組成浪漫的末日亭計劃。
但在生活上，Benson是個很實際的人，會懶得思考如何配搭衣服，索性只穿黑衣；就連社交帳號的頭像，都差不多幾年沒有換過。正因如此，他喜歡創作，因為可以在創作中擺放浪漫元素：「佢（創作）填補到我喺生活上太實際呢個空缺，有種精神上嘅滿足感。」
Benson
時代的沒落等於末日——依家已經係第二個香港
對他們而言，末日又是甚麼？身穿鮮橙色T裇的Ray，訪問時一直坐不定——有時用手弄髮型，有時把腳翹起來：「無得出街、無得去旅行，日日困喺屋企，就係世界末日……」相比之下，化了淡妝的Brenda顯得較成熟：「末日對我嚟講……係一樣蓋過一樣。你覺得今次已經好衰，但之後又有更壞嘅事。可能末日已經來過，但遲啲又會再有。」她所指的「末日」，正正是去年反修例運動的示威衝突，以及緊接而來的武漢肺炎疫症。世界急劇變化，把她壓得有點喘不過氣，但她仍然氣定神閒地說：「末日嚟到都唔緊要嘅，咪寫個新嘅世界出嚟囉。」
剛才開玩笑的Ray，也認真起來：「我覺得末日係仲未嚟得切害怕，就已經發生了，完了。好似黎巴嫩爆炸，喺好遠見到個蘑茹，下一秒已經喺你面前。」談到這裡時，臉孔還帶幾分稚氣的他顯出淡淡的哀愁：「可能下一秒世界末日，但佢唔會提早通知你，所以都驚唔到咁多。」Benson即笑言：「佢（Ray）好ready死。」霎時氣氛又歡愉起來。
Ray、Benson、Brenda
Benson說，末日的想像確實可以很廣闊，甚至一個時代的結束都是末日：「好多人話我哋香港已經返唔到轉頭，依家已經係第二個香港。」記者續問他，如果時代的結束是末日，那麼這個末日發生了沒有？Benson立即回答說：「發生咗㗎啦。呢個係新世界，舊嘅已經唔存在，會大洗牌，將以往認知嘅顛倒再來，創作需要更多新想像。」
他們留意到大部分投稿都相信「有下一世」，會約定在哪再見，或者到時怎樣識辨對方。對人們而言，「末日」似乎不是終結，「仲未完，仲有希望」。
由死亡思考生命 誰人是最重要？
如果末日真的來到，世界只剩下一分鐘，你會打給誰？Benson說他會打給老豆，因為他最近身體不太好：「我會叫佢振作。世界末日無咁快到，未捱夠呀你。」而Brenda則想打給媽媽，或者不打，平平淡淡的渡過最後一分鐘。Ray則說會打給細佬，他是Ray由細到大最親密的人，兩人之間沒有秘密，甚至會一起睡覺。有甚麼事情的話，Ray都會想告訴他。
Ray
不過Ray說，自己很少思考死亡，因為覺得擔心也沒有用。他認為命運早有安排——他的公公不煙不酒，卻得了癌症；爺爺又吸煙又喝酒，卻長命百歲。Benson以笑話打圓場：「所以食多啲煙啦！」
末日亭有沒有甚麼特別意義或者訊息想帶出？Benson表示，末日其實只是一個名字，等於死亡，在華人社會裡是禁忌，很少人提起。他發起末日亭計劃，就是希望透過死去思考生存，反思生命的意義：「呢個計劃其實唔negative㗎，佢提醒我哋要珍惜身邊嘅人。」有甚麼說話想講，就要趁早。
風格各異 互不干涉
由於三人各有風格，每一個投稿都會由其中一人負責，很少合作拍攝。Brenda的短片較多movement，例如她會以第一身拍攝自己慢慢行去電話亭，拿起聽筒的過程。「我都想似係第一身企喺電話亭，所以用wide shot。另外我有時會睇咗文字先再影，始終想加返文字嘅感覺落去。」
在她收到的投稿中，其中一個以這句話開始：「啱啱長街散步完，基隆街由門牌1號行到391號，路過9個街口，等待12枝交通燈，原來我地嘅節奏咁唔同……」於是Brenda帶上相機，搭車到深水埗：「我就去行咗一次，從基隆街1號行到390號。」沿途的交通燈不斷轉變、在街上的居民或剛買完菜、經過綠色玻璃外牆的西九龍中心……Brenda與投稿人素未謀面，卻一步步把基隆街完整的走了一次，希望可更理解她的心情。
Benson的創作則比較隨心，多為靜態的畫面，甚至完全沒有剪接。他解釋指自己喜歡使用定鏡，是因為「好似擺喺度睇下有咩發生。我覺得擺啱個位就係，唔似得Brenda咁有心機。」
至於Ray，同樣喜歡使用定鏡。「我覺得電話亭好似植物，佢哋都有感覺，雖然佢唔識講。」電話亭在城市裡，就像靜靜望著社會發生甚麼事，「佢就咁棟喺度，但側邊又發生緊啲事。」Ray希望呈現到電話亭這個觀察視覺。
頻道成立的時候，Benson將它命名為「浪頻道」，取自「法國新浪潮」。Benson解釋，自己很仰慕法國新浪潮所提倡的「作者論」，即是相信電影的導演就是書的作者，他必須有自己想表達的東西。他形容，以前的電影就像工廠式製作般，但他覺得導演不應該是廠長，而是應該有自己想法跟作風。「所以我哋有別於其他媒體，我哋有較強嘅自己風格。」
正因有著這樣的信念，Benson很少要求Ray或Brenda改動些甚麼，漸漸形成互不干預又互相尊重的精神。
想做就做 創作是圍埋「你一句、我一句」
在香港做獨立短片難不難？Benson想也沒想，馬上就答：「難啊。」他無奈地說，如果有甚麼想法，都要申請資助或參加比賽，好大競爭。Ray點頭同意：「我哋之前參加過蘋果日報搞嘅『一丁目』（短片平台，於2019年成立），拍完個平台都執（今年二月，「一丁目」全組解散）。」Ray說做短片創作，常常要自己掏荷包。Benson卻說，浪頻道有些其他的project有收入，所以金錢上尚可應付。今次末日亭計劃沒有資助，為甚麼都做？Benson說，有想法便做，他們沒有想太多。
浪頻道2018年成立至今，Benson有沒有想過放棄？「遇到困難咪hold住先，又唔係受聘於邊個，可以獨立自主。你見我哋無乜出片，可能我哋嗰期有嘢撈；你見我哋出得好密，即係可能嗰期無乜嘢做。」
Brenda
Ray讀商業攝影出身，Brenda則從理工設計系畢業，是否早已決定好要走創作這條路？Brenda卻坦言：「其實都唔係。我無乜plan，做得開心咪做。」
在末日亭計劃中，電影導演麥曦茵、演員黃溢濠及邱萬城等都有份參與聲演，浪頻道是怎樣把這些人請來的？Benson笑言：「我哋本身friend嚟，有咩事梗係搵咗朋友笨先。」開完玩笑，Benson認真起來：「佢哋好好人，好肯幫手。」或者因為大家都是創作人，特別投契：「創作就係圍埋你一句、我一句。」
記者：馮曉彤
攝影：李仲賢、馮施樂