一如以往，勞工組都會找數後出Post總結同埋回應：
膳心小館前職員被辭職事件發酵一個星期，至今日事主終於取回全數代通知金及尾期工資（除了MPF沒有扣任何項目薪金）。
雖然對勞工組黎講，膳心事件只係我地幾十宗協助打工仔追糧行動中嘅其中一宗，但由於僱主係一間知名「黃店」，事件所引起嘅波瀾同關注亦遠超昔日嘅追糧行動。
勞工組只係同行者
有搵過勞工組都有收到「勞工組成員均義務參與，訊息未可即時即時回覆，請體諒」，無錯！勞工組大部分成員都係打工仔，唔會全職咁可以做到好多好多野，更加唔會識得晒所有法律細節，每一次行動，總會有事主身影，一齊去學、去查、去搞清楚自己權益。
自己份糧，自己追！打工仔自主唔容易，亦只有打工仔自己可以實踐，無得假手於人！
勞工組好多組員都試過比人欠薪，明白追糧中途你會無奈、會嬲、會自責、會無助、會反抗！我哋體驗過當中辛酸，深知一個人面對過程難受，所以先有勞工組既出現。
日常的直接追討方式
而事件之中，有唔少網民責問勞工組點解要咁「激」去追討一間黃店，甚至有人懷疑勞工組係咪「收左共產黨錢搞分化」。不過，如果大家睇返勞工組過往以踩上門理論、示威、擺街站同街坊講等等不同嘅追糧手法，我哋因應事主意願，直接追討可以好多樣化。
如果你都同意欠薪應該直接追討老闆，我地今次針對膳心嘅追討，實在難以講得上「激」。
不會和打工仔割席
既然明知協助事主追討膳心有可能令勞工組萬箭穿心，點解我地都係堅持要如常做出追討？其實講到底，都不過係一句「工人嘅尊嚴應該被人尊重」。
於勞資關係中，資方永遠佔據上風權力。資方有錢、有權、有勢，而打工仔除左團結就一無所有。有大家試想像下，如果今次事主唔係事後致電經理錄音做關鍵證據，事件會點發展？
可以肯定，膳心管理層必定會繼續堅稱事主係主動辭職，膳心嘅支持者亦會堅信事主係「冇證冇據屈人」、「分化L」、「共產黨派來」等等人格謀殺。
事主拎唔返嘅，唔止係七日代通知金，更欠一個公道。
當勞資糾紛嘅時候，唔需要用政治立場去決定是非對錯，亦都無必要為僱主犯法行為護航，岩就岩，錯就錯，唔合理嘅就唔應該接受！打工仔就唔應該同打工仔割席！
僱主責任不可逃避
有人問，點解要為左追三兩千蚊搞咁多野？呢個問題，我地都好想問，點解事主一個月薪唔係好多，每星期要返足六日，每更十個鐘，原先份糧七除八扣後時薪都係$40左右，遲到仲要逐分鐘扣糧嘅打工仔，連三兩千蚊代通知金都要比人拖欠？
點解想拎返應得嘅三兩千蚊搞咁多野？我地都好想有人可以解答。事主今次有人幫手，最終可以拎返應得人工，咁其他冇人幫嘅打工仔呢？
我地希望，所有僱主都應該將膳心事件引以為戒，從一開始就唔好有欺壓打工仔嘅念頭，否則可能得不償失。
有關事主和友人的人格指控以及不實聲明拒絕接受道歉
事實上，即使到宜家呢一刻，膳心亦未就首個否認聲明中「該前僱員之友人突然態度惡劣地高聲在店內大罵」、暗示事主貪財滋事嘅「理解員工有經濟上的困難」等人格謀殺向事主致歉。膳心早前稱「有CCTV作證事主辭職」、「無法聯絡事主」等不符事實嘅說法，亦不了了之。況且在老闆一方面道歉，但回覆傳媒訪問又說該錄音是「入?求其答」...令人失望...
事主雖然無意就以上抹黑一一細節追究，但亦希望借此機會向大家講出一個現實，就係工人被拖欠工資同追討過程中，往往都要經受過太多唔應該受嘅傷害、質疑、不公同等待。
亦因此，如果僱主認為傷害完工人之後，只需比返本來就應該比嘅工資，過去一切人格指控及大話就應該好似粉筆字咁擦走，咁工人嘅尊嚴又何在？在膳心事件中，僱主一開始又唔認炒人、又恐嚇要法律追究、並堅稱唔會調解。事後，又係咪可以將工人呼之則來揮之則去，話要談判就談判，隨意話出返糧就當失實既指控無講過？
我地堅信，欺壓過工人嘅老闆要為自己行為負上責任。最高管理者失職而責怪下屬是職場常見歪風，因此事主和友人不接受膳心小館的道歉！
公審定公開
今次因為係膳心小館，追討行動得到比過往多好多倍嘅關注同討論，有人就話我地係咪別有用心，特別招呼膳心呢？
一般得到事主同意，勞工組向來都會將個案公開，由打工仔自決。
首先，我地冇能力動員咁多網民（我地都想）。其次，按我地嘅想法，根本每一單拖欠人工嘅個案都應該值得大家關注。拖糧可以發生響我地任何一個人身上，如果打工仔都唔互撐，又有邊個會為我地發聲？
而好多人都提出唔應該政治化勞工問題，事主同勞工組都十分之認同！
但問題係每個人都好立體，同一時間有唔同角色，有人可以獨立一面面一層層睇，有人會一下咁睇晒，無論點睇都係有所關連，政治同民生兩者相扣，無勞工又點會有勞工法？民生隨時代轉變，勞工法又有無改善呢？勞工處制度保唔保護到打工仔？依家都仲有好多野勞工法保唔到既野更加要爭取（標準工時、取消強積金對沖、強制超時工作補水、集體談判權、強制離職後出工作證明等等）
另外都想講埋，於太多人關注，我哋都爆晒inbox投稿同埋爆料講唔同黃店內幕，我哋發覺原來有唔少Facebook Group都有議事規則，由於無地方去反映、討論、交流同埋澄清，好多打工仔都屈住屈住，真係健康咩？值得大家諗一下。
打工仔自主，唔止係職場上，更加係對於自由民主既實踐，有時候睇到同參與一啲高質素嘅討論，令我哋更加明白民主可貴之處。
任何人都係勞工組
最後，時不時總結Post都有人問點入會、事主之後有無加入勞工組等等問題，勞工組再次強調：追糧唔洗考牌，只要你敢對抗無良僱主，就係勞工組一份子！
依家資訊發達，任何人都應該要學勞工法，清楚自己權益，先知道有邊啲權益要推動，邊啲所謂職場文化根本唔合理，甚至唔合法！
咁又係咪只能接受？只有連結同事或者勞工組織一齊對抗權貴，基層生活先至有進步。同一社區下大家都係打工仔，多一個人識勞工法，可以解決好多勞資糾，任何人都可以幫人追糧，任何人都可以係勞工組！
--------------------------
事主友人的心聲：
大家好，我就係膳心口中所講喺店內「大罵」嘅友人。
對於係唔係「大罵」，自問當日無講過粗口或不雅語言，只係以茶記伙記嘅聲量講話，不過你我甚至網民都各執一詞，所以我認為放CCTV上黎俾大家網友定奪都不失係一件好事。8/8當日我哋企係CCTV前打電話，相信CCTV能夠清楚拍到以及收音清晰，希望相關片段仲未被剷除，並能還大家一個公道。
辭職？被解雇？
對於係事主自己辭職還是被解雇，係膳心嘅內部調查及翻查CCTV後，我都希望對方有一個簡單而直接嘅答案。
相信各位雪亮嘅眼睛都知道呢個先係今次嘅重點，但網上好多人不斷spin去其他事到，幸好都有好多心水清嘅網民。
分化？鬥黃？
跳出框框，放下傳統觀念，接受任何嘅可能性係成功進步嘅第一步。
其實我一開始都唔相信有人會為左幾千蚊會拖垮自己嘅聲譽，但倘若當日唔願意跳出框架，大家今日會接受到「知名黃店都會錯」嗎？
如果本身行得正企得正，點會怕人分化到？
黃圈就係要共同進步，勇於面對自身嘅錯誤，並改正自己。
倘若到今日你只追求政見一致，我無話可說。
但我所追求係更高層次嘅「良知」。
我深信真相係愈辯愈明，前題係有相關證據進行佐證。
在此衷心感謝勞工組，香港廚師聯盟，以及各同路人願意放下成見，共同追尋事實真相。
--------------------------
事主：
衷心感謝勞工組各位及廚師聯盟，不分黃藍都應該保護每一位僱員權益，食店也好商店也好，還記得 「不分化，不割蓆」嘛，並沒有「黃店永遠是對的」這個道理，當一間藍店沒有保護僱員權益，僱員去求助去控訴，你們拍手叫好，相反如果係一間黃店，則只會有人說分化、鬥黃，這並不甚麼分化、鬥黃，令黃店進步不也是我們最想看到的嗎？黃店也好，藍店也罷，僱員得不到應有的薪金，就理應去追討。