文：林紫蘇
今日在家工作聽到張建宗答記者，我呢啲脾氣咁好的人都真嬲！
政府話周三起全日禁堂食，同時限聚二人，仲有全天候在室內外都要戴口罩否則犯法。
於是記者問，食煙和無得番寫字樓食飯的人點算？
問食煙，我都估到食煙實無得豁免。但食飯！！！大佬！食飯呀！！張官的答法得兩點：1）大家都係盡量番寫字樓食啦（你有無聽人講野呀張官！）；2）郊野公園果啲，大家盡量保持環境清潔唔好亂丟啦......
郊野公園？
郊野公園？
郊野公園？！！！
張官個腦真係諗唔到，唔知道，唔認知，世上有好多「無得番寫字樓食飯」的人！！
建築工人？晚上修路掘路的路政署工人？行街推鎖員？速遞工友？清潔工？街站寬頻人？送貨員？送外賣員？在超市/百貨公司工作的外判推廣員？......
這些人不是人嗎？
同個做倉務的基層工友傾偈，佢話：「平時佢地出面做野已經夠辛酸，而家仲要迫排隊買外賣，買完仲要搵地方食！而家全世界都要買外賣，你估要排幾耐？食飯時間得60分鐘，攪得來都可能無左30分鐘。仲有大家都知香港街道咩環境，邊有咁多地方比你出面食飯？周街都係人同車，又熱，來緊又成個星期都有雨落... 我真係想像唔到會點！」
同香港婦女勞工協會的幹事傾偈，佢就嘆，其實清潔工一早就狀況好很差：「清潔工的晚餐好早就無堂食，而且夜更大多自攜飯盒。至於廁所清潔，因編更時間5-11時，本就無食飯時間！本來食飯時間都要好似偷番嚟咁！工友都慣在街食或自備午餐。一來7點開工，到11點午餐，很多餐廳未有午餐。二來貴，三來無得換制服著住去食會引人誤會「偷懶」。是有清潔工人去快餐食飯，但人數相對不多。」
是的，好早已聽過做廁所的清潔工好多係廁所到食，咁唔知對阿局長嚟講，係廁所食係咪好過係街食呢？
不過，女工會的幹事再補充到一個大家難些想像的工種：「反而，零售業最嚴重。基本上好多超市和百貨公司都規定她們企足成日，本來，午餐就是坐下來抖抖腳的時候。而家要花時間去輪外賣，超市和百貨公司又唔俾你帶回去食，又唔知去邊度食，又要趕回去開工，一遲到就俾超市百貨炸形，等陣唔好彩連份工都無埋。
好多推廣員（promoter）係散工，好多係由品牌公司或中介公司判去百貨公司或超市工作，因為她們不是百貨或超市的正式員工，於是就被當成二等員工，就算有有休息室都唔俾呢啲零散工使用，也不可叫外賣回來，更不可在店內飲食......
速遞工友就話：「冇得堂食，大家街食，聚集，傳播力度仲勁。不如宣佈停工！做速遞好趕時間，無可能等外賣，如果揾唔到食飯地方，就寧願唔食。一係買飽，一邊工作一邊食。結果無論係唔食，或者是邊做邊食，都會搞到身體好辛苦，就算唔中肺炎，都會患病。」
一位曾在中環做文職的朋友，更感嘆：「文職一樣唔好受，中環本身lunch時間都迫死人。而家如果全民等外賣，真係令人可以好趕時間，果時中環返工成日都要搵地方食飯，因為好多餐廳都滿晒人，搵得黎，都用左廿幾分鐘......其實我心好唔舒服，真係玩死打工仔！你諗下，由你踏出公司門口，落到樓下，到等外賣，到你真係可以搵到地方食飯，前後係用左幾多時間？ 而家連煙都唔食得，有幾多人係等lunch果段時間食煙，先叫做可以放鬆下個人。」
講真，就算有寫字樓番都好啦，政府唔強制僱主俾人在家工作，大家係寫字樓到一齊除口罩同時間食飯，咁同堂食有乜分別？
嗱老老實實，呢個張官真係唔做功課，睇番條例599I，飲食係可以做作除口罩的合理辯解，就算公眾地方食飯，都應該係唔犯法，咁答咪得囉！又唔做功課，又要展現官的腦裡面無打工群眾，之前打擊政敵時就話人地阻住打工仔女搵食，真係.......或者心地唔好的人蠢啲好，起碼你知佢欺壓你......
以家全部堂食禁哂，實有大把食肆結業，大把人失業，咁點解政府又唔強制今個月所有舖戶業主唔收租或減租？堂食全禁之後，一定有更大量更離譜的無薪假，之前就有富臨刻薄工友趁機想走法律罅踢走唔聽話的工友，咁政府點確保呢啲人的勞工權益？
仲有仲有，雖然以家政府唔夠膽叫移民家務工唔好放假，但如果僱主唔俾放假，政府有咩措施協助呢啲工友？有咩措施保障移民家務工得到最少的合法假期？都已經唔問她們在疫情期間清潔家居方面的工作量一定大增，OT有無得補都成好大的疑問啦！
然後又聽到張建宗話叫人連出街買餸都要少啲！痴線！你知唔知，好多住劏房的人，屋企根本無位買定幾日的餸係到？唔買餸食風呀！？
～～～～～～
筆者在網上都見到網民嘲笑政府離地之圖，貼出以大家欣賞下：
====================================
[草根.行動.媒體]
網頁：https://grassmediaction.wordpress.com
臉書：https://www.facebook.com/grassmediaction
telegram channel： https://t.me/actionofgrassmedia