（獨媒特約報導）食肆全日禁止堂食措施昨日起生效，午飯時間隨處可見市民於街上用膳的身影。坊間不少教會開放供市民用膳，獨媒記者今日到訪灣仔聖母聖衣堂及循道衛理香港堂，不乏地盤工人及白領在內用膳。聖母聖衣堂主任司鐸、神父羅國輝表示，基層市民沒有地方午膳，教堂提供地方是「做人要有嘅基本態度」。
神父斥政府涼薄 政策不切實際
灣仔聖母聖衣堂鄰近有星街垃圾收集站及地盤，不少工人今日中午到聖衣堂用膳，教堂為市民提供搓手液及消毒紙巾。
聖母聖衣堂主任司鐸羅國輝表示，昨日有人詢問能否在教堂休息，他會提供一支水及休息的地方。羅國輝稱「呢個係做人要有嘅基本態度」，又指沒有預料香港會出現市民隨街用膳的情況。看到基層市民沒有地方午膳，羅國輝指教堂有檯凳，亦可以做好防疫工作，因此決定開放予有需要人士用膳。
政府昨晚宣布今日開放社區會堂供有需要市民進食，今午又突然宣佈明日起恢復日間堂食。羅國輝指開放灣仔社區中心效用不大，「金鐘先有地盤，唔通你叫班工友拎住個飯盒搭的士咩？你唔知金鐘去灣仔要15至20分鐘，用喺路上嘅時間後，仲有幾多時間食飯呀？食完飯有冇得攤唞吓？」羅國輝又直斥政府政策不切實際，「唔好再講涼薄說話啦，叫人去郊野公園。」
湯家驊指須守限聚令 羅：人性問題
對於有教會和社區中心開放予市民入內用餐，行政會議成員湯家驊今早表示，開放的私人場所就會變成公眾場所，須遵守限聚令及口罩令。
被問到會否擔心違反限聚令，羅國輝表示「（警察執法）咁咪嚟囉！」，又反問「去廁所得唔得呀？有人瀨緊喇喎，唔通叫佢哋去郊野公園度痾呀？」羅國輝續指「做人都係同一目的去天國㗎啦」，指在人性問題前，仍談及限聚令是不可能，真正的問題在於政府涼薄及不實際的政策。對政府兩日後即放寬禁堂食令，羅國輝則笑言「佢哋唔係朝令夕改，係知錯能改」。
地盤工洪先生
禁堂食兩日即放寬 地盤工：當我哋馬騮咁玩
地盤工人洪先生今日到聖母聖衣堂用膳，指有冷氣舒服很多，食完亦可以休息一下。洪先生對於禁止堂食措施表示「梗係唔好啦」，又指「你試吓係佢自己出去食飯，咁X熱，唔好話做嘢呀，食個飯都成身汗。」
洪先生亦表示午飯時間對地盤工人來說，是一天中唯一的休息時間，覺得政府全日禁堂食措施不體諒市民。洪先生指昨日被逼在地盤附近的公園午膳，「又多蚊、又熱、又焗、又落雨」。他續指，政府未有考慮勞工的情況，「12點排隊買飯，咁多人買排到12點半，lunchtime 都完啦。」政府明日放寬堂食限制，洪先生直斥政府「當我哋馬騮咁玩」，他之後會轉到餐廳堂食。
牧師潘玉娟
牧師：想食餐飯啫，點解香港人要淪落到咁？
循道衛理香港堂開放1樓及地庫供市民用膳，共可服務約30人，較多白領到場用膳。場地亦有播放健康資訊的短片及指引。
牧師潘玉娟指教堂的使命是服務街坊，一直開放供人休息。她又指周邊食肆沒有廁所，老闆都會叫客人到循道衛理香港堂如廁。潘指只要能夠服侍基層就會做，因此今次決定開放供人用膳。
潘玉娟亦指，昨日看到很多基層市民隨街用膳，慨嘆「都係想食餐飯啫，點解香港人要淪落到咁嘅狀況呢？」她亦批評政府未有考慮基層的情況，很多清潔工都不能到辦公室用膳，所以教堂冒着疫情風險都要「做我哋應該做嘅嘢」，提供舒適的地方給基層市民。
潘玉娟表示得悉政府明日放寬堂食，但「會做埋聽日看市民有沒有需要。」她又指政府改變政策「好過佢唔改」，稱希望日後政府「有責任落地一啲，唔好坐喺辦公室空談啲政策出嚟。」
循道衛理香港堂