今日！就係今日！我終於從DHL派送員手上拿到我的BNO，即那本好可能被某國視為不合法旅遊證件但很多人口裡說愛國身體很誠實去申請的BNO！當派送員稱呼我為「廖先生」而我打開紙皮信封發現從英國入境署寄回的信封上將我的姓由Lui寫成Liu，我的確有擔心過BNO會唔會寫錯，好彩！所有資料正確，有效期，十年。
我不斷被身邊朋友話我咁遲先攪，咁結果都攪到喇，不如寫一寫究竟我幾時攪，點樣攪，等幾耐之類，等一眾比我更遲或者等得太久很擔心的朋友有個心理準備啦！
首先，本人仍然有舊BNO，但已經過期N年。所以，到這個官網開始時，因為過期太久，據知要答的問題跟提供的文件比起無過期咁耐係多左既。另外呢，據知因為武肺原故，當局講到明非緊急服務暫停，所以閣下未有回音或者仲未郁手既，就要預左有排等喇。
好，坊間好多申請懶人包，所以點答問題亦有不同說法，我就對於答問題與提供文件方面回應一下我既做法：—
證件相：
本人係叻到係屋企背住白牆自拍大頭相過關，我無出去搵人影。父母與祖父母資料：
我有填阿爸阿媽幾時出世同身份證號碼，仲叫佢哋講個「應該係」正確既結婚日期，但我無寄佢哋結婚證書；祖父母幾時結婚之類我全部答唔知，喂，過咗身喇好嘛舊BNO要寄番去；特區果本要由頭到尾彩色影印一份（封面封底都要）正本唔駛寄；身份證正面背面彩色影印本；仲有出世紙正本。有人話佢寄出世紙副本，但我見坊間都話寄正本，咁，無所謂啦，佢實寄番俾我嘅。
住址證明：
佢就話要政府機構先承認啦，我就將報稅表第二頁有地址同名果封寄俾佢；有朋友就話寄銀行月結單都無事，但有傻豬寄咗用中文寫既文件去就俾人要求再提供，我明白依家要搵封正本信件好難，不過叫銀行出份月結單Hard copy應該簡單少少，應該無事卦，佢咁多件處理。要搵人confirm your identity：
本人有位識左幾十年同學仔住英國，咁自然交出佢個名同email address佢轉個頭就online confirmed啦！佢寫嘅要求都幾多嘅，我就唔清楚呢樣同坊間成日講嘅副簽一唔一樣，但又聽到有人話有BNO就可以幫人副簽，佢果度明明寫咗，要長住英國㗎啵。
好喇，交埋錢（九十幾英磅）就成功左第一步，你係會收到 Email 叫你好寄文件過去喇。本人呢就29/5經DHL寄既。當時個個都話用DHL，咁我公司附近鰂魚涌果間的確最少人排嘅。DHL係貴嘅，四百五十左右，咁服務係好嘅，你唔駛另外預備信封，佢有好硬淨嘅公文袋俾你，咁我將需要寄嘅嘢用 file 裝好放入去俾完錢就閃，當然無再磅水買保險啦，唔見咗俾番錢你都無用。而我弟弟呢就遲我一日，佢就用Fedex，拎埋折扣平成半，服務無咁好喎佢話。我果份呢，就如期通知我2/6寄到喇，弟弟果份就遲一日啦。
若果閣下唔想排隊而且錢大把，當然可以預約速遞公司上嚟處理收件啦。
留意番，英國俾武肺攪到市面好多服務都停頓中，份件收咗並不等於真係收咗 —— 此話何解？我直到12/6先收到 email 話 documents received。然後15/6再入去 track 我個 application 就已經話 your application is being processed.
咁久不久又入去 track 下啦都係無回音，但亦好好彩無收到 email 要求我補交文件，我相信當地都好多人仲要 WFH，等，係預左既。直到20/7，我又收到 email 喇！話我知申請被批喇，佢話新 passport 印緊，得咗就再話我知。
然後非常快地，22/7我又收到 email 話 your passport is on its way！咁要留意番，passport 會先寄俾你，文件會用另一份速遞寄俾你。於是我星期五就收到 DHL 短訊話下星期一派送，而我今朝終於收到喇！至於另一份，仲未收到。
我知好多朋友等得太久，又有朋友話佢依家聲稱唔駛補領，只要有過都可以去英國移民云云，我就咁睇啦，你估日後拎住BNO世界通行啲，定係你手上果本特區護照方便啲呢？
祝大家好運啦！