（獨媒特約報導）立法會民主派初選星期六及日投票，公民黨鄭達鴻接替陳淑莊出選港島區。公民黨早前在中環造勢宣布參選，在一班老大哥面前，鄭達鴻顯得不太起眼。梁家傑、余若薇和陳淑莊均呼籲市民支持這名法律界新人，記者在造勢後問道，「今屆有無人抬轎？」鄭達鴻斬釘截鐵稱，「2020年啦，咁樣唔啱規矩，俾我自己嚟一次吧。」
2000年，當時屬獨立的余若薇在港島補選中勝出，2004年以四十五條關注組成員身份連任成功。2008年代表公民黨的余排名第二，將陳淑莊同時送入立法會。
2012年余若薇轉到新西替郭家麒抬轎，公民黨派出時任主席陳家洛排第一，但得票不足以令排第二的陳淑莊當選。2016年陳淑莊與鄭達鴻合組名單，僅僅以末席當選，稍比王維基多出2,081票。
「總要有人堅持價值」
十多年過去，時代的風已轉，參選要講本土，談抗爭。去年反送中運動，今年港區國安法壓境，香港法治被指一早已死。在「法治已死」的浪潮下，鄭達鴻卻剛唸完法律，更準備要入行，「國安法下，唔好話法治，香港都死咗啦，但總要有人堅持價值。」
記者先單刀直入問道：「會否有時不予我的感覺？」
承認時不予我 讀 Law 唔想「fooled by others」
「係有少少嘅（時不予我）。」鄭達鴻承認，社會對律師、大律師的尊重程度不復當年，「讀法律呢個係自我期許。法律專業再無舊時咁被認同，但喺亂世，每個崗位都要有人好天真、好蠢咁覺得做緊嘅嘢有價值。」
三十有一，鄭達鴻七年前隻身到紅區北角做地區工作，成功在東區打破一片紅當選區議員。四年前排陳淑莊名單第二位，今屆正式上陣。
時間回到2016年3月，鄭達鴻當時正籌備和陳淑莊參加立法會選舉，並同時下定決心要讀法律，「做地區工作，有法律背景會得到較多尊重，人哋唔會淨係覺得你係一個?仔。你 quote 到法律，人哋無得拗。」
「識咗法律，唔會被人拋到你。街坊會質疑你『?仔識啲咩，我律師朋友話⋯』，但識法律就可以 not fooled by others。法律工作者有 fool others 嘅能力，好多建制派法律學者就係 fool others 去呃緊人，我就要同人講 not fooled by them。」
舊時王謝堂前燕，飛入尋常百姓家。公民黨又名「大狀黨」，即將成為大狀的鄭達鴻承認，法律專業是公民黨傳統，但「讀law」並非為了要與黨內一眾大佬看齊，「自己決定，報完去讀先話俾佢哋知。」
訪問中，鄭達鴻多次停頓下來，「我四年前講嘢無咁快。」然而，時代的腳步已不容從政者慢下來。「你口中的價值其實係咩？」
鄭達鴻：法律從業員需應對已死的法治
今年6月9日，鄭達鴻和一眾法律系同學，在警署外為被捕人士作被捕支援。同學在警署內入資料和打電話，站立了足足八小時。「你估佢哋唔知法治垂危、已死咩？但法治死唔死對佢哋根本唔重要， 佢哋有渠道用自己專業救人，呢個就係法律從業員的風骨。」
「嗯，當呢啲人仍然存在，我就唔覺得法治完全已死。如何應對已死嘅法治，和光復法治先係我哋要做嘅事，我諗你明我講咩。」
新民黨的李梓敬同是新科法律博士，是鄭達鴻的同班同學，「呢個學期一起上堂，十人小組上堂。政治立場唔同，無再一組。」
鄭達鴻是球迷，足球和籃球都愛看。小學二年級那年，媽媽買了一件紐卡素球衣給他。他自此愛上紐卡素。後來中學打機玩「足球經理人」，鄭達鴻愛用列斯聯。這幾年已沒有太多時間看英超，但仍然堅持看列斯聯的賽事。
記者不禁問道，「你係球星定係球員？」
「我係球員，球星係需要養成，但我會以球星做目標。不過，我都會問，呢個時代仲要唔要球星？我都有保留。呢個時代其實需要好多好球員。」「首先做好一個球員，球唔球星唔係自己講。當你發揮到、有存在價值，你咪係球星。」
時移世易，紐卡素的心口廣告由當年 Northern Rock，已成為簡體字的「樂天堂」。中國因素不但影響英超，甚或全球，香港同不例外。
今年，公民黨或許遇上歷來最大挑戰，鄭達鴻需要力保港島的橋頭堡，形勢較2016年新界東補選更嚴峻。鄭達鴻亦直認不諱，指選舉的壓力非常大，「減壓方法係餵貓同砌傢俬，仲有落區了解民情。」
在初選論壇中，鄭達鴻便遭多名「素人」（區議員）圍攻，質疑公民黨在終審法院候仼首席法官張舉能的任命中投棄權票，還被翻起一票三投的舊帳。
鄭達鴻表示政黨難免有包袱，他笑言，「隔離許智峯投咗棄權票，我都無投，你問我做咩姐？但同 AY（楊岳橋）、JT（譚文豪）會有聯營效應，有得有失吧。」
救理大／克服恐懼
去年反送中運動，11.17 理大遭到警察圍攻，「母校一定要返。」鄭達鴻翌日清晨六點便到達尖東，防暴警察衝向人群，他和近四十名市民走到附近商場內，一度被困在地庫。鄭達鴻甫開門，便遭防暴警察用槍指著，他要求對方讓市民離開，「佢哋全部都無辜，一係你就拉我。」
回想起來，仍猶有餘悸，鄭達鴻沉思說：「驚一定驚，但如何克服恐懼先係呢個世代要面對的事。」
「逆轉紅地，不離不棄」，這是鄭達鴻的競選口號。他解釋，概念來自電影《玩轉極樂園》，「一個人離世唔係真正死亡，當世上再沒有人記得你，先係真正死亡。當香港人同唔喺香港的人都不再在乎香港，咁就真係已死。」
