Adam Mitter，一個你冇Google、冇去用Wikipedia未必知道何方神聖嘅英格蘭職業足球員，最近接受衛報專訪，講述佢喺印尼嘅經過，Adam Mitter現時效力印尼甲組球隊Persiraja Banda Aceh，一支來自亞齊特別行政區首府班達亞齊嘅職業足球隊，2019年取得升班資格， 2011年曾經係當時印尼其中一個頂級嘅職業足球聯賽Indonesian Premier League嘅參賽球隊，前東帝汶國腳，效力過南華嘅巴西裔球員Murilo de Almeida都曾經效力過Persiraja Banda Aceh。
Persiraja Banda Aceh並非印尼聯賽傳統勁旅，但喺亞齊有一定影響力，呢個地方曾經出現武裝力量，嘗試脫離印尼立國，喺20世紀初之前，亞齊屬於亞齊蘇丹國，從未被荷蘭正式統治過，所以有當地人認為亞齊有權決定自己命運，1976年開始以暴力方式爭取獨立，去到2005年，印尼政府同亞齊分離主義人士達成和議，結束多年流血衝突，亞齊立國願望落空，換上嘅係成立特別行政區，加強亞齊自治權，實行類似一國兩制嘅模式。
亞齊成為印尼入面嘅特別行政區，擁有一啲特別法例，亞齊特別行政區係印尼唯一實施伊斯蘭教法嘅地方，好多外國媒體報道嘅印尼伊斯蘭教法條懲罰，例如鞭刑，都係來自亞齊，仲有特別嘅伊斯蘭教警察喺市內執行任務，近年亞齊聞名海外，相信都係伊斯蘭法條，只要賭錢、飲酒、通姦，同配偶之外嘅人喺公眾場合表現親密等等，捉到就有機會被公開懲罰，唔少人權組織都批評呢啲極端法條。
但亞齊嘅其他發展呢？好似從來唔係國際社會會關注，亞齊最受歡迎嘅體育運動係足球，喺亞齊，好多嘢都受限制，但足球可以繼續存在，男女均可入場，除咗Persiraja Banda Aceh，亞齊仲有North Aceh FC、Persas Sabang、PSGL Gayo Lues、 Persal Aceh Selatan 、PSAP Sigli、PSSB Bireuen、PSBL Langsa、PSLS Lhokseumawe、Aceh United、Persidi Idi Rayeuk、PSAB Aceh Besar、PS Pidie Jaya等等，當中有啲已消失咗，例如Aceh United，2019年同PS Timah BaBel合併成為BaBel United，成為邦加-勿里洞省嘅球隊。
近年唯一能夠衝出海外嘅亞齊足球新聞，並非一件好事，2014年，一場印尼次級聯賽Liga Indonesia Premier Division嘅比賽，由Persiraja Banda Aceh對PSAP Sigli，Persiraja Banda Aceh前鋒Akli Fairuz埋門時被門將踢中肚腩位置，送院後冇耐死亡，此事件得到海外多個媒體報道，但好多報道連比賽地方喺班達亞齊都冇提過。
如今亞齊足球終於登上國際，雖然主角係梳士貝利出世嘅Adam Mitter，但總算係一件正面事。現時印尼甲組聯賽有17位外援來自歐洲，只有Adam Mitter來自英格蘭，司職中堅，登陸印尼嘅歐洲球員，大多來自東歐及荷蘭，英格蘭球員非常少，對上出現係2018年，前紐卡素球員Danny Guthrie簽咗Mitra Kukar一季。英格蘭球員屬於印尼甲組聯賽''少數派''，但去印尼發展嘅英格蘭球員，大部分來頭不少，Danny Guthrie之外，2017年有前韋斯咸球員Carlton Cole效力Persib Bandung、2013年有一名喺澳職踢過嘅英格蘭球員James Robinson短暫效力Sriwijaya FC，再數就到Marcus Bent同Lee Andrew Hendrie，除咗James Robinson之外，都係曾經有名氣，CV好靚，身世同Adam Mitter差好遠。
Adam Mitter出身黑池青訓，2011年加盟蘇格蘭超級聯賽喜伯年，正式展開職業生涯，但冇出過場，離開蘇格蘭，效力過基特靈、沃靈頓兩支英格蘭南部、北部聯賽球隊，2013年去到瑞典效力丙組球隊Ånge IF，協助Ånge IF升班後返英格蘭，先後效力巴羅、佐利，由於踢嚟踢去係乙組以下聯賽，Adam Mitter再次外流，今次遠赴澳洲National Premier Leagues South Australia加盟球隊West Torrens Birkalla SC，一季後再去到東南亞效力菲律賓嘅Loyola Meralco，又一季後再返去英格蘭踢半職球隊斯塔福特流浪，冇耐又去到亞洲，效力印度乙組嘅Fateh Hyderabad A.F.C.，一季後返菲律賓效力Ilocos United，之後去過新加坡同加拿大，效力後港聯及溫尼伯榮軍，2020年加盟Persiraja Banda Aceh。
唔好睇佢經驗咁豐富就以為Adam Mitter係老球員，佢只有27歲，佢更似背包度假，而非展開職業足球生涯。只能長期喺英格蘭地方聯賽落腳，Adam Mitter選擇跳出舒適圈，體驗環球冒險之旅，衛報專訪內，Adam Mitter講到外流好處，佢話：「我的心態是希望看到世界，我們只活一次，所以我很幸運足球使我能夠環遊世界。我在亞洲，加拿大，澳洲打過很多比賽，這些都是人們想要去參觀的地方，幸運的是，我有足夠的報酬去這些地方做自己喜歡做的事。」
同時，都講下外流嘅目的地體驗，效力瑞典Ånge IF，隊中好多英格蘭球員，但Adam Mitter被揀選為隊長，印度有一班熱情足球迷，足球迷熱情唔比板球迷差，菲律賓球迷唔多，但地方靚，所以佢踢咗一段時間。而印尼之旅，令佢最興奮，係印尼聯賽氣氛超好，仲可以享受星級待遇，佢話：「在印尼聯賽停止之前，我去喝咖啡，旁邊那個傢伙呆住了，他開始顫抖著說：''這是我一生中最美好的一天，我不敢相信我會見到你。''這的確使人們看到了足球對人們意味著什麼以及對這些人取得成果有多重要，因為當我們走上街頭時，每個人都知道你是誰，這真的就像是一名英超足球運動員。」。
Adam Mitter喺家鄉冇人識，但去到印尼，去到亞齊，佢立即成為Super Star，好多人都認得佢，當地人對本土足球投入程度高，令佢感覺到被受尊重，佢話：「就球迷體驗而言，印尼是最好的。 每個體育場都座無虛席，每場比賽有40,000-50,000人入場，真像是在英超聯賽中比賽。 在印尼踢足球真是令人難以置信的經歷，尤其是在球迷面前，這就是我來這裡的原因。」
話每場比賽有40,000-50,000人入場，係誇咗，但間唔中有啲比賽係有呢個數，例如今季Persija對Borneo，有50,826人入場，Persebaya對Persik有50,000人入場，當然，如果你冇表現，你都會好大煲！
英格蘭實在有太多職業球員，但能夠登上英超其實唔多，Adam Mitter好鼓勵一啲自知冇乜機會踢英超英冠嘅英格蘭球員，跳出舒適圈，出去闖，開眼界，上年Adam Mitter收到馬爾代夫球隊聯絡通知，Adam Mitter甚至唔知道馬爾代夫有聯賽。「想到了馬爾代夫，並想到了這是一個多麼了不起的國家。 當出現類似的事情時，它確實使您意識到足球確實覆蓋了全球。」。