最受歡迎不等於最好其實一直都知，又或者普羅女性觀眾好迷的劇集，本人就未必喜愛，例如早年的《太陽的後裔》，劇情之老土與不合理在第十一集之後實在離X晒大譜，不過，受歡迎的特色是，男女主角靚仔靚女，劇情非常TVB，即係唔駛合理唔駛坐定定睇，至緊要大團圓，一定無事。
於是，年初大爆的《愛的迫降》我前陣子睇完。之前好多人（女性朋友啦）話好好睇睇左好多次一定要睇，然後試過有一次係餐廳聽住幾位已婚女性講到眉飛色舞好浪漫玄彬好靚仔睇左幾次再迫老公一齊睇之類（係，我有同學話俾佢老婆迫看），我亦向我細佬問過：「都係果類質素你唔睇無乜可惜。」咁，我同我細佬睇劇口味幾近既。
咁，若果閣下係《愛的迫降》死忠粉絲又覺得呢套劇神聖不可侵犯，建議閣下唔好睇落去。
南韓特級有錢女尹世理（孫藝珍）為南韓富商么女兼私生女，世理一早自立門戶不靠父蔭擁有成功個人品牌，其兩位兄長一直對於承繼父親業務爭個你死我活，但兩人能力如何父親心中有數。父親爆大冷決定將繼承權給予世理之後，世理因為堅持親身試玩公司產品滑翔傘時遇上龍捲風被捲入去而竟然死唔去仲吹左去北韓（！！！），剛巧被大尉中隊長利正赫（玄彬）發現而救了世理。咁由於你無啦啦有個南韓人非法入境北韓，循正常途徑就肯定俾人捉去盤問你是咪間諜你飛過黎做乜之類，正赫好清楚，所以放世理走，而咁岩，世理嘗試逃走期間走錯路，俾正赫幾位手下發現（劇迷叫佢地北韓F4，嗯，用住呢個代號），正赫惟有將世理帶番屋企，再諗辦法送佢番南韓。
咁男女主角日久生情你就預左，因為向對世理身份質疑既軍人解釋而將世理說成自己未婚妻，而世理則變成曾經被派去南韓之間諜。咁既身份，世理係軍官私宅村就會同果班北韓大媽團相處（係，北韓大媽團係全劇另一重要看點），笑料主要來源都係北韓大媽團。
咁好喇，典樣將南韓女送番南韓呢？天才正赫（丫，交待少少，佢原來係軍總政治局局長個仔，又原來身邊個個都唔知架播你話幾神奇）首先嘗試用船偷運世理走，失敗左啦（都係造就無啦啦第一次男女主角打車輪），跟住阿世理好急要番去開股東大會然後唔知典解去邊度搵到一套滑翔傘（係，完全無交待唔知邊度變出黎）走上山天真地準備自己飛過南北三八線番屋企，又咁叻俾正赫發現，在未被其他軍人發現（因為天真世理囉個無線電嘗試同南韓聯絡（！！！）），神奇既劇情出現喇！正赫一攬世理用滑翔傘跳落山！嘩！浪漫到呢。。。
我真係笑到收唔到聲，喂呀，我究竟睇緊乜呀？
好喇，世理二哥無意中得知個妹係北韓，就搵人希望將佢永遠留係北韓唔好番黎同佢爭身家，咁呃左世理二哥好大筆錢既男配角具承俊（金正賢）逃亡去左北韓嘆世界，又俾仍重遇世理，佢當然想打世理主意啦，咁呀正赫第二個方法送世理走就係安排佢入國家隊飛去外國參賽，咁同時間阿正赫為左救世理中槍啦，咁女主角當然唔捨得佢無走到啦，於是，又走唔到喇播！
奇蹟出現喇！天才正赫又唔知典解醒起，丫原來南北韓之間有個秒道可以走番去架播！於是撻自己係政治局局長個仔叫佢上司幫佢成隊人安排再去邊境當值，方便佢送世理番南韓咁啦！
係呀，講到好緊急好怕俾人發現，但阿男女主角係南北線Hae左粒幾兩粒鐘都唔捨得分開。重點係，你一早知有呢個方法，之前攪咁多野，托咩？
當世理成功番左南韓，北韓果邊就因為正赫成功發現邊個當年殺死佢大佬又搵到證據拉左大奸角，又好神奇地奸角走得甩（呢方面可能較容易，應該同國產凌凌漆周星馳無俾人槍斃情況類似），更神奇係，奸角走得甩，竟然大仇口到要偷渡去南韓，要捉世理番北韓（我睇到呢度再笑爆咀）。
咁正赫當然要去救佳人啦！佢又偷渡去南韓喇播（丫原來偷渡去南韓咁容易），正赫老豆知道個仔玩到咁大，仲funny，叫北韓F4加埋改邪歸正既竊聽員扮軍人國家體育代表隊去南韓搵番個仔番黎（！！！）無他既，為左北韓F4係南韓又有多D笑料咁囉！
全劇笑得我最開心，當然係其中一個F4同崔智友見面啦！
之後既劇情可以話亂晒籠，最爆趣都莫過於，世理為左救正赫被槍擊，竟然可以開車衝過去為佢擋子彈（！！！）而又擋到（！！！）再死唔去喎！
咁非常容易偷渡去南韓既正赫與北韓F4等人又好似完全唔怕俾人發現自出自入醫院都算啦，最後，大奸角當然瓜左啦，男主角當然係南韓被審問啦，又當然一定攬晒上身唔想累左條女咁咁咁啦。
我比較失望就係，你都寫到亂咁黎，而我亦相信或多或少有醜化北韓（包括相關生活係點呀之類之類），做乜唔玩大佢，俾阿男主角變節留係南韓嗟，咁班女觀眾咪會開心跳起Yeah囉！
所以，我好同意有朋友話我知，除左北韓F4與大媽團之外，男女配角係好睇過男女主角拖拖拉拉，丫唔好意思，都唔記得介紹，女配係北韓最大百貨公司既千金徐丹（徐智慧），早年因為父母之命被安排與正赫結婚，咁佢又真係好鍾意正赫，奈何正赫愛南韓世理，咁具承俊見多佢幾次同佢日久生情，同樣因為兩人係南北韓身份問題，原本具承俊能夠成功離開北韓但為左救徐丹結果命喪槍下。呢段情，原本幾感動架，不過救護車一幕，呵，是咪又係醜化北韓架？
救護果位見佢疑似斷氣，摸完佢脈膊，唔係搶救，而係第一時間除氧氣罩，巧Funny呀喂！
好喇，我無補充。
各位迷上玄彬的話，我會強烈推介你地去睇佢同宋慧喬定情既《他們的世界》，又或者我第一套識佢既《我係金三順》，至於孫藝珍，去睇佢既戲啦，《假如愛有天意》或者近年既《藉著雨點再愛你》，都非常唔錯。
另外，各位娛樂版記者，唔該唔好是是但但就寫「愛的迫降大熱倒灶只得人氣獎」，套劇真係唔得嘛！我近日睇完《山茶花開時》（百想藝術大賞獲得大獎），真係好睇好多好多好多囉。
當然，係唔夠靚仔靚女架喇。若果女士們要睇AV要繼續FF的話。