題為編輯所擬
一個限聚令，一個反對通知書，就可以令支聯會唔搞六四晚會，叫大家自行點燭、網上悼念了。
咁點解30年黎每年都有十幾萬人身體力行出黎悼念，點解唔一早番屋企網上悼念？唔通六四晚會真係同清明重陽無分別？
根本參與六四晚會既人，都知六四晚會本身係一種反抗，係中共既禁忌。每年以萬人計既集會，基本上係代表30年黎香港人對民主既追求。即使近年好多人對六四既理解或感受唔同，但直到上年反送中100萬人遊行前，亦都有好多人記起當年八九民運學生既一句「去遊行，因為是我的職責」。結果上年既六四晚會，人數亦都係近年最多。
無論如何，六四晚會都係一種集體抗爭。當政權一直以黎想淡化、扭曲、遺忘歷史既時候，六四晚會即使幾溫和、幾無用、幾唔呼應時代都好，都起碼有一層意義，就係令香港人由細到大都記得有六四，記得中共係一個點樣既政權。
當然，唔洗講六四晚會係國際上對香港既意義。
一直係台上高呼堅持到底，永不放棄既人，今日政權以一個限聚令封禁，有堅持到底嗎？還是單單基於六四晚會由「合法」變成「違法」，所以就叫大家自己「遍地開花」了？
所有香港人而家都知，今日既限聚令會換成聽日既國安法。到時唔好話六四晚會，連支聯會本身都變成「違法」既時候，咁又會唔會「堅持到底」？定還是唔合法，就唔搞，就唔做？
其實我好明白，作為一個組織，貿貿然係今時今日叫人出去抗爭，好容易變成叫人送頭。但我都覺得唔等於會變成而家咁，好多香港人都進化左，唔洗講得太白大家都會識做，亦都識保護自己。而最終既問題都係，當「違法」既範圍愈擴愈大，要去到邊個位，先會去反抗？中共都有底線思維。支聯會既底線係邊度？
只想問一句，當年六四死去既人會點諗？當佢地因為抗命、「違法」而死。而一直話為佢地爭取平反既人，因為怕違法而放棄堅持。
六四晚會就係咁樣因為一條限聚令，係幾乎無壓力同無反抗下，成為過去，即將如同六四一樣成為被遺忘既歷史。將來既人如果知道呢件事，又會如何演繹今日既香港呢？