維園對你黎講係咩？
年宵？今年政府以反修例運動為由，取消全港15個年宵乾貨攤位，只有濕貨與快餐攤位。
六四燭光悼念集會？今年好大機會因為政府既無科學根據既限聚令未完為理由而取消。
七一遊行起點？已經好多年前比愛國愛黨既活動霸哂足球場
城市論壇場地？黎緊仲有無香港電台都唔知。
當我地諗諗下，以上所有活動已經慢慢不知不覺咁消失，所謂立左國安法又點會真係馬跑得更快，舞跳得更好呢？又點會仲有遊行、集會自由呢？
————————————————
六四去邊好？
有人問今年六四去邊？腦一直思考我既答案係咩，又係到諗點解唔可以好似以前咁答一定入維園。（因為恐懼同打壓已經係我地既身邊）
大家仲記唔記得有一年六四好大雨，全個場水浸，當時我係中學生聯盟個檔位，望住大家走，好失望。但停左雨之後香港人再擁上，果個畫面真係一世難忘，可能因為細路仔第一次見。（唔知會唔會再見到呢？）
由接觸六四，到今日其實從未有諗過去其他地方悼念，因為呢個地方，過去都係全球最大型悼念六四既集會地方，充滿好多代人既堅持，亦都係唯一咁多年黎集結香港人，對抗同控訴中共屠夫政權既地方。唔知當大家接觸六四去邊會點答，但希望大家唔好因為恐懼而放棄自由，用盡辦法叫埋身邊人一齊走出黎悼念六四。
最後，最想講既係六四我會自己去維園，大家可以就1個約6個，7人一組去維園。如果唔可以就響應支聯會呼籲遍地開花吧。（當然有機會比人告，但悼念六四呢件事，係比人告幾多條罪都要做既）。