今日早上立法會內會選主席，先有梁君彥欽點財委會主席陳健波，取代公民黨郭榮鏗主持選舉。其後再將大部分民主派議員逐出會議室，並開始投票。
而李慧琼就係只有保皇黨議員投票之下，當選成為內會主席。此情此景，儼如人大會議中習近平獲全票通過當選。
「議會鬧劇」相信大家司空見慣，有人會隔岸觀火「食花生」睇泛民主派議員衝擊；有人會保持憤怒，大叫「議會不公」，呼籲市民9月要踢走保皇黨。正如我過往強調，切勿對議會抱有希望。對我而言，民主派於議會內任何形式嘅抗議，我地都應該支持。但35+只係為爭奪最多資源協助同路人嘅手段，我等亦認清議會無法制衡暴政嘅事實。在此，本人並非宣揚失敗主義，而係想大家深思，自己可以做到啲咩？
記唔記得當日「逃犯條例」係點樣繞過法案委員會直上大會表決？記唔記得當日「禁蒙面法」係林鄭引用《緊急法》，無視立法會嘅情況下訂立？當時我地感到無能為力，但同時我記得，係6月9號林鄭宣布繼續二讀時，大家嘅憤怒，當晚已經有手足進行第一波攻勢；記得10月4號晚，港人因「禁蒙面法」走上各區街頭，遍地開花。
記得7月1號衝擊立法會正正因為我地對議會無希望，認清議事廳內只有黑箱作業。
半年前嘅今日，理大被包圍。藍絲指責我地破壞校園，譴責暴力。然而我地知道，今日議會內所發生嘅先係切切實實嘅暴力。
「國歌法」、「廿三條」殺到埋身，與其再指責當日白頭佬嘅懦弱無能，不如諗下自己可以做到啲咩？香港人，切忌「造神」，無人可以幫你「光復香港」。
沒有暴徒祇有暴政，光復香港時代革命。