今次我地好榮幸邀請到以十八蚊餐出名嘅八道餐廳！二零二零年居然見到二十蚊以下嘅正餐，喺全香港應該都屈指可數。我地一齊嚟探討一下，喺逆市之下以十八蚊嚟救濟有需要人仕，究竟會真係幫到佢地，定係會比貪小便宜嘅人拎盡着數，生意倒蝕呢？
小編：雖然你地賣十八蚊餐賣到出咗名，但網上有人話你地係因為冇生意所以嘩眾取寵，咁首先想了解你地生意反送中同武漢肺炎前後有咩分別？
八道：反送中嗰排就冇乜分別，最緊要都係武漢肺炎。受疫情影響，生意大約下跌咗起碼三四成。（小編：咁有冇申請援助基金？）有有有，有申請，但幫助唔大。就算個津貼幫補到租金，又唔夠俾人工，仲有燈油火蠟等其他開支。所以呢筆基金係唔夠cover嘅。
小編：想了解一下點解你會有賣十八蚊餐嘅念頭？
八道：其實十八蚊餐呢個諗頭係因為嗰時我都唔知玩得幾耐，既然係咁，都唔爭在啦（小編：盡地一搏？）唔係呀，個心態係唔蝕都蝕咗咁多，唔爭在蝕埋佢。衰啲咁講，唔得咪算囉，都叫做努力過。當初原意其實係想派口罩嘅，想揾啲獨立包裝。但嗰時大家都知啦，唔好話獨立包裝，就算係非獨立包裝都一罩難求。跟住去到三月中左右，可能真係捱唔住啦，咁不如出個平價餐，十八蚊又好幾多錢都好，當幫下人，幫到就幫，唔係為咗賺錢，趁舖頭仲喺到嘅時間盡量幫助有需要嘅人。
小編：驚唔驚叫十八蚊餐嘅人係貪小便宜而叫十八蚊餐，而唔係幫襯正價餐？
八道：呢點就冇諗過，佢要買嘅咪賣俾佢囉，又冇乜所謂。都係嗰句，唔蝕都蝕咗咁多，都唔爭在，蝕曬佢咪算囉。
小編：咁自從賣咗十八蚊餐之後，你地成功make noise令唔少人慕名前來「懲罰」。但係十八蚊呢個價喺扣除燈油火蠟之後賺到幾多，同埋整體嘅生意額會唔會有所影響？
八道：十八蚊餐其實扣除咗成本之後，我可以答你，其實一個餐賺唔夠兩蚊。假設用十五蚊，扣除曬成本，係完全冇賺嘅。如果有啲人要求多啲飯，多啲汁，其實十五蚊係唔夠cover嘅。只不過係喺十五蚊同十八蚊之間拉個average互補。無可厚非，呢段時間係多咗人嚟懲罰嘅，反而專誠嚟懲罰呢批客人就幫補到我地啦。我諗兩個禮拜左右啦。
小編：咁依家顧客人數係咪已經有所回落？
八道：係呀，睇到係少翻嘅。尤其是係今日啦（受訪日），唔知係咪天氣關係啦，好明顯嘅，今日回落翻去之前有疫情期間咁濟。（小編：都係拍烏蠅咁濟？）係呀。（小編：咁尋日？）尋日都靜，比起前排已經回落翻？尋日比起疫情期間就叫做多啲啦，我諗比起嗰陣多10%左右。（小編：坐唔坐得滿？）堂食其實都坐唔滿，懲罰嗰段期間就坐得滿，甚至有好多人喺門口等！尤其是啱啱出嗰排，好似係星期六凌晨出po，跟住星期日嗰日突然boom一聲，完全應接唔到！
小編：問下其他問題啦。每個人都有政治啟蒙，想知道老闆你嘅政治啟蒙係邊件事？
八道：一早都係叫做黃嗰面嘅，大約雨傘運動嗰陣開始啦，去到反送中就更加明顯。同埋坦白講，由細到大我都唔鐘意差佬嘅，更何況依家呢。（小編：點解呢？）我試過有一次收工翻到屋企，天水圍（小編忍唔住插咗口：即係每日來回天水圍同慈雲山？）係呀，每日四點幾起身。收八點之後搞掂埋啲手尾翻到屋企都十一點。（小編：我以前試過夜晚九點幾先嚟食宵夜，咁你咪好夜先翻到屋企？）係呀，嗰陣我地收十點，因為當初有幾個拍檔，最後去到依家剩翻我自己。
講翻點解憎差佬，我嗰日放工喺西鐵站，見到個十六七歲嘅小朋友喺櫃員機禁完錢，跟住四五十個防暴走埋去捉，係推佢埋牆角跟住打佢。同埋我細個親身經歷，我十零歲嗰時俾班差佬逗，佢地點樣逗？佢地係直頭揾隻手一嘢拍落下體，咁樣逗法，所以我由細都大都唔鐘意佢地。無可厚非，你地正常執法唔緊要，係正常先好，但我覺得冇一個係正常。
小編：咁係咪因為嗰幾個拍檔，所以開店選址喺慈雲山？
八道：都可以咁講。因為如果唔係嗰幾個拍檔，我應該會喺翻天水圍開店。因為當初睇店嗰時我都睇咗幾個地方，天水圍都睇啱咗一個舖位，到最後因為其中一個拍檔話呢到ok，所以最後揀咗呢到。
小編：佢揀呢到係因為佢住呢頭，定係真心想做學生生意？
八道：係呀，我覺得有啲自私啦，就翻佢近啊嘛。（小編：咁學生生意多唔多？）學生生意都多嘅，佔咗整體大約四成以上，因為主要喺lunch，甚至有時早餐都有唔少生意。
小編：印象中你喺呢到開咗兩三年左右？
八道：準確嚟講係兩年零兩個月多啲。
小編：入翻正題啦，你為何願意加入黃大仙-黃色經濟圈(下稱黃圈)？
八道：講句唔好聽嘅，正如我頭先所講，我由細到大都唔鐘意差佬，我都係黃嘅。既然呢面有得join埋一齊，點解唔join呢？當大家互相幫助又好，發展下又好，叫做你幫下我我幫下你。同埋之前都有留意黃色經濟圈，其實大部分都係良心小店，希望將呢個正能量發放出去。
小編：咁加入咗黃圈前後，有冇感到有咩唔同？例如有冇一啲藍嘅熟客喺你地表態之後罷食？
八道：呢樣都有嘅。（小編：會否粗言相向？話你地係曱甴店諸如此類？）有。門口直頭俾人淋尿，尤其是係呢排。早嗰排就日日中午打電話嚟不停鬧，鬧完呢個鬧嗰個，話我地死黃店死曱甴咁樣，又講粗口。不過我後尾直程唔聽佢電話，因為都估到佢喺咩時間會打過嚟。佢試過有一日由兩點打過嚟打到夜晚七點，隔幾分鐘就打一次，不停咁打。我地幾個員工都聽過佢電話。
小編：你地入咗呢個經濟圈，會唔會諗下介紹啲客去附近其他黃店？
八道：都有嘅。冇辦法，呢面始終交通冇咁方便。
小編：咁你地有冇做外賣？
八道：呢樣冇做。點解呢？因為我地本身為咗就翻呢一區嘅人，定價唔會太高。同埋由一開店以嚟，我地都有做學生優惠，依家加埋醫護同長者優惠，啲餐會平五蚊至十蚊左右。但如果以food panda咁計，每次外賣收30%價，變相我要將售價抬高30%，但冇可能收貴咁多，咁我就會做一單蝕一單，連嗰幾蚊都冇得賺。（小編：咁有冇諗過join外賣仔兵團？由新蒲崗黃店友利坊同肥仔銘搞嘅，冇咁牟利。因為真係好多人想食八道，但又唔想出街浪費口罩。）係，呢個時間一定冇人想出街。我地送外賣嘅範圍圍繞慈雲山，最遠去到黃大仙，不過送遠嘅地方有少少唔同，要嗌滿一個金額先送，但唔會額外收charge。最緊要係睇我地有冇人手，因為我地依家人手相對少，比起未有疫情之前。
小編：啲人手係休假定係因為疫情關係而減少？
八道：本身有啲係咁啱離開咗，冇休假嘅。同事喺疫情期間正常翻工，我地又唔會減薪或者要佢地放無薪假。好似一開頭咁講，蝕埋都唔爭在啦。
小編：咁依家仲有冇「蝕完就算」呢個諗法呢？你地生意喺推出十八蚊餐後睇落有啲起色。
八道：多人嗰兩個禮拜的確見到希望。嗰時嘅生意額回升到疫情之前嘅水平再多啲，最高峰嗰日我諗大約多咗30%。兩個禮拜拉翻平均嚟講，應該比未有疫情前多咗10-15%左右。叫做賺翻少少。但武漢肺炎嗰時，最慘嗰排係平時生意額20%都冇。
小編：你話十八蚊餐淨係賺得兩蚊左右。我見網上有唔少人都話救人先要救自己，你會唔會考慮一下稍為抬高少少售價？
八道：其實十八蚊餐嘅原意係想個客自己帶餐盒過嚟，其一係想幫到大家，其二都想環保啲，所以如果冇帶餐盒過嚟，外賣盒嗰到我地都會收翻兩蚊，即係齊頭二十蚊，但其實呢個都係成本嚟，因為呢兩蚊除咗個盒，仲包括膠袋同餐具。所以我都會提倡佢地下次攞翻個盒翻嚟，因為呢啲膠盒可以循環再用。但如果抬高十八蚊呢個價，呢一刻我冇諗過。因為個初衷都係為咗幫人。其實我本身係想派口罩而唔係賣平價飯，因為唔止慈雲山區，其他地方都一罩難求。不過我地都揾唔到口罩，咁嗰排有啲人話冇漂白水，我地都有派漂白水，只係冇特別聲張。上個禮拜有一晚，莫姑娘（當區區議員）嚟揾我傾計，佢都有話我地想幫人，自己首先要夠長命。我地都明呢個道理，但係坦白講，喺呢個市道之下，就算第二輪抗疫基金有二十五萬，又頂得幾耐呢？
小編：呢間餐廳叫做「八道」，有冇啲咩特別含義？
八道：其實當初嘅諗法係我地幾個廚師出身嘅人，希望透過呢間餐廳帶多啲飲食元素俾客人嘗試得到。但係好無奈咁講，依家得翻我一個，想做都做唔到。調翻轉講，當初我地三個師傅可以互補，但依家得我一個帶住兩位手足，佢地嘅經驗始終未夠，如果格硬做，做出嚟嘅效果可能更加唔好。同埋問心嗰句，我兼顧唔到咁多，我唔想做啲垃圾出嚟俾顧客食，我唔可以話呢到嘅嘢食太好，但係以咁嘅售價，整體嚟講，我覺得不過不失啦。我唔會話係自己最好，但一定唔會係最差嗰間。