好高興我地今次嘅訪問邀請到位於慈雲山，遠近馳名嘅孖寶薄餅屋~~小編留意到最近呢間店喺唔同嘅地區群組都有人質疑係咪真黃。雖然話唔好捉鬼唔好理係咪偽黃，但係小編我都想同大家拆解偽黃風雲。事不宜遲，即刻去我地嘅訪問！有請我地今日嘅嘉賓老闆娘~
小編：首先，想知道一下你地嘅生意喺反送中運動前後嘅生意轉變係點樣？
孖寶：緊係少咗啦。除咗暑假，偽黃消息都令我地少咗好多生意。
小編：偽黃消息流出後，生意受到咩影響？當然反送中之後冇耐係暑假，生意一定會少咗。咁去到九月十月，情況係如何？
孖寶：緊係少啦。嗰時俾人講完之後，一張枱都冇，真係冇生意。但係ok嘅，點解ok呢？因為有啲人話俾我聽，你俾人擺咗上去喎。咁我唔識玩電話呢啲，唔識上網嗰啲。冇問題架喎你咁樣講，但你話我講粗口，識我嘅人都知我唔會講粗口，佢地一定未聽過我講粗口。我唔明點解呢個人要咁講，我唔知。同埋我好少得罪人。我又唔會發脾氣，就算你幫襯我三十幾蚊又好十幾蚊又好，我一樣咁好招呼你。我當然唔會你幫襯得我少，我就悔悔氣氣咁，我從來都唔會咁做。你幫襯我幾多我都好開心。
嗰時兩個禮拜差唔多零生意咁濟。好彩之後有協和堂嘅朋友知道我被冤枉後，開始幫我解釋翻，甚至有同學仔逐個逐個locker塞傳單幫我地宣傳翻，生意先慢慢好轉翻。
小編：有冇試過同人鬧交？
孖寶：有（小編：咁會唔會關於反送中運動而鬧？）唔關。鬧交都係之前嘅。有啲係想搏懵囉，唔俾錢呀，或者係嗰份嘢明明已經pack好，然後佢話爭舊雞喎，冇可能架。因為我做嘢好小心架，我好肯定冇漏嘅。即係會有人搏懵囉，但係我都會俾佢，佢都係想食多件啫，又唔使俾錢，ok嘅。
小編：咁你點睇呢場反送中運動？
孖寶：開始嗰時我都冇乜話點睇呢個運動，我冇覺得係啲乜。（小編：咁有冇話幫邊面？）我又冇話幫邊面，其實我都好憎班差佬，喺到作威作福，點解咁講呢？嗰時已經發生咗呢場運動，有次我地成班朋友出街，大家都係老年人，咁班差佬幾個衝埋嚟，你知阿姨望落都好斯文同上咗年紀，班差人喺到喝我地查身份證查身份證，叫你咪郁啊！我心諗，有冇搞錯呀，我做咗啲乜嘢呀。大家都唔知咩事。所以呢件事令我地對佢地嘅印象搞到好差。（小編：會唔會嗰日咁啱你地路過示威地方）唔會唔會，行街啫。所以我緊係幫後生仔啦，點解呢？我呢到全部做後生仔生意，我對佢地好有感情。你地應該見過啦，午市時間我地坐滿曬架嘛。我成日接觸你地，我又點會唔幫呢？我好驚你地班後生有事發生，每次見到都好心痛，俾警察㩒住，流曬血，真係好心痛。
小編：咁俾人話完偽黃之後，當時有冇諗過做啲咩，例如貼文宣，證明自己係黃？
孖寶：我地冇諗，因為我同uncle（老闆）已經上咗年紀，所以我地會低調啲。低調唔係代表唔撐後生仔，後生仔有啲乜嘢，我都會撐佢地。支持唔一定係痴到成店文宣先叫做支持，
我覺得有啲嘢唔一定要做到出曬面先叫做支持。
小編：你地之前好似有派過汽水比學生喎，彩虹年宵嗰時都有比過汽水比一啲機構賣喎，點解會有咁嘅做法？
孖寶：幫後生呀嘛，總而言之你地需要乜嘢，你就同我講。我做到嘅話咪話俾你聽我做得到。但如果煮嘢食就唔得啦，我地年紀大咗好忙架，真係做唔切。如果係方便啲嘅，咪派汽水囉。好似學生餐咁，已經係叫餐連汽水（小編：咁普通街坊有冇得做呢個優惠呢？）因為依家已經八折咗。再加上依家少咗人幫襯，又冇開堂食幾個月（小編對此表示欣賞，一月尾已經開始暫停堂食，防疫仲快過柒柒柒。）
小編：武漢肺炎肆虐令大家都少咗出街，孖寶嘅生意有冇大受影響？有冇其他生意方式提供外賣服務或者提供優惠去增加生意？
孖寶：冇呀。我地兩公婆年紀大，太多生多我地真係做唔切。因為一來只有我地兩公婆做，冇請人。有時大家見到有其他人喺到，係街坊同親戚客串一下。請人就做唔住啦，因為撇除租金，其實唔會賺太多。（小編：咁有冇申請政府應急基金？）我地申請咗政府嘅八萬資助金，算係幫補到幾個月租金。我地又冇請員工，最多唔糧出俾自己。
小編：如果你地唔貼啲嘢，始終會有人懷疑你地係偽黃喎。
孖寶：我已經貼咗張（楠姑仔女黃店證書）證書，有好多人影架啦，我覺得應該都ok嘅。
小編：想問個深入少少嘅問題，我地以前訪問過你仔仔，點解你唔請人呢？佢話你以前請過人。會唔會因為請過人而同人結怨，搞到俾人中傷？有冇咁嘅可能性？
孖寶：好難講嘅，我唔敢請人因為佢地攞得太多啦。我冇防人之心。如果請得佢仲要成日提防佢，咁請嚟做乜呢？我不嬲都唔防人嘅，做得朋友又點解要防呢？所以呢，網上啲人要中傷我都冇辦法，識我嘅人一定知我唔會係啲咁嘅人。我諗中傷我嘅人係少過話我好嘅人。我好相信呢到（毓華街）嘅人係100%唔會話我唔好。我好擔保我自己嘅人格。我喺呢到十年，十年裏面我對人地點樣，呢條街個個都知。我唔會孤寒，唔會同人計較，甚至啲客，你想要啲咩就攞啦，我唔會計較嗰一個幾毫。我睇錢唔會睇得咁重要。如果人地要中傷我我都冇辦法。萬一有一日阿姨我俾人中傷得好緊要，你地救我啦（全體大笑）。
喺呢個時侯，孖寶阿姨亂入咗一條問題：點解八道要賣十八蚊餐呢？
小編：因為孖寶同八道都係為咗幫人啊，你係鐘意幫後生仔，佢係鐘意幫老人家，一人幫一半。大家都唔係為咗賺錢。
孖寶：佢嗰啲飯餐，啱老人家口味。但係我呢啲pizza炸雞，老人家唔啱嘅。我呢啲係啱後生仔嘅，所以呢，我有好多後生仔生意。佢地好樂意嚟幫襯我（小編喺學生時代每個禮拜例牌C餐，淚奔中~~）。所以中傷我嘅人點解要中傷我呢。真係好難講，仲要話我講粗口喎。（小編：會唔會係認錯你親戚講粗口，然後入咗你數？）唔會。同我一齊嘅人，我唔講佢地都唔會講粗口。我只係一個普通人，正正常常做生意，大家開心就好。所以有人嚟落單，有啲咩要求，我都會盡量滿足佢地。
小編：問多少少啦，見你地加入咗黃大仙黃色經濟圈，想知呢個係你嘅意願定阿仔意願？
孖寶：我地大家都ok嘅。我同我個仔都好close架，我地有乜嘢，對方都會知，互相冇隔膜嘅。大家好似朋友咁。
小編：其實始終個肺炎搞到市道咁驚，我地都有啲擔心你地做唔住，或者會做得好辛苦喎。
孖寶：做唔住就應該唔會嘅，因為我地冇請人，最多自己冇糧出俾自己。（小編：政府嗰八萬蚊都叫做幫到下？）幫到租金囉，兩個月左右。
小編：最後想問啦，你地啲餐點解可以整到咁好食？???
呢條老闆娘冇答我地，似乎大家要去幫襯多幾次尋找答案?