得悉連日來不少朋友對於我哋團隊嘅工作，比如音樂噴泉司法覆核等事有質疑，然後尋晚臨瞓前亦見到網上有人指我食人血饅頭，要踢爆我大奸大惡嘅真面目，更作出多項指控。為免流言散播同加深誤會，都想寫返少少澄清，順道同大家分享下新手區議員差不多半年以嚟嘅工作。
? 梁凱晴懶到出汁，做區仲衰過保皇黨！
? 有留意我Facebook page嘅朋友應該知道，其實我不時都會跟大家更新月華區區務嘅情況。當然基於個人私隱，區議員唔能夠每個case都公開，短短幾個月除一般嘅居家個案求助、爆屎渠爆水渠、檢查外牆排氣口、滲水糾紛、花䕺換花、公園換老鼠藥、處理臭氣來源、噪音來源、囤積垃圾戶、流感疫苗服務、血壓血糖檢查外，過去一段時間，最主要的工作就是做好區內嘅民間防疫。我同團隊曾家訪區內獨居長者和長期病患、舉辦漂白水分發、代購防疫包、將應急口罩點對點地直接送予有需要人士、協助商戶申請基金津貼等。當區內出現確診個案，我同團隊隨即派發更多口罩、消毒液，食環署亦喺我哋團隊嘅督促下立即洗街。
不過都要感謝有朋友主動去關心區議員嘅工作，之後我同團隊將會撰寫一份更全面及詳細嘅工作報告，到時大家對於我哋嘅工作將會有更多了解。
而因為保皇黨嘅霸佔，我一直未能開設辦事處，就連小小倉庫亦不獲續租，加上疫症關係，自四月起我們的流動辦事處少咗同街坊見面嘅機會。但請大家放心，各項區務並無因為咁而怠慢，隨住疫情好轉，各類街站和落區都會頻繁返唔少。另外關於我嘅會計工作，其實剛剛當選大概一月嘅時候，我已經與公司開始討論我嘅合約，至二月正式辭職，專注投入議員工作。
————
? 梁凱晴係報警撚，報完仲要del post，驚死人地知！
? 約一個月前，有中聯辦下線嘅社團聯會，喺月華區糾集成二十人，透過「口罩換身份證資料」嘅方式，懷疑哄騙區內長者，因此我團隊嘅義工先至會報警處理。拍攝影片嘅義工當時被嗰班社團人士恐嚇，擔心被尋仇騷擾，所以我將影片喺page嘅首頁隱藏，但並無刪除。今次報警純屬針對藍絲惡棍，我絕不支持用限聚令對付手足或弱勢群體。而事實證明，黑警大細超完全唔處理呢啲親政府人士，限聚令根本只係打壓異己嘅工具。
————
? 梁凱晴抹黑人民力量同民主黨！
? 簡單一句：無中生有。各黨派已向公眾交待初選意向，我相信香港人嘅眼睛雪亮。
————
? 梁凱晴搶閘JR去法院打卡，搶曬其他區議員功勞！
? 自三月我向觀塘區議會主席蔡Sir表明有意進行司法覆核起，一直有同東九龍社區關注組嘅健華，與及研究幕僚和法律團隊，密鑼緊鼓咁準備今次JR。花咗近兩個月時間籌備入稟用的法律文件，終於趕及喺下星期二嘅區議會大會前夕完成。
喺籌備工作嘅後期，我得知有其他民主派同事亦有意進行JR，然而因音樂噴泉已經動工，越遲入稟嘅話，只會越導致獲批准開展聆訊嘅機會減少。經過與蔡sir商討，我同團隊決定繼續去馬，故此今次未能聯合一齊入稟，純粹因為準備進度不一，未來仍可於法庭合拼聆訊，一起努力。在記者會前，我亦已把法律文件發給蔡Sir，及同樣有意研究司法覆核嘅區議員同事作參考。
一次JR嘅申請，牽涉嘅行政程序繁瑣得不能想像，需要嘅籌備時間亦非一、兩日，甚至一星期就能完成。抹黑我「攔途截劫」別人嘅成果唔緊要，但請唔好貶低一班勞心勞力的人權律師嘅付出。
————
最後最後，我好歡迎大家批評我、議論我，不過喺大量不實抹黑嘅情況下，仲要加上一個「J圖」嘅標題嚟抽水性騷擾我，就真係超過底線了。作為抗爭陣營嘅區議員，我深明自己係因為呢場時代革命嘅浪潮，先有機會為大家發聲、服務，一言一行都要對得住手足。無論係香港嘅政治環境，抑或好多社區問題上，其實積壓咗十幾廿年，上任未久嘅區議員當然無可能做到100分，但我一定會繼續努力，未來請大家繼續多多指救??♂️