（獨媒特約報導）新一屆的區議員上任剛好超過四個月，在武漢肺炎疫情下，在社區最前線的區議員成為代購、採購，甚至是外賣速遞員。「區議員其實係垃圾工，但係一份使命。」沙田區議員陳運通對這份工作有一番見解，認為如果只把「區議員」視為工作，絕對只是「垃圾工」，但卻是一份使命。
「收入、工時都不成正比。全香港都知區議員無實權，但呢個身份可以凝聚到居民。領展、管理處都會忌諱你，因為你背後係有民意支持。」陳運通三申五令說，「如果你視區議員係一個使命，即係抗爭意志，就根本唔會介意呢啲付出。」
曾經的廢中和港豬
對於被標籤為政治素人，陳運通形容自己只是一名廢中，大半年前更是不折不扣的港豬，「我無呃你，真係港豬嚟，一路只係想搵錢、諗退休同去旅行。」
三十多年沙田街坊，區議員辦事處即將在屋企樓下顯徑邨顯祐樓入伙。39歲的陳運通在大學唸青少年輔導，畢業後做過傳道人，離開教會後試過搞生意。他把賺到的錢在尖沙咀開設中心作心理輔導員，區議員是他的第四份全職工作。
「當九十後、零零後企哂出嚟，我哋呢啲八十後仲意圖享受收成期。人哋豁出去，我仲等人企出嚟，老咗嘅時候，唔會接受到自己係咁。」說到這裡，陳運通一度眼泛淚光，「如果公義表態都唔敢，我仲可以點教我啲仔女呢？爸爸生日就陪我去旅行？我會諗佢哋係我身上可以學到咩呢。」
嘆香港淪軍政府統治
反送中運動席捲全港，大時代下，總有人覺醒。運動把39歲的陳運通越推越前，梁凌杰的過身，200萬人上街，令他更堅定不移。
自6月起，他和顯徑街坊組成小隊，上街抗議、集會和接放學等。「每次見到警暴的畫面，你其實否定唔到香港已經係軍政府狀態。」
去年的中大和理大事件，令陳運通畢生難忘，「真係唔會相信係喺香港發生，同黎巴嫩戰地無分別。呢班十幾歲嘅年輕人就係香港的未來，你話我知，將來點樣承接呢一個香港？真係非常心痛。」
民主派內閧 出選因睇唔過眼
去年區議會選舉，沙田「顯嘉」選區有三名民主派參選。沙田區政的張宇添獲民主派全力加持。他背後星光熠熠，獲教協、區政聯盟、楊岳橋、陳淑莊、戴耀廷、區諾軒和周庭等支持。
當時另一候選人、報稱獨立的謝玉梅，則獲民主黨加持，前主席劉慧卿在最後直路更多次為她站台。談到選舉，陳運通依然怒火中燒，他曾提出三人作初選，但被拒絕。
「我有時諗，（三名民主派硬撼）輸咗都係林松茵啫，但如果換轉係表現更差嘅泛民，對街坊嘅傷害可能更深。」
在顯徑邨居住了三十多年，陳運通表示從沒有想要參選，更打算替民主派的張宇添助選。然而，路遙知馬力 ，日久見人心。陳運通質疑其作風古怪，指街坊當時欲舉辦放映會、連儂牆和防衛術等活動，曾向張宇添求助，但慘吃閉門羹，「你都未撚選到，就建議居民自發？」
去年十月，反送中運動下的沙田充斥警暴。10月3日的晚上，市民聚集在新城市廣場，聲援10.1在荃灣遭警察槍傷的中五學生。結果不言而喻，警察濫捕，在大圍田心警署狂射催淚彈，更有人頭部受傷。
當晚在警署外，陳運通企到幾乎天光，「有啲人，前線從來都見唔到佢人，幾日之後就去警署拉橫額、遞信同影相，咁樣對得住手足？」陳運通「睇唔過眼」，決定以街坊身份參選。選舉結果說明天道酬勤，陳運通拿下3,101票，力壓公民力量林松茵的2,547票，張宇添和謝玉梅分別獲得1,246票和203票。
陳運通：食人血饅頭都食得稱職啲
油尖警區指揮官林鴻釧早前出席區議會會議，斥民主派議員「坐喺度坐享政治紅利，食人血饅頭，連汁都要噒埋！」陳運通則認為，「大家都知係人血饅頭，（新任議員）你係咪可以食得稱職啲呢？俾人睇到你係企喺抗爭者嗰邊。」
記者質疑，對區議員沒有期望，但卻又要參選。陳運通毫不猶豫地說，希望能告訴街坊，「一個電話、一個WhatsApp 就搵到我」。「要佢哋嘅聲音被聽得見，我有哂心理準備會被捕。」
在疫情肆虐下，陳運通曾和另一名沙田區議員吳錦雄派漂白水，但引來大批街坊聚集，遂決定改為入信箱和預先登記。他表示，即使不是區議員都會捐口罩和上門派發物資，「我個人直腸直肚，如果得罪咗你真係唔好意思。」
曾投楊岳橋 今只與抗爭者同行
這名曾經的廢中和港豬，表明只想和抗爭者繼續同行。2016年旺角騷亂，陳運通稱，當時票投公民黨楊岳橋，並否定本土民主前線梁天琦的路線，未能接受以武抗暴和放開懷抱抗爭。「今日想法係唔同哂，只要唔係企喺建制個邊就得，好似鄺俊宇咁，傳統泛民都會同抗爭者同行。」
作為基督徒，陳運通自嘲粗口爛舌，政權的暴政令他不得不講粗口發洩，「光復咗香港先再誡粗口。」
後記
採訪當日在顯徑商場的平台，忽然傳來救護車的聲響，陳運通問道，「你聽唔聽到？應該係嗰邊。走吧。」他說罷便拔足狂奔，記者追隨其後，當怒跑300米到顯田遊樂場外時，原來一名婆婆被兩名兒童的單車撞至倒地。
陳運通和交通警察溝通下，再一次拔足狂奔，聯絡傷者的丈夫登上救護車，「呢啲就係我哋的日常。」
記者：麥馬高