圖片來源：大埔體育會
編按：獨媒在4月23日刊出《民政批評大埔區議會否決龍舟撥款 主席關永業：我會頂住壓力》一文，報導大埔區龍舟競賽委員會與大埔體育會向區議會申請100萬，舉辦大埔龍舟賽被否決，民政總署去信區議會作警告。一名附上教練證的龍舟教練投稿獨媒，質疑撥款申請書內有眾多不合理的開支項目。原題為《一個行內人的心聲，大埔龍舟撥款被區議會否決》。
我是一名龍舟教練，曾經多次以領隊及運動員的身份參與大埔龍舟比賽，多年來也參與協辦其他區域的龍舟比賽。
對於今次撥款被否決，很多龍舟參與者都感到意外和惋惜，繼而是憤怒，原因很單純，就是他們冇得玩。
可是大家並沒有深究內裏嘅原因，大家不妨以更科學嘅方法看看這次撥款申請有什麼問題。
香港的龍舟比賽，很多都是自負盈虧，簡單啲講，就係收取各隊報名費，再找些少贊助，就已經足以應付所有支出。二三十萬，足夠埋單有突。為什麼偏偏大埔比賽就要1,600,000支出？
為此，我詳細研究了大埔龍舟競賽委員會所提交嘅財政預算，發現有太多荒謬嘅地方。
參考第2、3項，單單籌備人員薪金就已經有20幾萬，共1,945小時的工作，其中「監督」一職時薪更高達$318。年復年搞同一個比賽，同一地點，每年嘅工作都係一樣，都係按上年固有嘅模式去進行，絕對冇可能需要2,000小時的工作，更何德何能收取$318時薪？
參考第6項，雜項支出，高達四萬多元，支出表本來已經巨細無遺，啲項目已經有咁細分到咁細，隨隨便便寫個雜項，就已經用咗四萬幾蚊。
參考第10、11項，搭建場地，場地佈置，費用高達20幾萬，呢個數字已經係香港很多龍舟比賽嘅總開支。有冇經過正常嘅招標程序，有冇圍標，天曉得。
參考IV龍舟練習管理小組第25項， 龍舟練習管理費用$65,000. 香港一般嘅龍舟隊伍，都有自己嘅訓練基地，冇基地嘅，就會在外面租船恒常練習，例如沙田、將軍澳、西貢，都是很熱門嘅租龍船地點。即係話各隊伍都已經有自己的地頭練習。根本沒有多少隊伍會山長水遠入到三門仔，去使用大會提供嘅龍舟練習時間，偏偏呢個項目淨係管理費用就已經$65,000。
參考VIII 總務小組第41項，練習用龍舟修補及翻身，費用72,500。正常使用龍舟，根本不需要什麼保養維修，頂多每年一次鏟船底，以防止蠔宿生長。這批練習龍舟，理論上只用了一個月，（大會提供的練習時間為5月9日至6月14日）每天最多三節練習時間，就算使用率有100%, 也只是用了90節，居然衍生出$72,500元的維修費。（比多個數字大家參考吓，現在買一隻全新的龍舟也只需2萬幾元。）
參考VIII總務小組第42項競賽日龍舟修補及翻新，費用$104,000，同第5點一樣，只用了一天比賽的龍舟，居然要用10萬元翻新。
參考VIII 總務小組第43項， 洗龍舟及上架， 同一批龍舟，已經不合理地花咗17萬元去翻身，居然仲要用多$27,000去洗。
參考VIII 總務小組第44項安裝及拆除龍舟配件設備，唔使講到咁高深嘅，龍舟上面嘅設備就只有龍頭龍尾和鼓。所謂嘅龍頭龍尾安裝，就只係放上去，螺絲都冇㗎。個鼓就複雜少少，打幾個繩結咁囉。咁簡單嘅工作居然要10000元。
還有太多不合理的費用，例如第30項$36,900的交通指示牌，第55a搬鐵馬$20,000, 連聖約翰救傷隊嘅飯盒錢都要有咁大寫咁大，參考53d（$75x50人），小弟出席咁多龍舟比賽，以及其他運動場合，都從未見過聖約翰救傷隊會出50人，一般都係4至5個。
作為一個龍舟參與者，當然希望有更多比賽俾我哋參加，龍舟係一個傳統項目，教龍舟係一種傳承，但眼見有人以「非物質文化遺產」，「節日慶典」為擋箭牌，中飽私囊，毫無顧忌地攞納稅人嘅錢，強迫所有龍舟參與者為他們的貪婪背書。希望大埔區議會主席可以頂住壓力，亦都希望呢一次否決撥款，能夠撥亂反正，唔好將體育文化活動淪為少數人嘅提款機。（雖然一直都係）
最後，原諒我只能以匿名身份去寫呢篇文，始終阻人發達如同殺人父母，我都要繼續在龍舟界立足，本文只代表本人立場。